YEHEZKIEL 18 - Alkitab Singog In Mongondow Masa In Tanaa

¹ Ki Tuhan in noguman kon inakó

² “Nongonu sin singog tango-tangoion tanaa in tantúbí kotango-tangoian kon butá in Israel? ‘Guyanga in mokaan kon bungai in anggur inta boil táe ingiponbí in mongoadí mita in monilu.’

³ Podoyon kon i-Nakó ki Allah inta nobiag, ki Tuhan Inta Totok in moḷantud, singog tango-tangoion tatua in diá bidon bui kotangoian kon Israel.

⁴ Nyawa in batúan intau in Akuoibí in kitogi, pinomayá nyawa in guyanga andeka nyawa i adínea. Intau inta baradosa siabí in matoi.

⁵ Aka oyúon in intau inta mopia, motuḻid bo mojujur.

⁶ Sia in diá nosumba kon berhala in intau Israel andeka nokaan kon kuruban inta pinosumba kon tampat mita pososumbaan kon dewa mita. Sia in diábí kon dodai in onda in nodondouḷug kon i buḷoi in intau ibanea andeka nosiug takin bobay inta inangoinea.

⁷ Sia in diábí kon dodai in onda in nonombuḻitok andeka nogagow. Pakakat mita inta nobaḻí tontogot in boboḻian kon inia umuranbí pobuionnea. Intau inta ginogoi inogoiannea in kaanon bo intau inta diá koḷambung inogoiannea in ḷambung.

⁸ Diábí kon dodai in onda in sia in mopoḷuan bo moigum kon rentenea. Sia in doíbí momia kon inta moraat bo pomuḷoi in oyúon rogenggeng toḻisíonneabí kopiaan.

⁹ Sia in dinumuduibí kon parenta-Ku bo motoḷutui kon hukum-Ku mita. Intaubí mojujur natua in mobiag. Akuoi, ki Tuhan Inta Totok in moḷantud ain nosingog.

¹⁰ Táe aka kuma bo intau tatua kogadí kon adí inta moibog mogagow, moḻimod, bo momia mobarong in aid moraat ibanea

¹¹ inta diá kon dodai in onda in pinomia i amánea. Nokaan in sia kon kuruban sosumba kon tampat mita pososumbaan kon dewa mita. Sia in nodondouḷug poḷat nosiug noyotakin i buḷoi in intau ibanea.

¹² Sia in monombuḻitokmai kon intau bogá, mogagow, mogamá kon pakakat mita inta nobaḻí tontogot in boboḻian kon inia. Sia in mayá kon kuil mita in intau inta diá nonotaau kon i Tuhan bo nosumba kon berhala inta mokorongó.

¹³ Sia in mopoḷuan bo moigum kon rente. Yo degá mobiag in intau natua? Diá! Sia in nomiadon kon bayongan in oaid inta mokorongó tua, bo sia in matoibí! Sia in matoi popisíbí in aidnea tontaní.

¹⁴ Aka kuma bo intau inta nomia kon mobayong in aid inta moraat tua in kogadí, bo inontong in adí tatua in bayongan in aid i amánea, táe diábí dinayanannea.

¹⁵ Doíbí in adí tatua mosumba kon berhala in intau in Israel, andeka mokaan kon kuruban sosumba kon tampat mita pososumbaan kon dewa mita. Sia in diábí kon dodai in onda in nodondouḷug kon i buḷoi in intau,

¹⁶ andeka nondorot andeka nogagow kon i inekadon. Pakakat mita in intau inta nobaḻí tontogot kon boboḻian kon inia umuranneabí pobuion. Intau inta ginogoi ogoiannea in kaanon bo intau inta diá koḷambung inogoiannea in ḷambung.

¹⁷ Diábí kon dodai in onda in sia in mogaid kon moraat andeka mopoḷuan takin rente. Sia in motoḷutui kon hukum-Ku mita bo dumudui kon parenta-Ku. Yo adí tatua in mobiagbí diábí matoi popisí in dosa mita i amánea.

