YEHEZKIEL 20 - Alkitab Singog In Mongondow Masa In Tanaa

Ibog i Allah bo aid moraat in intau

¹ Kon singgai impuḷúnea kon buḷan noginḻima, kon taong impitunea kon pinoḷumbúan kon inami, tongonumai in itoi in Israel namangoi kon inakó sin mopoigum kon topotundú i Tuhan. Naonda in mosia iḻimitú kon tayowonku,

² dinongogku in ki Tuhan noguman kon inakó,

³ “Ei intau ilo-ilow, poyosingogdon in itoi mita tatua bo poguman kon Akuoi, ki Tuhan Inta Totok in moḷantud in noguman nanaa, ‘Mokobaḻíbí totok in moiko in moigum kon topotundú-Ku! Podoyon kon i-Nakó, ki Allah inta nobiag, doíbí in Akuoi poigumanmu kon topotundú! Akuoi, ki Tuhan Inta Totok in moḷantud ain nosingog.’

⁴ Ei intau ilo-ilow, nosadiadon degá in iko in monisig kon i monia? Yo, aidaidon! Potoropdon kon i monia in bayongan aid mokorongó inta ain inaidan in mogoguyang monia.

⁵ Poyaputdon in onu inta pinoguman-Ku tanaa. Akuoi in nomiḻídon kon Israel bo nongibotdon kon i monia. Kon Mesir, Akuoi in nokipogontong kon i monia poḷat noguman, ‘Akuoi naa in ki Tuhan Allahmu.’

⁶ Kon dodai intua Akuoi in mongibot kon modia kon i monia ḷumuai nongkon Mesir bo mayá in butá inta piniḻí-Ku ogoi kon i monia. Butá tatua in nooyúon bo noḷumbá, butá inta totok in mopia kon sinangkub in dunia.

⁷ Pinoki ḷumbú-Ku kon i monia in patong mita mokorongó inta kinoibog monia tua, bo inimaḷowan-Ku in mosia in moponajis in awak monia pongin mosumba kon berhala mita kon Mesir, sin Akuoibí naa in ki Tuhan Allah monia.

⁸ Táe mosia in noḷawang kon i-Nakó bo doí nokidongog kon i-Nakó. Mosia in doíbí noḷumbú kon patong mita inta mokorongó tatua bo diá doman moibog in mogogai in mosumba kon berhala mita in Mesir. Kon tungkuḷ in mosia kon tuapa, Akuoi in nosadiadon kon mopoḷuai in torú-Ku kon i monia.

⁹ Táe diábí inaidan-Ku intua, sinbá tangoi-Ku in diá singkuḻeon in bangusa mita inta kon pinogutunan monia. Sin kon tayowon in bangusa mita tatua, Akuoi in nopotaaudon kon bangusa Israel in diaan-Kudon ḷumuai nongkon Mesir.

¹⁰ Bo dinia-Ku in mosia iḻumuai nongkon Mesir bo nopobayá in rawang in bungaion.

¹¹ Kon tua inogoi-Ku kon i monia in parenta-Ku mita bo sinundú-Ku in hukum-Ku mita inta musti duduian monia, sin intau inta dumudui kon tua in umuranbí mobiag.

¹² Pinotabá-Ku in mosia mohoromat kon singgai in Sabat nobaḻí tomponuot kon dodandian-Ku takin i monia, sin moponorop kon i monia kon Akuoi ki Tuhan, ain nopotondí kon i monia mobaḻí kapunyaan-Ku.

¹³ Táe kon rawang in bungaion doman tatua noḷawang in mosia kon i-Nakó. Mosia in iḻimimpat kon parenta-Ku mita, bo nondoí kon hukum-Ku mita inta nopodandi kon intau mita inta umuran dumudui kon tua in mobiagbí. Mosia in totokbí in noporaa-raatmai kon singgai in Sabat. Tuamai, kon rawang in bungaion tatua nosadiadon in Akuoi mopoḷuai in torú-Ku kon i monia bo moyopú kon i monia.

¹⁴ Táe diábí inaidan-Ku intua popisí in moḷukad kon tangoi-Ku, sinbá tangoi-Ku diá singkuḻeon in bangusa mita inta nokoontong kon i-Nakó nodia kon Israel iḻumuai nongkon Mesir.

¹⁵ Kon rawang in bungaion doman tatua Akuoi nonindoyó kon bangusa in Israel in diábí diaan-Ku tumuot kon butá inta ain sinadia kon i monia, butá inta nooyúon bo noḷumbá bo inta totok in mopia kon sinangkub in dunia.

¹⁶ Indoyó-Ku tatua in siningog-Ku popisí in mosia nonaḷámai kon parenta-Ku mita, iḻimimpat kon hukum-Ku mita bo noponajis kon singgai in Sabat. Mosia in moibo-ibogbí in mosumba kon berhala mita monia.

