WAHYU 18 - Alkitab Singog In Mongondow Masa In Tanaa

Kinoḷabúan in Babel

¹ Onda intua akuoi in nokoontong kon tobatú malaekat ibanea noponag nongkon soroga. Kon malaekat tatua oyúon in kawasa inta moḷoben, bo kamuliaan nokobayag kon dunia naa.

² Nanaa in pinobaḷúnea: “Ain noḷabú! Babel kotá moḷoben tua ain noḷabú! Tanaa sia in nobaḻídon tampat in dimbuḷó bo dimukud mita moraat. Bo kon bonunea in nobiagdon norupa-rupamai in ḷagapan inta nonajis bo inta kinodoí in intau.

³ Sin bayongan in bangusa ain nonginum kon anggur ibognea inta mokotor. Datu mita kon dunia naa ain nogaid kon kotor takinnea, bo intau mita inta modagangmai kon dunia naa nooyúondon in ibognea inta diádon kotahangan tua.”

⁴ Bo akuoi in nokodongog kon singog ibanea nongkon soroga noguman nanaa, “Ḷuaidon, umat-Ku! Ḷuaidon nongkon bonunea! Sinbá moiko in diádon dumudui mogaid kon dosanea mita, bo moitakin motanggung kon hukumannea!

⁵ Sin dosanea in noyo-noyoguntuḷdon nodapot kon ḷangit, bo kinotoropanbí i Allah in bayongan aidnea inta moraat.

⁶ Tuḻíaidon kon inia naonda in pinogogaidnea kon i monimu; tuḻíaidon kodoyowa noguntuḷ kon inia in bayongan inta ain inaidannea. Bonuaidon palonea in oinumon inta kodua noguntuḷ in koboilnea nongkon oinumon inta ain sinadianea kon i monimu.

⁷ Ogoidon kon inia in roriga bo inta mokoajar kon gina inta motongkai in kobayong in kamuliaan bo kaoyúonan inta ain kinorasaannea tontaní. Sin sia in umuran moguman kon bonu in ginanea tontaní, ‘Akuoi naa in bokí inta momarenta! Akuoi naa in deemanbí mobobaḷu; akuoi in diábí mokorasa kon ajar in gina!’

⁸ Popisí in soaḷ tatuata, dá kon bonu in tosinggai tua sia koantugan in bodito – takit, kuyang in gina, bo malarat in kaanon. Bo sia in pokakon in tuḷu. Sin mokawasabí in ki Tuhan Allah inta mohakim kon inia tua.”

⁹ Datu mita kon dunia naa inta noitakin nogaid kon inta mokotor takinnea bo ibog in bobay tatua, in mongombaḷbí bo mogamui kon kotá tatua aka mosia in mokoontong kon poyok mobunod nongkon tuḷú inta momokak kon inia.

¹⁰ Mosia in simindogbí mokopoyayú sin moondok in koantugan in roriga tatua. Mosia in moguman, “Ado, totokdon in mobodito in kotá moḷoben tanaa – kotá in Babel inta moropot! Tongá kon bonu in tojam pinopoaidan in hukuman kon inimu!”

¹¹ Mododagang mita kon dunia naa nongombaḷ doman bo noajar in gina popisí in bobay tatua, sin diádon in tobatúmai intau motaḷui kon onu inta pinotaḷui monia.

¹² Diádon in motaḷui kon buḷawan, saḷaka, permata bo mutiara monia; kaeng moaḷus inta momahaḷ, kaeng nopars, kaeng sutra, bo kaeng inta nopura nogurang; bo norupa-rupamai in bahan inta nongkon kayu inta moḷawádon mouḻí, norupa-rupamaidon in bahan inta nongkon gading, norupa-rupamai domandon in bahan inta pinomia nongkon kayu momahaḷ, inta nongkon tambaga, nongkon uatoi, bo nongkon batu permata.

