YEHEZKIEL 19 - Alkitab Singog In Mongondow Masa In Tanaa

Dondong oamui

¹ Ki Allah in nokipodondong kon inakó in dondong oamui tanaa kon i adí ḷoḷaki i datu in Israel taya dua:

² Ki inámu in naonda bo singa kobaayan inta motoyang bo diá in poḻiuan. Sia in nomiag kon i adínea mita kon yua-yuak in singa mita inta mongotorindog.

³ Ki adínea tobatú in dinidiknea bo sinundúnea motayak kon kokaanon. Dá nobaḻídon in sia singa inta noḷoben mododomok bo mokokaan kon intau.

⁴ Bangusa mita inta nokodongog kon soaḷ sia in moyosipun sin modomok kon inia. Sia in kinoakaḷan dá noibonu kon bubú bo dinakop, bo pinogambat kon Mesir takin kokaud.

⁵ Diádon in mangaḻe in pinogoḷatan mako i inánea; bo kinotaauanneadon kon diádon in kamangnea. Dá ki adínea ibanea in ilatihnea nobaḻí singa inta morogi bo motorindog.

⁶ Ki adí in singa tatua nobaḻídon noḷoben bo noyobayat in singa mita ibanea. Nobalajar in sia notayak kon kokaanon, bo nobaḻídon mokokaan doman kon intau.

⁷ Dinding mita dinangatannea, kotá mita pinoguyaatnea. Bayongan intau kon dunia noondokdon in nokodongog kon ganggornea inta moḷangon.

⁸ Táe bangusa mita nongkon butá inta noyoḻibumai noḷongasi nodomok nongkon bayongan in tampat. Binuká monia in pukot sin podomok kon inia, bo noibaaḷ domandon in sia kon pukot monia.

⁹ Pinobonu in sia kon ḷantung in singa bodongka dinia kon butá in Babel, pinotayow kon i datu. Totok in iḷukadan in sia sinbá ganggornea diádon kodongogan bui kon tudu in tombuḷud mita in Israel inta moḷantud.

¹⁰ Ki inámu in naonda bo pangkoi in anggur inta moḷumbá inta nobiag kon gobá kon diug in tapá. Nobaḻí in sia nobambar bo nomungai sin tubig kon tua mobarong totok.

¹¹ Tanganea in noropot, diábí motaau tongá putoḷon mako natua mopia pomiaan tungkud in dodatuan. Ḷuntungnea moḷantud mosindog moigawad in goḷom mita. Sia in kinoibog in bayongan intau sin noḷantud in sia bo daunnea in nobambar.

¹² Táe sia irabut in ḻima mita inta irumogi, onda intua pinogonag kon butá. Tompot in pomukaan nogirup, nogingkag kon bungainea inta mopia. Tanganea noputoḷ, noingkag bo sinurub.

¹³ Tanaa in pinomuḷadon in sia kon rawang in bungaion, kon butá noingkag bo diá kotubig.

¹⁴ Pangkoi in anggur tua iḻeḻep in tuḷú; tanga bo bungainea nodait kinaan in tuḷú. Diádon in ropot in tanganea nointok; diádon motaau pomiaan tungkud in dodatuan. Tuata in oamui inta bui-buionmai in umat podondong.