YEHEZKIEL 11 - Alkitab Singog In Mongondow Masa In Tanaa

Yerusalem in ihukum

¹ Bo akuoi in sinintak in Roho i Allah bo dinia kon bonawang Pomukaan kon Baḷoi Tuhan. Kon tua inontongku in 25 in intau, kon sigad monia tua oyúon in doyowa in itoi in bangusa, ki Yaazanya ki adí i Azur bo ki Pelaca ki adí i Benaya.

² Ki Allah in noguman kon inakó, “Ei intau inta ilo-ilow, naa in intau mita inta monomayá kon inta moraat kon kotá tanaa bo nobogoi in tonggina inta mokopoḷaḻe.

^3-4 Manangka intua potaaudon in koyow-Ku soaḷ hukuman kon i monia, ei intau inta ilo-ilow. Sin mosia in moguman, ‘Diádon moongot baḷoi mita tanaa in posindogon bui. Kotá tanaa in kuyon bo kita naa in ponoyá kon bonunea. Kita in moamanbí nongkon torú in tuḷú sin kita in inoḻingoian in kuyon tanaa.’ ”

⁵ Onda intua Roho i Tuhan in nongawasa kon inakó, bo pinotabá i Tuhan in akuoi moguman kon umat in Israel, “Ei bangusa in Israel, kinotaauan-Kubí in onu inta siningog bo inta sinomayá monimu.

⁶ Totuudon mobayong in intau inta ain iḻimod monimu, nodapot in daḷan mita in kotá nopuḻingdon in mayat.

⁷ Tuamai, Akuoi, ki Tuhan Inta Totok in moḷantud, moguman kon inimu: Totuu, kotá tanaa in kuyonbí, táe ponoyá kon bonunea in deemanbí moiko, táe mayatbí in intau mita inta ain iḻimod monimu! Bo moiko in untunon-Kubí ḷumuai nongkon kotá tanaa!

⁸ Moondok degá in kedang in moiko? Poangoi-Kubí in intau inta modia kon kedang sin monubu kon inimu.

⁹ Moiko in diaan-Kubí poḷuai kon kotá bo ogoi-Ku kon intau ango-angoi. Akuoi in nopoḷabúdon in hukuman matoi kon i monimu.

¹⁰ Moiko in matoibí kon parang kon butámu tontaní, dá kotaauandon monimu kon Akuoibí in ki Tuhan.

¹¹ Dá moiko in diábí moaman in kon bonu in kotá tanaa, diábí naonda bo ponoyá kon bonu in kuyon. Aḷowan-Kubí bo hukumon in moiko kon ondakabí in moiko kon butá in Israel.

¹² Dá kotaauandon monimu kon Akuoibí in ki Tuhan bo moiko in hukumon popisí in iḻimimpatdon kon atorang-Ku mita bo diádon dinumudui kon parenta-Ku mita takin dinumudui kon hukum mita in bangusa mita ibanea inta kon diugmumai.”

¹³ Koyogotpa in akuoi nosingog kon tua, indoianmai yo ki Pelaca in daḻíbí noḷabú bo minatoi. Dá akuoi in dinumokó bo nomaḷú, “Kaasí Tuhan Inta Totok in moḷantud! Degá bayongan agat in Israel tanaa in ḻimodon-Mu?”

Dandi i Allah kon intau mita inta iḷumbú

¹⁴ Ki Tuhan in noguman bui kon inakó,

¹⁵ “Ei intau inta ilo-ilow, iko takin yobayatmu mita kon pinoḷumbúan koyogot in oumanonmai in intau mita in Yerusalem. Guman monia, ‘Intau mita inta iḷumbú tatua in noiḻiudon in yayú nongkon Yerusalem aka moibada kon i Tuhan. Butá in Israel ain inogoi i Tuhan kon inaton.’

¹⁶ Tuamai, potaaudon in koyow-Ku tanaa kon yobayatmu mita kon pinoḷumbúan, kon Akuoibí in inta nodia kon i monia kinoyayú kon sigad in bangusa mita bo noporarit kon i monia kon butá mita tatua. Tongá kon dodai in mosia kon tuapa, Akuoi in kotaki-takinbí monia.

¹⁷ Akuoi, ki Tuhan Inta Totok in moḷantud, nogumandon kon sipunon-Kubí in mosia nongkon butá mita kon tampat inta kinoraritan monia, bo mopobui in butá in Israel kon i monia.

¹⁸ Aka mosia mobui, mosia in moḷumbúdon kon bayongan in berhala inta moraat bo mokorongó inta nouḻí monia.

¹⁹ Mosia in ogoian-Kudon in gina mobagu bo dimukud mobagu. Gina monia inta ná kotogat in batu in gamáan-Ku bo toḻiuan-Ku in gina inta motoindudui kon i-Nakó.

²⁰ Dá mosia in dumuduidon kon atorang-Ku mita bo mosatia in dumudui kon bayongan in parenta-Ku. Mosia in mobaḻí umat-Ku bo Akuoi in mobaḻí ki Allah monia.

²¹ Táe intau mita inta moibog mosumba kon berhala mita inta moraat bo mokorongó in hukumon-Kubí popisí in dodia monia inta moraat tatua.” Natuata in singog i Tuhan Inta Totok in moḷantud.

Ki Allah nonaḷámai kon Yerusalem

²² Kerub mita tatua in momangkoidon ḷumayug bo roda mita tatua in dinumudui doman. Sindar mokotuḷow inta nobaḻí tomponuot koangoian i Allah in Israel in oyúon kon ḻimonikan monia.

²³ Onda intua sindar mokotuḷow tatua nonaḷámaidon kon Yerusalem bo nomamping kon buḷud kon dotá in pomukaan kon kotá tatua.

²⁴ Kon bonu in oontongon tatua, Roho i Allah nobingkat kon inakó bo dinia bui pinobayá kon intau mita intau iḷumbú kon Babel. Onda intua diádon inontong in oontongon tatua.

²⁵ Bo inoumanku kon intau mita inta iḷumbú in bayongan inta pinoontong i Tuhan kon inakó.