YEHEZKIEL 22 - Alkitab Singog In Mongondow Masa In Tanaa

Aid moraat in Yerusalem

¹ Ki Tuhan in noguman kon inakó, kai-Nia,

² “Ei intau ilo-ilow, nosadiadon degá in iko in monisig kon kotá inta nopuḻing in pinoḻimodan tatua. Poontongdon kon inia in bayongan in aidnea inta mokorongó.”

^3-4 Ki Tuhan Inta Totok in moḷantud in nokipoyaput kon inakó in koyow tanaa kon Yerusalem, “Iko in kotaḷá popisí in noḻimodon kon nobayong in intaumu tontaní, bo noponajisdon in awakmu pinongin nosumba kon berhala mita inta pinomiamu tontaní. Tuamai in ponisigan kon inimu in motoyongdon bo kobiaganmu in ḷagidon modait. Iko in pomayá-Kudon mako in rebegon bo kosingan in bangusa mita bo bayongan in butá.

⁵ Iko in poyambáan in butá mita inta moyayú bo modiug popisí in iko tantú ḻimimpat kon hukum bo atorang.

⁶ Bayongan in itoi in Israel mopongata in ropotnea tontaní bo moḻimod.

⁷ Diábí tobatúmai in intau inta nogutun kon inimu in mohoromat kon guyanganea. Iko in monompobaḻik kon intau ango-angoi bo motayak kon kauntungan nongkon roriga in boba-bobay bo uno-unon.

⁸ Tampat mita pooibadaan kon i-Nakó sinamakanmudon bo singgai in Sabat diádon inindoionmumai.

⁹ Kon sigad in intaumu mita oyúon in mopoponapud in uboḷ kon intau ibanea sinbá hukumon matoi. Oyúon doman in mokaan kon ponoyá inta pinokurubandon kon berhala. Oyúon doman in momia kon mokotor.

¹⁰ Oyúon in modondouḷug bo mosiug takin i iná uatoknea, takin bobay inta inangoinea,

¹¹ takin i buḷoi bobay intau andeka i mototakanea andeka i ai-ainea inta diá nogaḷum kon iná.

¹² Oyúon doman in nobaḻí ouboḻian moḻimod, mototayak kon kauntungan moḷoben kon intau ibanea bo mogogagow kon intau tongobangusanea. Mosia komintan nokoḻiongdon kon i-Nakó. Akuoi ki Tuhan Inta Totok in moḷantud ain nosingog.

¹³ Táe tanaa in bongkugon-Kudon in mogogagow bo moḷoḻimodmu.

¹⁴ Mokobaḻípa andeka moropotpa degá in iko in mobuat kon ḻimamu naonda in hukumon-Ku mako in iko? Akuoi, ki Tuhan Inta Totok in moḷantud ain nosingog bo Akuoi in mogaidon kon onu in siningog-Ku.

¹⁵ Porariton-Kubí in intaumu mita kon sinangkub in butá bo bangusa, bo popogogaion-Kubí in aidmu inta moraat tua.

¹⁶ Iko in singkuḻeonbí in bangusa mita ibanea, dá kotaauanmudon kon Akuoibí in ki Tuhan.”

Tuḷú inta mokotusi

¹⁷ Ki Tuhan in noguman kon inakó,

¹⁸ “Ei intau ilo-ilow, intau mita in Israel tua in diábí in mangaḻenea kon i-Nakó. Mosia tua naonda bo apat logam noyobauk, naonda bo tambaga, tangat, uatoi bo tangat morondí inta kinotaḷáan naonda in saḷaka pinomurnidon kon bonu in tuḷú.

^19-20 Dá tanaa, Akuoi, ki Tuhan Inta Totok in moḷantud, moguman kon i monia kon mosia in naondadon bo logam inta diá in mangaḻenea tua. Naonda bo saḷaka, porunggu, uatoi, tangat morondí, tangat mobudó binonu kon pototubáan sin pomurnion, natua doman in mosia sipunon-Ku bo diaan kon Yerusalem. Torú-Ku inta motoyang tua in mopoḷoḷayat kon i monia naonda bo mopoḷoḷayat in logam mita tatua.

²¹ Yo, sipunon-Ku in mosia kon Yerusalem, mopoyongkit in tuḷú torú-Ku kon ḻimonag monia, dá iḷoḷayat in mosia.

²² Naonda bo saḷaka iḷoḷayat kon bonu in tuḷú, yo natua doman in mosia poḷayaton kon Yerusalem. Dá kotaauandon monia kon Akuoi, ki Tuhan, ain nopoḷuai in torú-Ku kon i monia.”

Dosa in itoi mita in Israel

²³ Ki Tuhan in bui noguman kon inakó, kai-Nia,

²⁴ “Ei intau ilo-ilow, poguman kon intau in Israel kon butá monia in nonajis, tuamai in sinumorú in Akuoi bo nohukum kon inia.

²⁵ Itoinea mita naonda bo singa inta moganggor naonda in modomok mako kon kokaanonnea. Mosia in moḻimod kon rayat, mogagow kon bayongan in kapunyaan bo kaoyúonan inta nouḻí monia bo nokopopisí kon nobayong in nobaḻí dongka bobay-bobay.

²⁶ Imang mita in Israel iḻimimpat kon hukum-Ku mita bo nokokotor kon pakakat mita inta ain sinantú-Ku kon i-Nakó. Diá bidon pinoyoposi monia onda in motaau bo onda in diá motaau. Mosia in diá doman notundú kon rayat mopoyoposi kon onu in modarit bo onda in nonajis podudui in atorang in agama. Mosia in diá bidon mopandungmai kon singgai in Sabat. Aid monia natua in pinoningkuḻebí in bangusa Israel kon i-Nakó.

²⁷ Pojabat mita in pomarentanea naonda bo serigala inta noyingki-yingkit kon kokaanonnea. Mosia in moḻimod tongábí makusud motayak kon kauntungan.

²⁸ Nabi mita mobuni kon dosa mita tatua; mosia in naonda bo intau inta nocet kon dinding nokotor. Oontongon monia tua in diábí totuu oontongon, natua doman in toḻindap mita monia. Mosia in noguman kon koyow mita inta pinotaau monia in nouḻí monia nongkon i Tuhan Inta Totok in moḷantud, bokaka Akuoi in diábí nosingog kon i monia.

²⁹ Intau mita nooyúon monompobaḻik bo mogagow. Pomiaan monia ibo-ibog in intau bogá bo motayak kon kauntungan kon intau ango-angoi.

³⁰ Kon sigad in intau in Israel tua, tayakon-Ku in intau inta mokoposindog in dinding, andeka simindog kon tampat mita inta dindingnea ain noumpag sin moḷukad kon butá tatua aka Akuoi morimumudon kon tua popisí in torú-Ku; táe diá tobatúmai in intau in nouḻí-Ku.

³¹ Tuamai in tanaa pinobayá-Kudon in torú-Ku kon i monia, bo naonda bo tuḷú Akuoi in moyompat kon i monia popisí in aid monia. Akuoi ki Tuhan Inta Totok in moḷantud ain nosingog.”