¹⁷ Táe onda intua notabi in Akuoi kon i monia, dá diá nobaḻí iḻimod-Ku kon rawang in bungaion tatua.

¹⁸ Noyoḻiudon kon tua tayowmobiag mita kon sigad monia, sinongginaan-Ku nanaa, ‘Dika dumudui kon atorang mita inta pinomia in mogoguyangmu. Dika dumayan kon kabiasaan monia bo dika doman moponajis in awakmu pongin mosumba kon berhala mita monia.

¹⁹ Akuoibí in ki Tuhan Allahmu. Duduiaidon in hukum mita bo parenta-Ku mita.

²⁰ Horomatbí in singgai in Sabat sinbá mobaḻí tomponuot dodandian kon sigad-Ku bo i monimu, sin moponorop kon i monimu kon Akuoibí in ki Tuhan Allahmu.’

²¹ Táe tayowmobiag mita tatua in doí doman nokidongogmai kon i-Nakó. Iḻimimpat in mosia kon hukum-Ku mita bo nonaḷámai kon parenta-Ku mita, inta nopodandi kon intau inta dumudui kon tua in umuranbí mobiag. Mosia in noporaa-raatmaidon kon singgai in Sabat. Tuamai in nosadiadon in Akuoi mopoḷuai in torú-Ku kon i monia kon rawang in bungaion tatua bo moḻimod kon i monia komintan.

²² Táe Akuoi in diábí nogaid kon tua sinbá tangoi-Ku in diá singkuḻeon in bangusa mita inta nokoontong kon i-Nakó nodia kon Israel iḻumuai nongkon Mesir.

²³ Kon rawang in bungaion doman tatua nongibot in Akuoi kon porariton-Kubí in mosia kon sinangkub in dunia,

²⁴ popisí in nonaḷádon in mosia kon parenta-Ku mita, iḻimimpat kon hukum-Ku mita, noponajis in singgai in Sabat bo umuran nosumba kon dewa mita inta sinumba in mogoguyang monia.

²⁵ Onda intua inogoi-Ku kon i monia in hukum mita inta diá mopia bo parenta mita inta diá mokobiag.

²⁶ Pinomayá-Ku in mosia in noponajis in awak pinongin kuruban mita monia tontaní, nodapot in ki adí mita monia ḷoḷaki inta guya-guyang pinokuruban monia. Pinongin aid tatua Akuoi nohukum kon i monia sinbá kotaauan monia kon Akuoibí in ki Tuhan.

²⁷ Yo, intau ilo-ilow, potaaudon kon intau in Israel, onu inta poguman-Ku, ki Tuhan Inta Totok in moḷantud kon i monia: naa in sonto ibanea inta mopoontong kon naonda in mogoguyangmu noningkuḻe kon i-Nakó bo diá motoindudui kon i-Nakó.

²⁸ Dinia-Ku in mosia minayá in butá inta ain pinodandi-Ku kon i monia. Kon tungkuḷ in mosia nokoontong kon tombuḷud mita inta moḷantud bo pangkoi mita in kayu inta mobambar, mosia in mobogoi in sosumba kon tampat mita tatua. Mosia in nokopomuká kon torú-Ku popisí in kuruban mita payongon bo sosumba mita anggur monia.

²⁹ Akuoi in noḻibó kon i monia, ‘Tampat mita moḷantud onu inta binayáan monimu tatua?’ Dá pinangkoi kon dodai intua tampat mita tatua sinangoian ‘Tampat mita moḷantud’.

³⁰ Dá potaaudon kon intau in Israel in onu inta pinotaau-Ku kon i monia, Akuoi ki Tuhan Inta totok in moḷantud. ‘Nongonu sin moiko in nomiabí kon dosa mita ná inta pinomia in mogoguyangmu? Ná mosia, moiko in dinumudui doman kon berhala mita inta mokorongó tua.

³¹ Nodapot in singgai in naa moiko in noponajis in awak pinongin nodia kon sosumba bo notubá kon i adímu mita nobaḻí kuruban kon berhala mita. Bo mokobaḻípa doman in moiko in mopoigum in topotundú nongkon i-Nakó? Podoyon kon i-Nakó, ki Allah inta nobiag, ki Tuhan Inta Totok in moḷantud, moiko in diábí ogoi-Ku in mopoigum in topotundú nongkon i-Nakó.

