YEHEZKIEL 23 - Alkitab Singog In Mongondow Masa In Tanaa

Doyowa mogutat inta nogaid kon dosa

¹ Ki Tuhan in noguman kon inakó, kai-Nia,

² “Ei intau ilo-ilow, oyúon in bobay doyowa mogutat.

³ Kon dodai in noguodpa, nogutun in mosia kon Mesir. Kon tua mosia nosiugdon takin ḷoḷaki, bo nobaḻídon sundaḷ.

⁴ Guya-guyang ki Ohola in tangoinea, sia in nobaḻí lambang in Samaria. Ki ai-ainea in ki Oholiba in tangoinea; sia in nobaḻí lambang kon Yerusalem. Akuoi in notonibuḷoi i nayadua tua bo nokouḻí kon adí kon inayadua.

⁵ Umpaka ki Ohola nobaḻídon ki buḷoi-Ku, sia in tantúbí doman sinumundaḷ, bo totokbí in moibog in mosiug moyotakin in intau mita inta kinoibognea nongkon Asyur.

⁶ Mosia tua in tontara inta nomaké in soragam nokamumu, intau mita moḷoben bo pojabat mita moḷantud; komintan itoi mita in tontara inta tumotakoi kon kabaḷo bo mongoḷunat.

⁷ Takin intau mita moḷoben tatua ki Ohola nonuaḻing. Popisí in sia totok in moibog mosiug takin monia, dá pinonajisneadon in awaknea pinongin nosumba kon berhala mita monia.

⁸ Sia in umuranbí sinumundaḷ ná dungkuḷmai wakutu in kon Mesir, kon tampat inta dungkuḷ sia nosiug takin ḷoḷaki. Pinangkoi kon sia mongoadípa, sia in siniugandon bo pinomia saḷaku sundaḷ.

⁹ Tuamai in inogoi-Kudon in sia kon inta kinoibognea mita, intau mita in Asyur in totok in kinotanobannea tua.

¹⁰ Pinakisa monia in sia pinilangan, bo iḻimod in kedang, bo ki adínea mita in inagow. Kon ondakabí yo ukurnea tatua tantú oumanon in bobay mita.

¹¹ Ki Oholiba, ki ai-ainea in nokoontongdon kon onu inta nobaḻí tatua, táe ibognea in moḷobe-ḷoben nongkon i Ohola in mogaid kon totuaḻingan.

¹² Ki Oholiba in totokbí in moibog kon intau mita in Asyur tatua, tayowmobiag mita inta mongoḷunat inta tontara tumotakoi kon kabaḷo, intau mita moḷoben bo pojabat mita moḷantud, bo tontara mita inta nogiḷambung mita in nokamumu tua.

¹³ Inontong-Ku kon ki Oholiba in totuu mokotor ná ki guya-guyangnea.

^14-15 Koonggot-koonggot koromú-koromúdon in ki Oholiba. Totokbí in moibog in sia kon gambar mita inta kinurig kon dinding, bo inta cinet in nopura ná dugú. Gambar mita tatua in nobaḻí lambang itoi mita in tontara in Babel takin nogibaan in baan mogaga bo bogot in uḷu inta oyúon in ḷambe-ḷambénea.

¹⁶ Naonda in inontong i Oholiba in gambar mita tatua, ibognea mosiug takin ḷoḷaki noiaputdon bo pinoki oinínea in itoi mita in tontara in Babel tatua.

¹⁷ Dá namangoidon in mosia bo nosiug takinnea. Totokdon in pinomia monia ibo-ibog in sia nodapot in norongódon in sia kon i monia.

¹⁸ Nopaḷut mako kon tua diádon inumado-adop in sia in sumundaḷ bo mopoontongdon in awaknea kon intau mita. Mobú in Akuoi in mokoontong kon inia, ná kobú-Ku mokoontong kon i guya-guyangnea.

¹⁹ Koonggot-koonggot mokakitdon in sia mokituaḻing, diádon in yoposinea kon tungkuḷ in sia noguodpa kon dodai in sinumundaḷ kon Mesir.

²⁰ Totok in tumagab in ibognea kon ḷoḷaki, ibognea in nádon ibog in kabaḷo koḷakian. (

²¹ Ei Oholiba, moibogbí in iko mopoaid bui kon onu inta inaidanmu kon dodai in noguodpa in iko, kon tungkuḷ intau in Mesir mongogayokan takinmu.)”

Ki Allah nonisig kon i Oholiba

²² Ki Tuhan Inta Totok in moḷantud in noguman, “Ei Oholiba, mobúdon in iko kon intau mita inta kinoibogmu, táe popoyaat-Ku in gina monia sinbá tumorú kon inimu bo moḻibut kon inimu.

²³ Sipunon-Ku bo diaan kon inimu in bayongan in intau kinoibogmu nongkon Babel, Pekod, Soa, Koa, Asyur, bo intau mita in Kaldea. Diaan-Ku poangoi kon inimu in tayowmobiag mita inta mongoḷunat inta pangkat mongoḷantud, intau moḷoben, pojabat moḷantud bo itoi mita in tontara inta tumotakoi kon kabaḷo.

²⁴ Tubuon monia in iko nongkon utuan takin tontara inta mobarong, takin doman kereta mita in parang bo kereta mita pododatogan kon tongkaaḷ. Kokada-kadai in kaḻeaw bo nogisapoyo in uwaja, mamangoi in mosia moḻibut kon inimu. Pomayá-Kubí mako in mosia monisig kon inimu podudui in hukum mita monia.

