YAKOBUS 2 - Alkitab Singog In Mongondow Masa In Tanaa

Tonggina bá diá mopoyoposi intau

¹ Utatku mita! Saḷaku intau inta mopirisaya kon i Tuhan Yesus Kristus, Tuhan naton inta Totok in Momulia, dá donaaibí in moiko mopoyo-poyoposi kon intau podudui in kaadaan kobobiag monia.

² Sin aka oyúon in intau inta nooyúon inta nogisising buḷawan bo nogiḷambung mogaga in namangoi kon undanganmu, bo dodai intua namangoi doman in intau nobogá inta nomaké in ḷambung diádon notampuimai,

³ dá totokdon in ihoromat monimu in intau inta nogiḷambung mogaga koina. Moiko in moguman kon inia, “Tuang ḻitúdon kon kadera inta totok in mopia naa.” Táe aka kon intau inta nobiag nobogá, moiko in moguman kon inia, “Sindogdon kon tua,” ande “Ḻitúdon kon taḷog kon naa.”

⁴ Aka natua in aidan monimu, yo moiko in nopoyoposidon kon tumpaḷa intau bo monilai kon intau podudui in raian inta moraat.

⁵ Toropdon, Utatku mita inta kinotabiku! Intau inta nobiag nobogá kon dunia naa, piniḻí i Allah mobaḻí intau inta mooyúon kon bonu in pirisaya. Intau mita tatua in mobaḻíbí anggota in umat i Allah ná inta pinodandi i Allah kon intau mita inta kinotabi-Nea.

⁶ Táe moiko ain noningkuḻe kon intau mita inta nobiag nobogá, bokaka intaubí mita inta nooyúon in mondorot bo mogugut kon i monimu pobayá in pongadilan!

⁷ Mosiabí tuata inta nohina kon tangoi mopia inta sinarima monimu nongkon i Allah!

⁸ Moiko in mogaid kon inta moitutui, aka aidan monimu in hukum inta totok in moponting inta pinais kon bonu in tontagá in Buk Motusi nanaa: “Kotabibí in tumpaḷa intau ná kotabimu kon awakmu tontaní.”

⁹ Táe aka moiko bo mopoyo-poyoposi in intau podudui in kaadaan kobobiag in intau, yo nogaidon kon dosa in moiko, bo hukum i Allah in moponiatadon kon moiko nion in moḷoḷawang kon hukum.

¹⁰ Intau inta noḷawang kon tobatú nongkon hukum mita i Allah, mangaḻenea kon tua nodaitneadon iḷawang in hukum tatua.

¹¹ Sin ki inta noguman, “Dika monuaḻing,” siadon doman tua inta noguman “Dika moḻimod.” Dá aka moiko diá nonuaḻing, táe noḻimod, dá moiko in moḷoḷawangbí doman kon hukum.

¹² Posingog bo pogaid saḷaku intau inta bain adilon podudui kon hukum i Allah inta nopobebas kon intau.

¹³ Sin diábí poontong i Allah in tabi-Nea kon intau inta diá nonotaau in totabian. Táe tabibí in moḷobe-ḷoben nongkon hukuman!

Pirisaya bo Oaid

¹⁴ Utatku mita! Onubí in mangaḻenea intau moguman, “Akuoi in intau mopirisaya”. aka diá intua poniatanea kon oaid? Mokosaḷamat kon inia degá in pirisaya natua?

¹⁵ Aka kuma tobatú utat ḷoḷaki ande bobay diá in pakeang bo diá in kaanon inta tugat kaanon pomuḷoi in singgai.

¹⁶ Onubí in mangaḻenea moiko in moguman, “Pakédon in pakeang tanaa inta mokoinggamá kon tumping bo pongaandon!” – aka diá ogoian monimu in sia in pakéonnea kon kobiagan?

¹⁷ Natuata doman in pirisaya, aka diá poponiata kon oaid, dá pirisaya tatua diábí in mangaḻenea.

¹⁸ Degá oyúon intau in moguman, “Oyúon intau in umandoḷ kon pirisayanea bo oyúon doman in umandoḷ kon oaidnea.” Dá akuoi in moguman, “Poontongka kon inakó in pirisaya takin diá in oaid bo poontongku kon inimu in oaidku saḷaku bungai kon akuoi in mopirisaya.”

¹⁹ Tantú moiko in mopirisayabí kon ki Allah in tongábí tobatú toh? Bá kotaauan monimu kon dimukud mita moraat in mopirisayabí doman kon tua bo uyotbí doman mako in mosia sin moondok!

²⁰ Mobodok totok in moiko! Degá paraḷupa poontong kon i monimu kon diábí in mangaḻenea aka pirisaya diá poyotakinon in oaid?

²¹ Indoiaika in ki Abraham mogoguyang naton. Sia in sinarima nopia i Allah popisíbí in oaidnea, wakutu in sia noposumba kon i adínea ki Ishak. Pinosumbanea kon i Allah kon tudu in mezbah.

²² Nosilangdon kon naa kon pirisaya in musti poniata kon oaid sinbá mosompurna.

²³ Tua noyokaan in tontagá kon Buk Motusi inta noguman nanaa: “Ki Abraham in nopirisaya kon i Allah, bo lantaran pirisayanea tatua dá sinarima i Allah in sia saḷaku intau inta nogaid kon onu in kinoibog i Allah.” Tuamai ki Abraham in sinangoi, “Yobayat i Allah”.

²⁴ Nosilangdon tanaa, kon intau tarimaan mopia i Allah lantaran onu inta inaidan in intau tatua, bo deemanbí tongá popísí in pirisayanea tatua.

²⁵ Natua doman in ki Rahab, bobay sundaḷ tua. Sia sinarima nopia i Allah popisíbí in oaidnea, wakutu in sinarimanea kon baḷoinea in totabá mita intau Israel bo sinuḷungannea pinoḷagui in mosia nongin daḷan ibanea.

²⁶ Dá, ná awak inta diá in roho, awak tatua in minatoibí, natua doman in pirisaya inta diá takinan in oaid, tua in pirisayabí inta minatoi.