³² Moiko in moibog tumongkai kon bangusa mita ibanea bo intau mita inta nogutun kon butá mita ibanea inta nosumba kon pangkoi in kayu bo batu. Táe ibogmu tua in diábí kodapotan.’ ”

Ki Allah in mohukum bo mongampung

^33-34 “Podoyon kon i-Nakó, ki Allah inta nobiag, ki Tuhan Inta Totok in moḷantud, moiko in ogoian-Ku in tompoingat kon moiko in popisí in torú-Ku, dá moiko in parentaan-Ku kotogaton bo korotonon dá konanamandon monimu in kawasa-Ku. Moiko in sipunon-Kubí bo diaan bui nongkon sinangkub in butá inta pinoporaritan kon i monimu.

³⁵ Bo moiko in diaan-Ku mayá in ‘Rawang in bangusa mita’. Kon tua sisigan-Ku in moiko moyogintayow mako,

³⁶ ná inta ain inaidan-Ku kon mogoguyangmu kon Rawang in Sinai. Akuoi ki Tuhan Inta Totok in Moḷantud ain nosingog.

³⁷ Motogatbí in pogogaid-Ku kon i monimu sinbá tumoḷutui kon dodandian-Ku.

³⁸ Momomarontak mita bo intau moraat in ḷumbúon-Ku nongkon yuakmu mita. Mosia in diaan-Kubí ḷumuai nongkon butá mita inta pinogutunan monia tanaa bo diábí ogoi-Ku in mosia mobui mangoi kon butá in Israel. Dá kotaauandon monimu kon Akuoibí in ki Tuhan.”

³⁹ Ki Tuhan Inta Totok in moḷantud in noguman, “Ei intau mita in Israel, tanaa in taaudon kon inimu. Kumudungdon in mogaid kon dosa pongin mosumba kon berhalamu mita! Táe toropdon kon naonda in mopaḷut mako kon tua moiko in mustibí tumoḷutui kon i-Nakó bo diádon moporaa-raatmai kon tangoi-Ku inta motusi pongin modia kon sosumba kon berhalamu mita tatua.

⁴⁰ Sin kon butá in Israel, kon tudu totok in buḷud-Ku inta motusi, moiko komintan, bangusa in Israel in mosumbabí kon i-Nakó. Kon tua mosanangbí in gina-Ku kon inimu bo moibog motarima kon kurubanmu mita, sosumbamu mita inta totok in mopia bo oogoimu mita inta ain sinantú.

⁴¹ Naonda in moiko diaan-Ku ḷumuai nongkon butá mita inta pinoporaritan kon i monimu, sipunon-Ku in moiko bo motarima kon bayongan in kuruban payongonmu. Dá kotaauandon in bayongan in bangusa kon Akuoi naa in ki Allah inta Totok in mokudus.

⁴² Aka moiko bo diaan-Kudon mobui kon butá in Israel, butá inta pinodandi-Ku kon mogoguyangmu, yo kotaauandon monimu kon Akuoibí in ki Tuhan.

⁴³ Kon tua kotoropandon monimu in bayongan in oaid inta mokorongó inta ain nokonajis kon awakmu. Dá morongódon in moiko in mokotorop kon bayongan inta nobaḻí tatua.

⁴⁴ Aka moiko pomiaan-Kudon natua popisí in tangoi-Ku, bo deemanbí pinodoyon kon dodiamu inta diá mopia bo aidmu inta moraat, dá kotaauandon monimu intau in Israel kon Akuoibí in ki Tuhan. Akuoi ki Tuhan Inta Totok in moḷantud ain nosingog.”

Tuḷú kon dotá in toḷatan

⁴⁵ Ki Tuhan in noguman kon inakó, nanaa,

⁴⁶ “Ei intau ilo-ilow, indoidon kon dotá in toḷatan. Toboḷowdon in butá in toḷatan, torúaidon in kayuon kon tua.

⁴⁷ Potabádon in kayuon tatua mokidongog kon onu in poguman-Ku ki Tuhan Inta Totok in moḷantud kon inia, ‘Indongogaidon! Poyongkiton-Kubí in tuḷú inta momokak modait kon bayongan in pangkoi in kayu inta oyúon kon inimu, pinomayá inta ain noḷaḷow andeka inta nobiagpa. Tuḷú inta nodokot tua in diábí kopiongan. Sia in ḷumekepbí nongkon toḷatan mopobayá ná utuan, bo bayongan in intau in mokorasabí kon patúnea.

⁴⁸ Kotaauandon monia kon Akuoi, ki Tuhan ain nopoyongkit in tuḷú tatua, bo diábí tobatúmai in intau in mokopiong.’ ”

⁴⁹ Táe akuoi ki Yehezkiel nomayow poḷat moguman, “Tuhan Inta Totok in moḷantud, dika potabá in akuoi moguman kon tua! Bayongan in intau ain nogamui sin akuoi in moibog mosingog pongin tangkí dá mororiga komangaḻean.”