YEHEZKIEL 12 - Alkitab Singog In Mongondow Masa In Tanaa

Ki Nabi Yehezkiel nongunsí

¹ Ki Tuhan in noguman bui kon inakó, kai-Nia,

² “Ei intau inta ilo-ilow, iko in nogutun kon yua-yuak in intau momomarontak. Mosia tua in komata, táe diá moindoi; kobongoḷan, táe diá mokidongog, popisí in moibog in mosia momarontak.

^3-6 Tuamai, ei intau inta ilo-ilow, kon wakutu in mobayagpa, dá touḷutdon in pakakatmu mita bakut ná biasamai aidan in intau mita inta iḷumbú. Kon dodai in diápa modoḷom taḷaaidon in baḷoimu koonto-ontong in intau ná intau mita inta diaan kon poḷumbúan. Ḷombangaidon in baḷoimu koonto-ontong in intau mita momomarontak tatua, bo diádon in binantaḷ in pakakatmu bo ḷuaidon pongin bubú tatua. Potaandon in binantaḷ tatua. Pobuatdon kon wakutu in doḷom; bilogdon in matamu dá diádon ontongonmu in daḷan inta bayáanmu. Pomayádon mako in bayongan in bangusa in Israel mokoontong kon bayongan inta inaidanmu tatua, sinbá mobaḻí tompoingat kon i monia. Dika-dika bo kotaauandon monia kon mosia tua in momomarontak.”

⁷ Bo inaidankudon onu in pinoki aid i Tuhan kon inakó. Kon singgai doman tatua, kon dodai in nobayagpa, sinouḷutkudon in pakakatku mita bo binantaḷ ná biasamai aidan in intau mita inta iḷumbú. Kon dodai in moungkoḷomdon, iḷombanganku in dinding in baḷoiku, bodongka iḻumuai nongin bubú tatua. Koonto-ontong in bayongan in intau, binantaḷ tatua in pinotaanku, onda intua nobuat in akuoi.

⁸ Nopoikoḷomai kon singgai ki Tuhan in noguman kon inakó, kai-Nia,

⁹ “Ei intau inta ilo-ilow, bangusa in Israel, bangusa momomarontak tatua ain noḻibó kon inimu mongo onu inta yogot in aidanmu.

¹⁰ Tuamai in potaaudon kon i monia onu in inta poguman-Ku, ki Tuhan Inta Totok in moḷantud kon i monia. Koyow-Ku naa in pinotongkana kon i datu kon Yerusalem, bo bayongan in intau kon kotá tatua.

¹¹ Insilangaidon kon onu inta inaidanmu tatua in nobaḻíbí tomponuot kon onu in inta mobaḻí kon i monia, tuata: mosia in mobaḻí intau inta iḷumbú bo dinakop.

¹² Kon bonu in sindip in doḷom ki datu monia in momotaanbí kon binantaḷnea bo mobuat. Intau mita in moḷombangbí kon dinding sinbá mokoḷuai in sia. Bilogonneabí in matanea dá diádon ontongonnea in daḷan inta bayáannea.

¹³ Táe pogambat-Kubí in landará-Ku sin podomok kon inia. Bo diaan-Ku in sia kon kotá in Babel, bo kon tua matoi in sia takin diá bidon mokoimontanmai in mokoontong kon kotá tatua.

¹⁴ Bayongan in mogogutun kon komaḻig, takin doman monononggina bo moḷoḷukad i datu tua in porariton-Kubí kon bayongan in tampat. Mosia in duduran-Kubí bo ḻimodon.

¹⁵ Kon tungkuḷ in mosia porariton-Ku kon yua-yuak in bangusa mita ibanea kon butá mita in intau, yo kotaauandon monia kon Akuoibí in ki Tuhan.

¹⁶ Tongosilai moyakag kon i monia in posaḷamaton-Ku nongkon parang, nongkon malarat in kaanon, bo nongkon yampoi in takit, sinbá kon yua-yuak in bangusa mita ibanea tatua yo mosia in monotaaudon kon mosia in nogaidon kon inta totok in moromú. Dá akuondon monia kon Akuoibí in ki Tuhan.”

Nabi inta mogugur

¹⁷ Ki Tuhan in noguman kon inakó,

¹⁸ “Ei intau inta ilo-ilow, kogugurdon kon dodai in iko mongaan, bo kourotdon in ondok kon dodai in iko monginum.

¹⁹ Potaaudon kon bayongan in bangusa onu inta poguman-Ku, ki Tuhan Inta Totok in moḷantud kon intau in Yerusalem inta nogutunpa kon butá monia. Mosia in mogugurbí kon dodai in mongaan bo mourot in ondok kon tungkuḷ in monginum. Butá monia in mobaḻíbí moḷogat, sin bayongan in intau inta mogutun kon tua tantú ḻimimpat kon hukum.

²⁰ Kotá mita inta tanaa nopuḻing in intau in rimumudon bo gobá mita in tudunea in mobaḻídon ḷogat. Dá kotaauandon monia kon Akuoibí in ki Tuhan.”

Peribahasa inta kinoibog bo koyow inta kinodoí

²¹ Ki Tuhan in noguman kon inakó

²² “Ei intau inta ilo-ilow, nongonu sin intau in Israel in moibo-ibogbí mosingog kon peribahasa tanaa: ‘Wakutu in mobaḷui, táe onu inta pinoguman mita in diápabí doman mobobaḻí’?

²³ Yo, potaaudon kon i monia kon Akuoi, ki Tuhan Inta Totok in moḷantud, in motubag nanaa: Peribahasa tatua in popatan-Ku, dá diádon singogon bui kon Israel. Mobaḻí toḻiunea in pogumandon kon i monia kon wakutunea in noidapotdon, bo bayongan in inta pinoguman in mobaḻídon.

²⁴ Kon Israel diádon bui in oontongon andeka toḻindap diá totuu,

²⁵ Akuoi, ki Tuhan Inta Totok in moḷantud in mosingog kon bangusa in Israel, bo bayongan inta siningog-Ku in notantú bidon kon mobaḻí, bo diá bidon baḷú-baḷuian bui. Indongogaidon, ei intau mita momomarontak! Tungkuḷ in nobiagpa in iko yo aidan-Kudon in bayongan inta pinotoingat-Ku kon inimu. Akuoi, ki Tuhan Inta Totok in moḷantud ain nosingog.”

²⁶ Guman i Tuhan kon inakó

²⁷ “Ei intau inta ilo-ilow, intau mita in Israel in noguman kon oontongon bo onu inta sinoḻindapmu kon mobaḻí tua in bain moonggot mako bo motuoi.

²⁸ Tuamai, potaaudon kon i monia kon Akuoi, ki Tuhan Inta Totok in moḷantud, in noguman: Bayongan inta siningog-Ku in notantú bidon kon mobaḻí, bo diá bidon baḷú-baḷuian in wakutunea. Akuoi, ki Tuhan Inta Totok in moḷantud ain nosingog!”