²⁵ Tuamai in tumorú in Akuoi kon inimu, pomayá-Ku mako in mosia in momia kon inta moḻingá kon inimu. Ngiung bongoḷanmu in pongkóonbí monia bo ki adímu mita in gamáanbí bo tubáan kobia-biagpa.

²⁶ Pilanganbí in iko bo ḷambámu mita in agowonbí.

²⁷ Natuata in aid-Ku mopogogai in ḷanuan in ibogmu bo bayongan in tuaḻing inta pinomiamu kon dodai in iko kon Mesir. Diá bidon in kamangmu kon berhala onuka andeka mokotoropa kon Mesir.”

²⁸ Ki Tuhan Inta Totok in moḷantud in noguman, “Akuoi in mobogoibí kon inimu in intau mita inta mokobú bo inta kinodoímu.

²⁹ Popisí in doí in mosia kon inimu, bayongan in siniḷopíanmu in agowonbí monia. Iko in taḷaanbí diá koḷambu-ḷambung saḷaku sundaḷ bo indoianmai in bayongan in intau. Ḷanuan in ibog bo kotormu tuata

³⁰ inta nokopoangoi kon ukur diá mopia tanaa kon inimu. Iko in nobaḻí sundaḷ kon bangusa mita, bo noponajis in awakmu pinongin berhala mita monia.

³¹ Iko in dinumudui kon aid i guya-guyangmu, tuamai iko in hukumon-Ku doman natua.”

³² Ki Tuhan Inta Totok in moḷantud in noguman, “Bonu in palo i guya-guyangmu musti inumonmu. Moḷoben in palo tatua bo moonag. Bonunea in nopuḻing in rebeg bo singkuḻe, inta musti tarimaanmu nongkon bayongan in intau.

^33-34 Palo i guya-guyangmu Samaria, binonuan in ondok bo korimumudan. Naonda in inumonmu in bayongan in bonunea moḷoḷangu in iko bo mororiga. Bo bonsig mita in palo tatua pakéonmu pomerak kon dodobmu. Akuoi ki Tuhan Inta Totok in moḷantud ain nosingog.”

³⁵ Ki Tuhan Inta Totok in moḷantud in noguman, “Popisí in iko nokoḻiongdon kon i-Nakó bo nonoḻikudon kon i-Nakó, dá mororiga in iko sin ibogmu inta noiḷanú bo pinosundaḷanmu.”

Hukuman i Allah kon doyowa mogutat

³⁶ Ki Tuhan in noguman kon inakó, “Ei intau ilo-ilow, nosadiadon degá in iko in monisig kon i Ohola bo kon i Oholiba? Toboḷowdon in aid moraat inta pinomia monia.

³⁷ Mosia in nomiadon kon totuaḻingan bo noḻimod; mosia in nonuaḻingdon takin in berhala mita bo noḻimod kon i adí-Ku mita inta pinononggadí monia. Adí mita tatua in pinosumbadon monia kon berhala mita monia.

³⁸ Bo deemanbí tongá tua. Mosia in noponajis doman kon Baḷoi-Ku bo singgai in Sabat inta ain sinantú-Ku.

³⁹ Kon singgai mosia noḻimod kon i adí-Ku mita bodongka pinosumba kon berhala mita, doyowa mogutat tatua namangoi in Baḷoi-Ku bo nopokotormai kon tua!

⁴⁰ Nodapotbí in mosia nokidia in sonsoma kon ḷoḷaki mita kon ḻipú mita inta nongoyayú, bo namangoi doman in mosia. Popisí in motomu kon intau mita tatua, dá taya dua mogutat tua in noinggú, nogicilá bo nopomaké in noyagi-yagimai in ḷambá.

⁴¹ Bo iḻimitú in mosia kon tudu in tosiugan inta mogaga. Kon tayowonnea oyúon in meja inta pinogoḷudan kon noyagi-yagimai in kaanon, takin dupa doman bo ḷana in zaitun inta ain inogoi-Ku kon i monia.

⁴² Nongkon ḷuai kinodongogandon in singog modowawá in intau moantó inta mobarasanang. Intau mita tatua in inoinídon nongkon rawang bungaion. Mosia in nopoḷutud in ḻingkit kon kokaḷ in doyowa mogutat tatua, bo nopoḷutud doman in mahkota mita inta mogaga kon uḷu monia.

⁴³ Bo irai-Ku, ‘Moibogpa degá in intau mita tatua mopogogitog in ibog takin sundaḷ mita inta ain noḷaḷow popisí in totuaḻingan?’

⁴⁴ Mopoyoḷua-ḷuan intau in mamangoi kon i Ohola bo kon i Oholiba, sundaḷ doyowa inta moraatdon tua.

⁴⁵ Táe intau mita motoḷutui in monisigbí kon doyowa mogutat tatua noidoyon kon totuaḻingan bo pinoḻimodan, sin mosia in totuubí kon kotaḷá.”

⁴⁶ Ki Tuhan Inta Totok in moḷantud in noguman, “Oinídon in topaanan in intau sin mopororiga bo mogagow kon sundaḷ doyowa tatua.

⁴⁷ Biódon mako in mosia anduron in batu bo duduran in kedang. Biódon mako in ki adí mita monia in sibaton bo baḷoi mita monia in turubon.

⁴⁸ Kon sinangkub in butá naa inggamáan-Kubí modait in aid mokotor ná tatua. Aid-Ku tua in mobaḻí tompoingat kon bayongan in bobay sinbá diá mokituaḻing ná doyowa mogutat tatua.

⁴⁹ Ei Ohola bo Oholiba, hukumon-Kubí in moiko popisí in moiko in nonuaḻing bo nosumba kon berhala. Dá kotaauandon monimu kon Akuoibí in ki Tuhan Inta totok in moḷantud.”