WAHYU 19 - Alkitab Singog In Mongondow Masa In Tanaa

¹ Nopaḷut mako kon tua, akuoi in nokodongog kon naonda bo giow in intau mobayong inta nongkon soroga, noguman, “Dayowdon in ki Allah! Ki Allah naton inta mopoposaḷamat; Sia in Allah inta Moḷoben bo Mokawasa!

² Sin pohohakim-Nea in moadil bo mobijaksana! Sia ain nopoḷabú in hukuman kon sundaḷ moḷoben, inta nomoguyaat kon dunia naa takin aidnea inta mokotor. Ki Allah ain nohukum kon sundaḷ tatua, sin sia in noḻimod kon intau mita inta nogaid kon oaidan i Allah.”

³ Bo singog in intau mobayong tatua in nomaḷú bui, “Dayowdon in ki Allah! Poyok nongkon tuḷú inta nomokak kon kotá moḷoben tatua umuran moidamonik diá in goga-gogainea!”

⁴ Dá doyowa nopuḷú boopat in itoi mita tatua bo mahaḷuk opat inta iḻimibu kon tampat pomomarentaan tatua sinumungkud bo nosumba kon i Allah inta iḻimitú kon tampat pomomarentaan tatua. Mosia in noguman doman, “Amin! Dayowdon in ki Allah!”

Rame Ponikaan Adí in Domba

⁵ Bo kinodongogandon in giow nongkon tampat pomomarentaan tatua noguman, “Dayowdon in ki Allah, ei bayongan in intau inta nogaid kon oaidan i Allah, bo bayongan intau – guyanga-mongoadí – inta nosumba kon i Allah!”

⁶ Onda intua akuoi in nokodongog kon ná giow in intau mobayong inta noyosipun; kotombánea in naonda bo singog in bokoḷ kon dagat bo gotup inta moyo-moyodudui. Dinongogku mosia in noguman, “Dayowdon in ki Allah! Sin ki Tuhan, ki Allah naton Inta Mokawasa tua, nomarentadon in tanaa!

⁷ Koḻigai in kita mokopoḷungangadon kon gina bo moyogiyow modayow kon i-Nia! Sin nodapotdon in singgai ponikaan i Adí in Domba bo nonikaan-Nea in nobasadiadon.

⁸ Pakeang moaḷus mobudó inta mopouḻi-uḻinag inogoidon kon i-Nia sin pakéon.” (Pakeang moaḷus tatua in oaidbí mita mopia inta pinomia in umat mita i Allah.)

⁹ Bo malaekat tatua in noguman kon inakó, “Paisdon in naa: ‘Mosanangdon totok in intau inta inoiní mamangoi in rame ponikaan i Adí in domba tatua.’ ” Malaekat tatua in noguman doman bui kon inakó, “Habar tanaa in totu-totuubí nongkon i Allah.”

¹⁰ Dá sinumungkud in akuoi kon tayowonnea sin mosumba kon inia, táe sia in noguman kon inakó, “Donaai! Donaai mosumba kon inakó, sumbadon in ki Allah! Sin akuoi naa in tongábí doman bobantung ná iko nion bo notongkai doman i utatmu mita inta umuran kinumadai norigon kon onu inta pinoguman i Yesus!” Sin onu inta pinoguman i Yesus, tuatabí inta nopogonú kon gina in intau mita inta nopotaau in koyow i Allah.

Intau inta sinumakoi kon kabaḷo nobudó

¹¹ Noiduduimai kon tua inontongku in soroga nobukat, bo inontongku oyúon in tobatú kabaḷo nobudó. Ki inta sinumakoi kon kabaḷo tatua, tangoinea ki Mosatia bo ki Mobanar. Sia in moadilbí in monantú kon hukuman bo kon parang.

¹² Matanea in naonda bo dokot in tuḷú, bo kon uḷunea pinakéan in mahkota mobayong. Kon awaknea pinaisan in tangoi, bo tongábí sia in nonotaau kon tangoi tatua.

¹³ Jubah inta pinaké-Nea ain pinoḷodok kon dugú. Bo Sia in Sinangoi “Pirman i Allah”.

¹⁴ Bayongan tontara in soroga dinumudui kon i-Nia; mosia in sinumakoi kon kabaḷo mita nobudó, bo nomaké in ḷambung moaḷus inta totok in nobudó.

¹⁵ Nongkon bibig-Nea tua iḷumuai in tobatú pitow inta moḷanit bo inta pakéon-Nea monaḷow kon bangusa mita. Sia in nomarenta kon i monia takin tungkud uatoi. Sia in momugut kon anggur kon bonu in tampat pomomugutan kon anggur torú i Allah Inta Totok in Mokawasa.

¹⁶ Jubah bo paa-Nea in pinaisan tangoi nanaa, “Datu in bayongan datu, bo Tuang in bayongan tuang.”

¹⁷ Bo akuoi in nokoontong kon tobatú malaekat sinimindog kon mata in singgai bo nomaḷú noropot kon bayongan ḷagapan inta iḷumayug kon baḷangon, kai-Nia: “Koḻigai moyosipun kon naa sin tumuot kon rame moḷoben inta inaidan i Allah!

¹⁸ Koḻigai mokaan kon tapú in datu mita, tapú in bayongan itoi in tontara bo tapú in bayongan intau inta minatoi noparang. Koḻigai mokaan kon tapú in intau mita inta tumotakoi kon kabaḷo, tapú in kabaḷonea mita bo tapú in bayongan intau, guyanga, mongoadí, ata andeka intau nobebas!”

¹⁹ Noiduduimai kon tua akuoi in nokoontong kon mahaḷuk tatua, bo datu mita kon dunia naa takin tontara mita monia, noyosipun sin moparang kon i-Nia inta sinumakoi kon kabaḷo nobudó bo tontaranea mita.

²⁰ Mahaḷuk tatua in kinodomokan takin intau mita inta morongaku nabi táe deemanbí totuu nabi inta ain norogaid kon soaḷ mita inta mokoherang kon tayowon mahaḷuk tatua. (Takin aid mita monia inta mokoherang tatua, mosia nonguboḷ kon i monia inta ain notarima kon tanda in mahaḷuk tatua bo inta ain nosumba kon patongnea.) Bo mahaḷuk tatua takin intau mita inta deeman totuu nabi tumpaḷa pinogambat kon bonu in tuḷu moḷoben inta kodoko-dokot takin balerang.

²¹ Bo bayongan in tontaranea sinoko-ratá in pitow inta iḷumuai nongkon bibig in intau inta sinumakoi kon kabaḷo nobudó tatua. Dá ḷagapan mita tatua in namangoi bo nokaan kon tapú in intau mita inta minatoi iratá tatua.