WAHYU 3 - Alkitab Singog In Mongondow Masa In Tanaa

Koyow kon Jamaat Sardis

¹ “Paisdon kon malaekat in jamaat Sardis, nanaa: Nanaa in koyow nongkon i-Nia inta kitogi roho pitu nongkon i Allah bo inta kitogi tundi pitu tua. Kinotaauan-Kubí onu in pinomia monimu: Moiko nion sinangoian nobiag, táe sabanarnea in minatoi bidon!

² Manangka intua pobangondon bo irigonai onu inta oyúonpa kon i monimu kon dodai in tua komintan diápa matoi. Sin diápa tobatúmai nouḻí-Ku in inaidan monimu inta nosompurna kon tayowon i Allah.

³ Tuamai in toropdon bui in onu inta ain sinundú kon i monimu koḻipod bo onu inta ain dinongog monimu. Duduiai intua bo pogogaidon in mogaid kon dosa mita. Aka moiko bo diá mobangon, yo Akuoi in mamangoi kon i monimu naonda bo mononakow; bo diábí kotaauan monimu mongo toonu in Akuoi in mamangoi.

⁴ Táe kon yua-yuak monimu inta kon Sardis oyúonpa in intau inta noḷukad mako sinbá ḷambungnea in umuran modarit. Mosia tua in mayá moyotakin-Ku takin mogiḷambung mobudó, sin mosia in patusbí motarima kon tua.

⁵ Mosia inta mountung ḷambungan in ḷambung mobudó natua. Tangoi monia in diábí popaton nongkon Buk Intau Nobiag. Bo akúon-Kubí in mosia kon tayowon i Amá-Ku bo malaekat-Nea mita kon Akuoibí in kitogi kon i monia tua.

⁶ Ki ine i mokodongog, yo tarukira onu in pinoguman in Roho i Allah kon jamaat mita!”

Koyow kon jamaat Piladelpia

⁷ “Paisdon kon malaekat in jamaat kon Piladelpia nanaa: Naadon in koyow nongkon i-Nia inta Mokudus, Inta Mobanar bo ki Inta nokadai kon kokunsi i Daud; Aka Sia in mobuká yo diábí tobatúmai in mokoḻingkop; bo aka ḻingkopan-Nea, yo diábí doman tobatúmai in mokobuká.

⁸ Kinotaauan-Kubí in onu inta inaidan monimu. Kinotaauan-Kubí kon ropot monimu in diábí tongonu; moiko ain dinumudui kon totundú-Ku bo motoindudui kon i-Nakó. Moiko in pinobukatan-Kudon kon tobatú ḷoḻingkop, inta diábí koḻingkopan i inekabí.

⁹ Toropdon in naa: Intau mita inta ain nobaḻí umat in Ibilis tua, in intaubí mita mongouboḷ inta mongaku intau mita in Yahudi bokaka deemanbí. Mosia tua in aidan-Kubí sahingga in mosia mamangoi tumungkud kon tayowonmu. Bo kotaauandon monia kon kotabi-Kubí in moiko.

¹⁰ Lantaran moiko ain dinumudui kon parenta-Ku kon bá umuran mosabar mogoḷat mako kon i-Nakó. Dá umuran-Ku doman ḷukadan mako in moiko nongkon kasusahan inta moiantug kon dunia naa. Soaḷ tatua in mobaḻíbí sin monungkuḷ kon bayongan in intau kon dunia naa.

¹¹ Akuoi in ḷagibí mamangoi! Ḷukadai kopira in onu inta oyúondon kon i monimu, sinbá diá tobatúmai in intau in mokoagow kon tombuinag kinountungan monimu.

¹² Intau inta nountung, baḻíon-Ku saḷaku oigi kon bonu in Baḷoi Motusi i Allah-Ku, bo sia in umuran bidon mogutun kon tampat tatua. Tangoi i Allah-Ku, bo tangoi in kotá i Allah-Ku, tuata in Yerusalem mobagu inta moponag nongkon soroga, nongkon i Allah-Ku – tua in paison-Ku kon intau tatua. Ná doman tua, tangoi-Ku inta mobagu in paison-Ku doman kon intau tatua.

¹³ Ki ine in mokodongog, yo tarukira onu in pinoguman in Roho i Allah kon jamaat mita!”

Koyow kon jamaat Laodikia

¹⁴ “Paisdon kon malaekat in jamaat Laodikia nanaa: Naadon in koyow nongkon i-Nia inta sinumangoi Amin, sakusi inta mosatia bo mobanar, pangkoi in bayongan yagi-yagi inta pinomia i Allah.

¹⁵ Kinotaauan-Ku onu in inaidan monimu: Kinotaauan-Kubí kon moiko nion in diá motumping táe diá doman mopatú. Maníka bo tongádon motumping ande tongá mopatú!

¹⁶ Moiko nion in moanai; diá mopatú, táe diá doman motumping. Tuamai moiko in ḷuáan-Ku nongkon bonu in bibig-Ku.

¹⁷ Moiko in mosingog: ‘Kami in nobiag nooyúon bo bayongan in yagi-yagi komintandon oyúon; diádon in nogaat kon i nami.’ Táe diábí kinotaauan monimu kon moiko nion in nobiagbí nomalarat totok, bo totok doman in mokoajar kon gina in kaadaan monimu nion! Moiko nion in nomasiking, diá koḷambu-ḷambung, bo bilog.

¹⁸ Tuamai naa in tonggina-Ku kon i monimu, potaḷui kon buḷawan kon i-Nakó, buḷawan taakan sinbá mobaḻídon mooyúon in moiko. Bo potaḷui doman kon ḷambung mobudó kon i-Nakó, sinbá mogiḷambungdon in moiko bo awak monimu inta nopilang bo mokooyá in kooḻingoiandon. Bo potaḷui domandon kon undam poḻepo kon mata sinbá mokoontongdon in moiko.

¹⁹ Intau mita inta kotabi-Ku, mosia tuata in toboḷowon-Ku bo sambokon-Ku. Manangka intua koropotdon in gina monimu bo pogogaidon in mogaid kon dosa mita.

²⁰ Indoiai! Akuoi in sinimindog kon tayowon in ḷoḻingkop bo nonangkokó. Aka oyúon in intau nokodongog kon singog-Ku bo momukat kon ḷoḻingkop; dá tumuot in Akuoi bo mokipodungkuḷ kon inia bo mongaan moyotakin in kaminda.

²¹ Mosia inta mountung, ogoi-Ku ḻimitú takin-Ku kon tampat pomomarentaan-Ku, notongkai doman ná Akuoi inta ain nountung bo tanaa mako in iḻimitú noyotakin i Amá-Ku kon tampat pomomarentaan-Nea.

²² Ki ine in mokodongog, yo tarukira in onu inta pinoguman in Roho i Allah kon jamaat mita!”