YEHEZKIEL 21 - Alkitab Singog In Mongondow Masa In Tanaa

Kedang i Tuhan

¹ Ki Tuhan in noguman kon inakó, kai-Nia,

² “Ei intau ilo-ilow, kutukdon in Yerusalem. Kutukdon in tampat mita pooibadaan kon tua. Potoingatdon kon butá in Israel,

³ kon Akuoi, ki Tuhan, in noguman nanaa, ‘Akuoi naa in musungmu. Rabuton-Kubí in kedang-Ku bo moḻimod kon i monimu komintan, inta moraat andeka inta mopia.

⁴ Kedang-Ku in pakéon-Ku ponayow-Ku kon bayongan in intau nongkon utuan nodapot in toḷatan.

⁵ Dá kotaauandon in bayongan in intau kon Akuoi, ki Tuhan, in norabutdon kon kedang-Ku bo diábí motungkog bui.’

⁶ Ei intau ilo-ilow, karakdon bo pogamuidon kon tayowon in intau mita in Israel, naonda bo iko in kinodaitandon in gina bo kinobuḻian in kamang.

⁷ Aka ḻibóon monia mongo nongonu sin mogamuibí in iko, yo pogumandon kon morobonoḷ in ginamu popisí in habar inta moiduduimai. Habar tatua in mokoondok kon gina monia, moḷungkoyó in ḻima monia, duḷud monia mourot, modaitdon in ibog monia mobiag. Totuu kon wakutunea in moiangoidon, bo tua mita in mobaḻíbí. Akuoi ki Tuhan Inta Totok in moḷantud ain nosingog.”

⁸ Ki Tuhan in noguman kon inakó,

⁹ “Ei intau ilo-ilow, ponoḻindapdon! Potaaudon kon intau mita kon Akuoi, ki Tuhan in nogumandon nanaa, ‘Oyúon in kedang tobatú, kedang inta inatá bo iḷanitan.

¹⁰ Sia in iḷanitan sinbá mokopatoi, iriditan sinbá mopouḻi-uḻinag. Diádon in mokoḷunganga kon umat-Ku sin bayongan in tompoingat bo hukuman ain sinaḷáan monia.

¹¹ Kedang tatua in inatá sinbá umuran motaau pakéon bo inogoi kon moḷoḻimod tobatú.

¹² Ei intau ilo-ilow, pogamuidon bo pomaḷú! Sin kedang tatua in nosadiadon monayow kon umat-Ku. Itoi mita in Israel takin bayongan in bangusa tumbukonbí in kedang tatua modapot in matoi. Dá tokapdon in dodobmu takin robonoḷ,

¹³ sin koyogot-Ku tungkuḷan in umat-Ku, aka doí in mosia monompia kon dodianea, yo tua mita in mobaḻíbí kon i monia.’

¹⁴ Yo, intau ilo-ilow, ponoḻindapdon. Tokapdon in ḻimamu, saḷaku tomponuot kon kedang tatua in momangkoidon moḻimod. Kedang tatua in totokbí in mokoondok.

¹⁵ Binaḻínea in bangusa-Ku noinggamá in baraninea bo noḷabú noipintud. Inindoyó-Ku in kedang in kotá tatua inta mopouḻi-uḻinag naonda bo kilat, bo nosadiadon moḻimod.

¹⁶ Ei kedang inta moḷanit, bambingdon kon koḷanan bo kon koḷoigi, bo kon ondakabí in koibogmu.

¹⁷ Akuoi in monggoḷakapbí doman, bo moinggamádon in torú-Ku. Akuoi, ki Tuhan ain nosingog.”

Kedang i datu in Babel

¹⁸ Ki Tuhan in noguman kon inakó, kai-Nia,

^19-20 “Ei intau ilo-ilow, gambardon in daḷan doyowa inta motaau bayáan i datu in Babel inta kodia-dia in kedangnea. Daḷan doyowa tatua in musti pangkoion kon ḻipú tobatú tatua; daḷan tobatú in mopobayá ná Raba, kotá in Amon; bo inta tobatú in mopobayá ná Yerusalem, kotá inta oyúon in benteng kon Yohuda. Pais kon kayu in totundú in daḷan kon onda in poyotangaan.

