YEHEZKIEL 15 - Alkitab Singog In Mongondow Masa In Tanaa

Poumpamaan pangkoi in anggur

¹ Ki Tuhan in noguman kon inakó,

² “Ei intau ilo-ilow, onu in noiḻiu kon pangkoi in anggur nongkon kayu ibanea kon kayuon? Onu in noiḷontú kon pangkoi in anggur nongkon pangkoi mita in kayu mita kon kayuon?

³ Motaau degá in pangkoinea aidan onuka? Motaau degá aidan pototadangan kon pakakat?

⁴ Diábí in baragunanea koḻikudbí in pondungú. Bo aka mopokakdon in posipongkó, bo kon yuaknea in mobaḻídon buing, oyúonpa degá in baragunanea?

⁵ Diá bidon! Nodapotbí in kon dodai in diápa sinubá, yo diá bidon motaau pakéon. Apa doman aka tubáandon bo kinaandon in tuḷú!”

⁶ Tuamai ki Tuhan Inta Totok in moḷantud noguman, “Naonda bo pangkoi in anggur inta ginamá nongkon kayuon bo sinubá natua doman in pogogaid-Ku kon intau in Yerusalem!

⁷ Hukumon-Kubí in mosia. Umpakabí noiḷaguidon in mosia kon tuḷú, táe tuḷúbí doman in momutú kon i monia. Dá kotaauandon monimu kon Akuoibí in ki Tuhan.

⁸ Mosia in diábí motoindudui kon i-Nakó, tuamai, butá tatua in baḻíon-Ku moingongow. Akuoi ki Tuhan Inta Totok in moḷantud ain nosingog.”