YAKOBUS 5 - Alkitab Singog In Mongondow Masa In Tanaa

Tompoingat kon intau mita nooyúon

¹ Utat mita, intau inta nobiag nooyúon! Indongogaidon in tongginaku naa. Moiko in musti mongombaḷ bo mogamui sin moiko in koantuganbí in roriga!

² Kaoyúonanmu nion ain nobongkog. Pakeangmu ain kinaan in anoi.

³ Buḷawan bo saḷakamu ain kinokoḷoban komintan in kaḻiotá, kaḻiotá tatua in mobaḻí sakusi moḷawang kon i monimu bo daitonnea kaanon in awakmu naonda bo tuḷú. Moiko ain nosipun kon kapunyaan kon singgai mita pangabisan.

⁴ Diá inuboḻian monimu in gaji in intau mita inta nogaid kon gobámu. Tanaa indongogaidon in amui monia! Intau mita inta nosipun kon hasil in gobámu, kinumarak nokituḷung bo karak monia tua ain kinodongogan i Allah, Tuhan inta Totok in Mokawasa.

⁵ Moiko ain nobiag nooyúon totok bo kinorasaandon monimu in kasanangan dunia naa. Moiko in naondadon bo koyogot in mopoḷongó in awak sin ratáan kon singgai porataan.

⁶ Moiko in mohukum bo moḻimod kon intau mita inta diá kotaḷá, bo mosia in diá momaḷawang kon i monimu.

Mosabar bo mosambayang

⁷ Tuamai, posabardon utatku mita, dapot in ki Tuhan mamangoi. Indoiaidon naonda in kososabar in intau monononggobá in mogoḷat modapot in butánea mobogoi in hasil inta mobogoi in kauntungan kon inia. Umuran mosabar in sia in mogoḷat kon uyan kon sempo in kototakan bo uyan sempo in pononobur.

⁸ Moiko in musti mosabar doman bo moḷoben in gina, sin singgai koangoian i Tuhan in nodiugdon.

⁹ Donaai umuran mongunsingog bo mosipotaḷáan, sinbá moiko in diá hukumon i Allah. Torop! Hakim in nodiugdon, nobasadiadon mamangoi.

¹⁰ Utat mita, toropdon in nabi mita inta nosingog pinodoyon kon tangoi i Tuhan. Mosia in nosabar bo notaba in kinoantugan in yoyiga. Dá baḻídon in mosia saḷaku contoh.

¹¹ Mosia in sinangoi nosanang sin notaba. Dinongogdon monimu in soaḷ kososabar i Ayub, bo kinotaauan monimu kon pangabisannea binarakatan i Tuhan in sia. Sin tabi i Tuhan in totok moḷoben bo Sia in mopia in gina.

¹² Naa in soaḷ inta totok moponting: Donaai mongibot, pinomayá podoyon kon ḷangit ande podoyon kon butá, andeka podoyon kon onukadon. Pogumandon “Oo” aka totuu oo, bo pogumandon “Diá” aka diá, sinbá diá in moiko popoḷabúan i Allah in hukuman.

¹³ Aka kon sigad monimu oyúon in kinoantugan in roriga, yo musti in sia mosambayang. Aka oyúon in moḷunganga, yo musti in sia modondong modayow kon i Allah.

¹⁴ Aka oyúon in motakit, yo musti in sia mogoiní kon itoi mita in jamaat. Bo itoi mita in jamaat tatua in musti mosambayang kon intau inta notakit tatua bo poḷat mopoḻepo in ḷana podoyon kon tangoi i Tuhan.

¹⁵ Aka sambayang monia pinoyaput takin noyakin, yo undamanbí i Tuhan in intau inta notakit tatua, bo ampungan-Nea doman in dosa mita inta ain inaidannea.

¹⁶ Tuamai moiko in musti mosi akuan kon taḷá bo mosi sambayangan, sinbá undaman in moiko. Sambayang in intau inta dinumudui kon ibog i Allah, moḷoben in kawasanea.

¹⁷ Ki Elia in tumpaḷa doman intau ná kita naa. Sia in nosambayang totu-totuu nopoigum sinbá diá monguyan-nguyan, dá diá doman nonguyan-nguyan kon bonu in toḷu notaong bo tobotak.

¹⁸ Onda intua sia in nosambayang bui, dá ḷangit in buidon nobogoi in uyan sahingga in butá nobogoidon in hasilnea doman.

¹⁹ Utatku mita! Aka kon sigad monimu oyúon in intau inta diádon dinumudui kon totundú nongkon i Allah, bo oyúon in tobatú intau ibanea in nodia kon intau tatua nobui mangoi kon i Allah,

²⁰ yo toropdon in tontagá tanaa: Intau inta ain nodia mangoi kon intau tobatú binaradosa bui namangoi kon i Allah, yo intau tatua ain noposaḷamat kon jiwa in intau baradosa tatua nongkon kinopatoiannea bo nokopopisí kon nobarong in dosa inampungan. Horomat nami, Ki Yakobus