WAHYU 4 - Alkitab Singog In Mongondow Masa In Tanaa

Posumbaan kon Soroga

¹ Nopaḷut mako intua nanaa in bui inontongku. Inontongku in tobatú ḷoḻingkop nobukat kon soroga. Bo dinongogkudon bui in singog inta noguman kon inakó koina inta naonda bo singog in torompet. Singog tatua in noguman, “Poponikdon mangoi kon naa, bá popoontong-Kudon kon inimu onu in mobaḻí kon singgai moiduduimai.”

² Baḷúdon in akuoi kinawasaan in Roho i Allah. Bo inontongku kon soroga oyúon in tobatú tampat pomomarentaan, bo oyúon doman in tobatú intau iḻimitú kon tampat pomomarentaan tatua.

³ Pogot in intau tatua in monindar naonda bo batu permata inta moḷunow in batangannea bo naonda doman bo batu delima. Bo tobatú aḻibobag inta naonda bo koḷunow in ḷumut noibongkow kon tampat pomomarentaan tatua.

⁴ Noiḻibu kon tampat pomomarentaan tatua, oyúon doman doyowa nopuḷú bo opat in tampat pomomarentaan ibanea. Kon tampat mita tatua doyowa doman nopuḷú bo opat in itoi iḻimitú. Mosia in nogiḷambung nobudó bo nomaké in mahkota buḷawan.

⁵ Nongkon tampat pomomarentaan tatua noisindar magí in kilat bo iḷumuai in singog in gotup inta moyo-moyodudui. Bo kon tampat pomomarentaan tatua oyúon in poḷombow pitu inta koyongki-yongkit; tuata in Roho i Allah taya pitu.

⁶ Bo kon tayowon in tampat pomomarentaan tatua oyúon doman in dagat inta ontongon naonda bo kaca, motarang naonda bo kristal. Kon yua-yuak bo kon ḻibumai mita in tampat pomomarentaan tatua oyúon in mahaḷuk opat, mahaḷuk inta kon dotá in munanea bo tuminea nopuḻing in mata.

⁷ Mahaḷuk inta ontongon muna naonda bo singa. Induanea in naonda bo sapi koḷakian. Intoḷunea in naonda bo pogot in intau. Inggopatnea in naonda bo boniá inta koḷayu-ḷayug.

⁸ Mahaḷuk opat tatua komintan onom in koḻikipnea, kon ḻibunea bo kon dotá in bonunea nopuḻing in mata. Doḷom singgai mahaḷuk mita tatua diá mogoga-gogai in modondong nanaa: “Kudus, kudus, mokudusdon in ki Tuhan, Allah Inta Totok Mokawasa; inta oyúon, inta koyongandon oyúon, bo inta umuranbí oyúon.”

⁹ Mahaḷuk opat tatua in pomuḷoi mako mopoyaput in dodayow mita, horomat bo sukur kon i-Nia inta iḻimitú kon tampat pomomarentaan tatua, inta tantú nobiag bo inta diá mato-matoi.

¹⁰ Bo kon wakutu in mahaḷuk mita tatua modondong, dá itoi inta doyowa nopuḷú bo opat tatua in tumungkud kon tayowon in intau inta iḻimitú kon tampat pomomarentaan tatua bo mosumba kon i-Nia inta tantú nobiag bo diá mato-matoi. Onda intua mosia in mopogarab in mahkota monia kon tampat pomomarentaan tatua poḷat mosingog,

¹¹ “O Tuhan, o Allah nami! Tongábí Iko in patus motarima kon dodayow, horomat bo kawasa. Sin Ikobí in nogaid kon bayongan in yagi-yagi, bo lantaranbí doman ibog-Mu dá bayongan in yagi-yagi tua ain nobaḻí bo nobiag.”