YAKOBUS 3 - Alkitab Singog In Mongondow Masa In Tanaa

Dilá intau

¹ Utat mita! Dikabí mobayong in kon sigad monimu in moibog mobaḻí guru. Kinotaauanbí monimu kon kita inta mobaḻí guru in adilonbí moboga-bogat nongkon intau ibanea.

² Kita komintan in mokakit in mogaid kon inta noitaḷá. Táe intau inta diá dodai onda in nosingog kon noitaḷá, sia tua intau nosompurna, inta mokokawasa kon bayongan in awaknea.

³ Aka kita mopopaké in rante kon bibig in kabaḷo sinbá sia in dumudui kon ibog naton, dá modait kokawasaan naton in bayongan awak in kabaḷo tatua.

⁴ Bo indoiai doman in kapaḷ. Umpaka moḷoben in kapaḷ tatua bo diaan in tompot moropot, táe sia kendalionbí in kamudi inta mointok totok, podudui ibog in intau inta nodia.

⁵ Ná doman tua in dilá naton; umpaka mointok in dilá naton tua, táe motaaubí in sia dumodia kon soaḷ mita inta mongoḷoben. Indoiaika, umpaka mointok in tuḷu táe mokopokakbí in sia kon kayuon inta moḷoben!

⁶ Dilá tua in naonda bo tuḷu. Kon awak naton, sia in mobaḻí pangkoi in moraat inta mopobaya-bayá mako in moraat kon bayongan in awak naton. Takin tuḷu inta nongkon naraka, sia in momokak kon bayongan kobiagan naton.

⁷ Bayongan in mahaḷuk inta kaḻig, ḷagapan mita, takin mahaḷuk mita inta ḷumandai mayá bo mahaḷuk mita kon dagat motaaubí yonokon bo noyonok domandon in intau.

⁸ Táe dilá in intau in diá koyonokan. Dilá tua in moraat bo diábí kokawasaan; nopuḻing in rasum inta mokopatoi.

⁹ Pakéon naton mopoyaput in sukur kon i Tuhan bo kon i Amá naton, táe pakéon doman mogodi-godimai kon tumpaḷa intau, inta ain pinomia pinodudui kon batangan i Allah.

¹⁰ Nongkon bibig inta notongkai ḷumuai in singog posukur bo singog doman pogodi-godi. Utatku mita, diábí motaau in natua!

¹¹ Oyúon degá in bokaká inta mopoḷuai in tubig noḻiau bo tubig mopait nongkon tobatú bokaká tatua?

¹² Utatku mita, pangkoi in ara diábí in sia mopomungai in zaitun, bo pangkoi in anggur diábí mopomungai in ara. Bokaká in tubig noibung diábí in sia mopoḷuai in tubig inta moḻiau.

Hikmat inta nongkon i Allah

¹³ Aka kon sigad monimu oyúon intau inta mobijaksana bo mopandoi, yo mustibí intua poniatanea kon kobobiag mopia takin mogaid kon soaḷ mita inta mopia, inta sinakinan in gina inta diá mosiḷantud bo kabijaksanaan.

¹⁴ Táe aka moiko in mointoi bo tongá morai kon kopontingan tontaní, donaaibí pongaḷakuang monimu in kabijaksanaan tatua, sin dodia monimu natua in mopoyotuuybí in habar inta nobanar nongkon i Allah.

¹⁵ Kabijaksanaan natua in deemanbí nongkon soroga. Tua in nongkon duniabí, nongkon ibog in intau, bo nongkon dimbuḷó!

¹⁶ Kon onda in oyúon intoi bo sipat inta tongá morai kon kopontingan tontaní, yo kon tua oyúon domandon in ropatoi bo bayongan in oaid inta moraat.

¹⁷ Táe intau inta nokouḻí kon kabijaksanaan nongkon i Allah, yo sia in muna-munamai totok modarit, onda intua moibog in sia kon dodamean, mobahasa mako, bo motoindudui. Moḷoben in tabinea bo oaidnea mongopia. Diábí in sia momiḻí kon intau bo diábí tongá ki ubo-uboḷmai mopia.

¹⁸ Soaḷ inta mopia tua bungaibí in bibit dodamean inta inambor in intau inta moibog in dodamean!