¹⁸ Noyoḻiudon kon tua ki amánea inta moibog monombuḻitok bo mogagow bo momia kon inta moraat ibanea, in matoibí popisí in dosa mita inta pinomianea tontaní.

¹⁹ Táe oyúon degá in moḻibó mongo nongonu sin adí tatua in diábí moitakin mobaba kon bungai in dosa mita i amánea. Naa in tubagnea: popisí in adí tatua mopia bo mojujur. Sia in motoḷutui kon hukum-Ku mita bo motoindudui in pogogaidnea, tuamai in umuran nobiag in sia.

²⁰ Intau inta nomia kon dosa, siabí in matoi. Adí in diábí umuran mobaba kon bungai in aid moitaḷá i amánea; ná doman tua amá in diábí doman mobaba kon bungai in dosa mita i adínea. Intau mopia in mokouḻíbí kon tontuḻí inta mopia popisí in aidnea inta mopia. Bo intau moraat in motarimabí doman kon roriga popisí in aidnea inta moraat.

²¹ Aka intau moraat bo diádon bui nomia kon dosa, bo nomangkoidon dinumudui kon hukum-Ku mita, poḷat mogaid kon inta mopia bo moitutui, yo diábí in sia matoi.

²² Bayongan in dosanea in ampunganbí; mobiagbí in sia, sin nogaid kon inta moitutui.

²³ Degá iraimumai kon Akuoi, ki Tuhan Inta Totok in moḷantud in mosanangbí aka intau moraat bo matoi? Totokbí in diá! Ibogon-Ku in bá taḷaanneabímai in bayongan in dosa sinbá tantú mobiag in sia.

²⁴ Táe aka intau mopia bo diádon mogaid kon inta mopia, modapotbí in momangkoidon momia kon inta moraat bo bayongan in aid inta mokorongó inta biasamai aidan in intau moraat, yo degá umuran in sia mobiag? Diá! Nongkon bayongan in aidnea inta mopia yo diá bidon tobatúmai in toropon bui. Sia in matoibí popisí in nogaidon kon dosa bo diá motoindudui kon i-Nakó.

²⁵ Degá oyúon in moguman nanaa, ‘Noitaḷádon in aid i Tuhan.’ Indongogaidon, ei intau in Israel! Degá noitaḷá in inta inaidan-Ku? Moikobí in noitaḷá.

²⁶ Aka intau mopia bo diádon momia kon inta mopia, modapot in momangkoidon mogaid kon inta moraat, matoibí in sia, popisí in aid moraat inta ain pinomianea.

²⁷ Táe, aka intau moraat inta diádon nomia kon dosa bo nomangkoidon nomia kon inta moitutui bo mopia, yo mosaḷamatbí in nyawanea.

²⁸ Nosadardon in sia kon bayongan inta pinomianea bo nogogaidon in nogaid kon dosa. Yo sia tua in diábí matoi táe umuranbí mobiag.

²⁹ Bo moiko, ei intau in Israel, moiko in moguman kon aid i Tuhan tua in noitaḷá. Totuu degá kon noitaḷá in aid-Ku, ei Israel? Diá! Moikobí in noitaḷá!”

³⁰ Ki Tuhan Inta Totok in moḷantud, in noguman, “Ei intau mita in Israel, Akuoi in monisigbí kon bayongan in intau podudui in aidnea tontaní. Pogogaidon in mogaid kon dosamu mita. Dika pomayámu mako in dosamu momoguyaat kon awakmu.

³¹ Gogaiaidon in bayongan inta moraat inta inaidan monimu bo pomayádon mako in gina bo raianmu motomobagu. Nongonu sin moiko in mustibí matoi?

³² Diábí mopia in gina-Ku aka intau tobatú matoi. Taḷaaidon in dosamu mita sinbá umuran mobiag in moiko. Akuoi ki Tuhan Inta Totok in moḷantud ain nosingog.”