²¹ Datu in Babel in sinimindog kon diug in dopí totundú in daḷan tatua. Sinbá kotaauannea mongo onda in daḷan inta bayáannea, dá nopoigum in sia kon totundú kon berhala mita, monguḻingkó kon bobong pinobonuan kon piot bo monaridi kon poat in mahaḷuk inta bagu pinokuruban.

²² Noniata magí dá piot inta kinogamáan in ḻimanea koḷanan pinaisan in Yerusalem! Dá mangaḻenea kon tua ki datu in musti monubu kon kotá in Yerusalem, mopobaḷú in kokow in parang bo mopotabá in tontaranea kon moposadia in pakakat mita podumpak, posindogon kon bonawang mita in Yerusalem, momontuyung kon butá baḻíon dinding pongopungan bo mongaḻi kon got mita.

²³ Intau mita in Yerusalem in diábí mopirisaya kon mosia in tubuon, sin mosia in nomiadon kon dodandian takin Babel. Táe toḻindap tanaa in mobogoi in tompoingat kon i monia kon mosia in domokonbí popisí in dosa mita monia.

²⁴ Akuoi, ki Tuhan Inta Totok in moḷantud in noguman kon i monia, ‘Dosamu mita kinotaauandon bo bayongan in intau in nokotaaudon kon kotaḷá in moiko. Aidmu moraat in koontongan kon bayongan in dodiamu. Tanaa in wakutuneadon hukumon in moiko bo ogoi-Ku in moiko kon musungmu.’

²⁵ Bo Akuoi in moguman kon i datu in Israel, ‘Ei datu inta moraat bo binaradosa! Pohukuman imbuitnea kon inimu in nodiugdon.

²⁶ Akuoi, ki Tuhan Inta Totok in moḷantud ain nosingog. Ḷuatdon in mahkotamu bo bukádon in bogot in uḷumu. Tanaa, nobaḷuidon in kaadaan. Sintakdon in ḷoḻitúan in intau bogá bo ogoiaidon in mosia in kawasa! Poponagdon in mongongawasa nongkon ḷoḻitúannea!

²⁷ Kotá tanaa in rimumudon-Kudon komintan, dá kon ondaka oyúonbí in apug. Táe tua in mobaḻí aka intau inta piniḻí-Ku sin mohukum kon kotá tanaa in moiangoidon. Sia tuata in pobogoian-Ku kon kotá tanaa.’ ”

Kedang bo intau in Amon

²⁸ “Ei intau ilo-ilow, ponoḻindapdon! Potaaudon kon intau in Amon inta ain noningkuḻe kon Israel, kon Akuoi, ki Tuhan Inta Totok in moḷantud in noguman, ‘Kedang tobatú ain sinadia poḻimod, kedang tatua in inatádon nopouḻi-uḻinag naonda bo kilat, sinbá motaaudon poḻimod.

²⁹ Oontongon inta inontong monimu in diábí totuu oontongon, bo toḻindap inta siningog monimu in diá doman totuu bo uboḷ. Moiko in moraat bo binaradosa, bo wakutu pohukuman kon inimu pangabisan in nodiugdon. Kedang tatua in momongkóbí kon sigogowmu.

³⁰ Ei intau in Amon, tungkogdon bui in kedangmu! Moiko in sisigan-Kubí kon tampat pinomaḻían kon i monimu bo pinononggadían.

³¹ Popotugat-Kubí kon i monimu in torú-Ku inta modoko-dokot. Bo moiko in ogoi-Kubí kon intau mita inta moḻingá inta nobiasadon moḻimod.

³² Moiko in modaitbí kaanon in tuḷú. Dugúmu in moibutakbí kon butámu tontaní, bo diábí in tobatúmai in intau in mokotoropa kon inimu. Akuoi ki Tuhan ain nosingog.’ ”