YEHEZKIEL 14 - Alkitab Singog In Mongondow Masa In Tanaa

Ki Allah nohukum kon mososumba mita kon berhala

¹ Tongonumai in intau nongkon itoi mita in bangusa in Israel namangoi kon inakó sin moḻibó kon onu in ibog i Tuhan.

² Bo nogumandon in ki Tuhan kon inakó,

³ “Ei intau inta ilo-ilow, intau mita tanaa in noposarakandon in awaknea mita kon berhala nodapot in mosia in irumobudon kon dosa. Yo umpaka dá moibog in Akuoi poḻibóan monia?

⁴ Tuamai, potaaudon kon i monia kon Akuoi, ki Tuhan Inta Totok in moḷantud nongoyow nanaa, ‘Bayongan in intau in Israel inta ain noposarakan in awaknea kon berhala bo nopomayádon mako in awaknea noirobu kon dosa, bodongka mamangoi sin mopoigum in tonggina kon nabi tobatú, yo tubagan-Kubí tontaní in tubag inta patus potubag kon berhalanea mita inta nobayong tua!

⁵ Komintan berhala tatua in nokopopisídon kon umat-Ku iyumayú kon i-Nakó, táe igumon mako pongin tubag-Ku tatua umat-Ku in mobuidon mangoi kon i-Nakó.’

⁶ Potaaudon doman kon intau in Israel kon Akuoi, ki Tuhan Inta Totok in moḷantud in noguman kon i monia, ‘Potobatdon nongkon dosamu mita, bo taḷaaidon in berhalamu mita inta mokototuka tatua.’

⁷ Pomuḷoi in intau in Israel andeka intau ango-angoi inta nogutun kon sigad in bangusa in Israel, inta iyumayú kon i-Nakó bo noposarakan in awaknea kon berhala, bodongka mopoigum in tonggina kon nabi tobatú, yo tubagan-Kubí tontaní.

⁸ Akuoi in moḷawangbí kon inia bo baḻíon-Ku in sia sonto kon ibanea. Poyayúon-Kubí in sia nongkon intau mita umat-Ku, dá kotaauandon in umat-Ku kon Akuoibí in ki Tuhan.

⁹ Aka nabi tobatú bo inuboḷandon dá nobogoidon in tubag noitaḷá, yo Akuoibí in inta ain nonguboḷ kon inia. Akuoi ki Tuhan Inta Totok in moḷantud in nopoyayúdon kon inia nongkon intau mita in Israel.

¹⁰ Pinomayá nabi tatua andeka mosia inta nopoigum in tongginanea, in mokouḻíbí kon hukuman inta motongkai.

¹¹ Tua mita in pomiaan-Ku sinbá intau in Israel dikadon yumayú kon i-Nakó bo dika doman moponajis in awak in dosa. Pongin natua mosia in mobaḻídon umat-Ku, bo Akuoi in mobaḻí Allah monia.” Akuoi, ki Tuhan Inta Totok in moḷantud ain nosingog.

Ki Nuh, ki Daniel bo ki Ayub

¹² Ki Tuhan in noguman kon inakó, “Ei intau inta ilo-ilow,

¹³ aka ḻipú tobatú baradosaan bo diá motoindudui kon i-Nakó, yo hukumon-Kubí in ḻipú tatua. Rimumudon-Kubí in tongkaaḷ in kaanonnea, mopoangoi in malarat in kaanon bo moḻimod pinomayá intau andeka bobiagon.

¹⁴ Umpakabí in ki Nuh, ki Daniel bo ki Ayub in nogutun kon tampat tatua, dá kopopia i nayatoḷu in tongábí mokosaḷamat kon awak monia tontaní. Akuoi, ki Tuhan Inta Totok in moḷantud ain nosingog.

¹⁵ Dika-dika poangoi-Ku in mahaḷuk moraat sin modomok kon intau mita kon butá tatua, dá butá tatua in totokdon in mokoanib bo diádon tobatúmai in intau in mokobaḻí tumaḻib kon tua.

¹⁶ Umpakabí ki Nuh, ki Daniel bo ki Ayub nogutun kon tua, dá pinodoyon kon i-Nakó, ki Allah inta nobiag, ki Tuhan Inta Totok in moḷantud, yo mosia in diábí mokoposaḷamat kon i inekabí, nodapot in ki adí mita monia yo diábí doman. Tongábí mosia tontaní in mosaḷamat, bo butá tatua in mobaḻí moḷogat.

¹⁷ Dika-dika popoangoi-Ku in parang kon butá tatua, bo popoangoi-Ku in ḷoḷutam mita inta motoyang sin moyopú kon intau bo mahaḷuk.

¹⁸ Bo umpakabí taya toḷu koina nogutun kon tua, dá podoyon kon i-Nakó, ki Allah inta nobiag, Tuhan Inta Totok in moḷantud, mosia in diábí mokoposaḷamat kon i ineka, nodapot in kon i adí mita monia. Tongábí mosia tontaní in mosaḷamat.

¹⁹ Dika-dika popoangoi-Ku in yampoi in takit kon butá tatua, bo pobuká-Ku in torú-Ku kon inia modapot in intau andeka mahaḷuk yo moyopú.

²⁰ Bo umpaka ki Nuh, ki Daniel bo ki Ayub nogutun kon tua, dá podoyon kon i-Nakó, ki Allah inta nobiag, Tuhan Inta Totok in moḷantud, mosia in diábí mokoposaḷamat kon i ineka, nodapotbí in kon i adí mita monia. Tongábí mosia tontaní in mosaḷamat popisí in aid monia inta mopia.”

²¹ Ki Tuhan Inta Totok in moḷantud in noguman, “Akuoi in mopoḷabú in opat in hukuman-Ku inta totok in motoyang kon Yerusalem sin moyopú kon intau andeka mahaḷuk. Naa in hukuman mita tatua: parang, malarat in kaanon, mahaḷuk moraat bo yampoi in takit.

²² Aka kuma bo oyúon in mokoḷagui bo moposaḷamat kon i adínea mita, taridiaidon in mosia aka mosia mamangoi kon inimu. Indoiai naonda in moraat monia, dá kotaauandon monimu kon noitugatbí in aid-Ku mohukum kon Yerusalem.

²³ Bo komangaḻeandon monimu kon bayongan in aid-Ku tua in oyúonbí in kinodoyonannea. Akuoi ki Tuhan Inta Totok in moḷantud ain nosingog.”