¹³ Kuḻit in kayu manis, pododungú mita, bahan mita mobondu, taḷong mobondu bo kamania, anggur bo ḷana, topong bo gandum; sapi, domba, kabaḷo bo kereta, ata mita, nodapot kon nyawa in intau.

¹⁴ Podagang mita tatua in noguman kon bobay tatua, “Bayongan inta kinoibogmu in diádon, bo bayongan inta momewa bo inta mogaga in noinggamádon nongkon tayowonmu. Diá bidon mouḻímu bui intua!”

¹⁵ Mosia inta nopotaḷui in bahan mita tatua bo inta ain nobaḻí nooyúon lantaran nopotaḷui kon bonu in kotá tatua, sinimindogdon iyumayú totok, sin moondok kotugatan in roriga tatua. Mosia in mongombaḷ bo mobaḷu,

¹⁶ poḷat mosingog, “Adodoia kaasí, totokdon moḷoben in bodito in kotá inta moḷoben tanaa! Biasamai mogiḷambung in sia nongkon kaeng inta moaḷus, kaeng nopars, bo kaeng nopura inta noguyang; biasamai sia nopuḻing in ḷambá buḷawan, permata, bo mutiara!

¹⁷ Táe tongá kon bonu in wakutu tojam, sia ain kinobuḻian in bayongan kaoyúonannea tatua!” Komintan kapiten in kapaḷ, intau mita inta sinumakoi, bo intau mita inta nogaid kon bonu in kapaḷ, takin bayongan intau inta totayaknea kon dagat, sinimindog nongkon noyayú.

¹⁸ Bo nomaḷú wakutu in mosia nokoontong kon poyok mobunod nongkon tuḷú inta nomokakak kon kotá tatua. Mosia in nomaḷú, “Diábí kon dodai in onda oyúon in kotá ibanea ná kotá inta moḷoben tanaa!”

¹⁹ Dá mosia in nopoinggú in ḷobud saḷaku tanda nobaḷu. Bo mosia in nongombaḷ poḷat nogamui, “Adodoia kaasí in kobobogat in bodito in kotá moḷoben tanaa! Kaoyúonannea ain nokopobaḻí kon bayongan intau inta kokapaḷ in dagat nobiag doman nooyúon! Táe tongá kon bonu i wakutu tojam sia in kinobuḻiandon in bayongan yagi-yagi!”

²⁰ Ei soroga, koḷungangadon kon kinorimumudan in kotá tatua! Ei umat i Allah, rasul mita, bo bayongan in nabi koḷungangadon in gina! Sin ki Allah ain nohukum kon inia saḷaku tontuḻí in aidnea kon i monimu!

²¹ Onda intua, tobatú malaekat inta moropot, nobingkat kon tobatú batu inta ná koḷoben in giḻingan, bo pinogambatnea kon bonu in dagat bo poḷat noguman, “Pomiaan natua in kotá in Babel inta moḷoben tua, pogambat koropoton sahingga in diádon bui ontongon.

²² Singog in kecapi inta kinuti in intau mita inta motaau mokuti bo dondong mita in intau inta modondong, bo singog in bansí bo singog in torompet, diá bidon kodongogan bui kon bonu in kotámu! Bo ahli mita mogogaid in diá bidon kodungkuḷan kon tua, sedang singog in giḻingan batu bo diá bidon in kodongogan kon tua.

²³ Intau mita in diá bidon mokoontong kon bayag in togá kon kotámu; bo diábí domandon kodongogan in poramean ponikaan kon tua. Podagangmu mita tua in intaubí mita moḷoben kon dunia naa, bo totaau pongonggaingmu tua in pinonguboḷmu kon bayongan in intau kon dunia naa!”

²⁴ Babel ihukum sin kon bonu in kotá tatua kinokadapatandon dugú in nabi mita, dugú in umat i Allah, singogon mako kopoḷokon dugú in bayongan intau inta ain iḻimod kon dunia naa.