YEHEZKIEL 2 - Alkitab Singog In Mongondow Masa In Tanaa

¹ noguman, “Ei intau inta ilo-ilow, sindogdon. Akuoi in moibog moyosingogmu.”

² Kon dodai in singog tatua kinodongoganku, sinumuotdon in Roho i Allah kon inakó, bo pinosindognea in akuoi. Onda intua kinodongoganku bui in singog tatua noguman,

³ “Ei intau inta ilo-ilow, iko in potabáku mayá kon intau mita in Israel inta nomarontak moḷawang kon i-Nakó. Mosia tua in momomarontak ná doman mogoguyang monia.

⁴ Mosia in pamandot bo diá mohoromat kon i-Nakó. Iko in potabá-Ku mayá kon i monia mopotaau kon onu inta bain potaau-Ku, Tuhan Inta Totok in moḷantud kon i monia,

⁵ indongogan monia andeka diá; naabí in inta totok in moponting, musti kotaauan monia kon oyúon in nabi kon yua-yuak monia.

⁶ Táe iko, ei intau inta ilo-ilow, dikabí moondok kon momomarontak mita tatua, andeka kon onukadon in singogon monia. Mosia in monayowbí bo moningkuḻe kon inimu, modapot in iko in naonda bo nobiag kon yua-yuak in bambau. Umpaka natua, yo dikabí moondok.

⁷ Potaaubí in bayongan in koyow-Ku kon i monia, pinomayá moibog in mosia mokidongog andeka doí. Toropdon kon mosia tua in momomarontak mita.

⁸ Ei intau inta ilo-ilow; indongogai in onu inta pinoguman-Ku kon inimu. Dika doman tumakin momarontak. Bukádon in bibigmu bo kaandon in onu inta inogoi-Ku kon inimu.”

⁹ Onda intua inontongku in ḻima inta noituntun kon inakó. Kon ḻima tatua oyúon in ḻitodan in buk,

¹⁰ inta pinaisan kon posiḷosi. Bo binukánea in ḻitodan tatua bo kon tua noipais in ombaḷ, amui bo ongot.