YEHEZKIEL 1 - Alkitab Singog In Mongondow Masa In Tanaa

KI YEHEZKIEL IN NOKOUḺÍ KON OONTONGON DUNGKUḶ SOAḶ KI ALLAH 1:1–7:27 Pomomarentaan i Allah

^1-3 Kon singgai iḻimanea buḷan inggopatnea kon taong intoḷu nopuḷúnea, kon bonu in taong iḻimanea ki Datu Yoyakhin inakut pinobayá in pinoḷumbúan, akuoi, ki Imang Yehezkiel ki adí i Busi, in kon bingkí in Ongkag in Kebar kon Babel noyotakin in intau mita in Yahudi ibanea inta iḷumbú. Daḻíbí nobukat in ḷangit bo akuoi in nokouḻí kon oontongon soaḷ ki Allah. Dinongogku in ki Tuhan in nopoyaput in singog kon inakó bo kinorasaanku in ropot in kawasa-Nea.

⁴ Akuoi in iḷumangag bo nokoontong kon deḷang nogirup nongkon utuan. Gotup moyotampí nongkon kapunan in goḷom inta moḷoben totok, bo ḷangit kon diugneamai in nobayag totok. Kon bonu in kilat inta moninda-nindar tatua kinoontongan in inta mopouḻi-uḻinag naonda bo porunggu.

⁵ Kon yua-yuak in goḷom tatua, inontongku in kerub opat tuata in mahaḷuk nobiag inta ná batangan in intau,

⁶ Táe kon batúannea pogotnea opat bo doyowa nogapang in koḻikip.

⁷ Sioḷnea in notuḻid bo mopouḻí-uḻinag naonda bo porunggu inta inatá. Gongguyamú in sioḷnea in kokonukuan naonda bo konuku in bantong.

⁸ Koḻikud in kopogot opat bo kokoḻikip doyowa nogapang tua, mosia in ḷoḻimaan doman ná ḻima in intau inta kon ḻimonag in batúan in koḻikip.

⁹ Tongogapang in koḻikip in batúan in mahaḷuk tatua in nobuká bo ubungnea mita in noyogamá in koḻikip in mahaḷuk ibanea, dá mahaḷuk opat tatua in notonggopat. Aka ḻimiai, yo mosia kon batúannea ḻimiai tumuḻid mayá ná muna bo diábí momurow kon awaknea.

¹⁰ Batúan in mahaḷuk tatua in kopogot opat inta noyo-noyoposi; pogot in intau in kon muna, pogot in singa in kon dotá in koḷanan, pogot in bantong in kon dotá in koḷoigi, bo pogot in boniá in kon tumi.

¹¹ Tongogapang in koḻikip nongkon batúan in mahaḷuk tatua in sinongká namonik dá noiḻiai kon ubung in koḻikip in mahaḷuk kon diugnea, bo tongogapang doman in koḻikipnea noikopí nogoḻingoi kon awaknea.

¹² Kon batúan in mahaḷuk tatua notobatú in sinumayow kon opat nojurusan, dá mosia in motaaubí mayá kon ondakabí in koibog monia diábí bain momurow kon awaknea.

¹³ Kon yuak in mahaḷuk mita tatua in koontongan ná baga in tuḷú andeka poḷombow noyongkit inta tantú moḻiai diá in gogainea. Tuḷú tatua in moninda-nindar bo moporosik in kilatan mita in rosi.

¹⁴ Mahaḷuk mita tatua tontaní in mayá magí-mako ná koḻikat in kilat.

¹⁵ Koyogot in akuoi moindoimai mako kon tua mita, inontongku in roda opat kon tudu in butá, kon batúan in mahaḷuk tatua tumongobatú doman in rodanea.

¹⁶ Roda opat tatua in notombatangan bo mopouḻi-uḻinag naonda bo batu permata, bo kon batúannea oyúon doman in rodanea ibanea, inta noibandai kon yua-yuaknea.

¹⁷ Dá roda mita tatua in motaaubí mayá ná opat nojurusan.

¹⁸ Ḻimbung in roda mita tatua nopuḻing in mata.

^19-21 Mahaḷuk mita tatua in mayábí in onda in koibog monia, bo roda mita tatua in tantúbí dumudui, sin kon bonu in kawasa in mahaḷuk mita tatua. Pomuḷoi in mahaḷuk mita tatua mayá tumakin kon tompot andeka mogogai, roda mita tatua in umuranbí dumudui moyotakin monia.

²² Kon tudu in uḷu in mahaḷuk mita tatua noibuká in naonda bo kubah nongkon kristal inta mopouḻi-uḻinag.

²³ Kon ḻimonag in kubah tatua batúan in mahaḷuk tatua nopobuká in koḻikipnea togapang pinodotá kon mahaḷuk inta kon diugnea, bo koḻikipnea inta togapang doman nongoḷob kon awaknea.

²⁴ Aka ḷumayug in mosia, yo kodongoganku in singog in ḷayugannea; singognea in naonda bo singog in tubig moitampurang, ná goḷopak in bayáan in tontara inta mobarong, naonda bo singog i Allah Inta Totok in mokawasa. Aka mogogai in mosia ḷumayug, kopíon monia in koḻikipnea mita,

²⁵ Táe nongkon tudu in kubah inta kon ḻimonik in uḷu monia, kodongoganpabí in singog.

²⁶ Kon tudu in kubah tatua oyúon in ná batangan in ḷoḻitúan pomomarentaan nongkon batu in nilam, bo kon tudunea iḻimitú inta koontongan ná intau.

²⁷ Dotá in ḻimonikannea koontongan mopouḻi-uḻinag naonda bo porunggu kon yuak in dokot in tuḷú. Dotá in ḻimonagannea in nonindar mobayag,

²⁸ bo nopoyagi-yagimai in batangannea naonda bo aḻibobag. Tuata in bayag motarang inta mopoontong kon kinoangoian i Tuhan. Nokoontongmai kon tua, noitongkob in akuoi kon butá. Bo kinodongoganku in singog inta