WAHYU 16 - Alkitab Singog In Mongondow Masa In Tanaa

Bodito Pitu

¹ Bo akuoi in nokodongog kon singog moḷoben nongkon bonu in Baḷoi Allah noguman kon malaekat pitu tatua, “bayádon bo pobutakdon bonu in palo in torú i Allah inta pitu tanion kon tudu in butá!”

² Malaekat inta muna in minayá bo nopobutak bonu in palonea tatua kon tudu in butá. Dá nomukádon in bituḷ mita inta mokoondok bo mokobahaya kon intau mita inta oyúon in tanda in mahaḷuk mita tatua bo kon intau mita inta nosumba kon patongnea.

³ Onda intua malaekat induanea in nopobutak domandon bonu in palonea kon bonu in dagat, dá tubig kon dagat in nobaḻídon dugú naonda bo dugú in intau minatoi. Bo minatoidon komintan in mahaḷuk inta nobiag kon bonu in dagat.

⁴ Noiduduimai kon tua, malaekat intoḷunea nopobutak domandon bonu in palonea kon ongkag mita bo kon bayongan in bokaká dá nobaḻídon dugú in bayongan tubig tatua.

⁵ Bo dinongogku in malaekat inta nongawasa kon tubig, noguman nanaa, “Hukuman inta pinoḷabú-Mu tua in moadil, oo Allah Inta Totok in Motusi, Allah inta oyúon bo inta aindon oyúon!

⁶ Sin mosia ain nopobutak in dugú in umat mita i Allah bo dugú in nabi mita; tanaa mako pinoinum-Mu domandon in mosia in dugú, patusbí tarimaan monia intua!”

⁷ Bo dinongogku in singog nongkon meja pototuduan kon sosumba in noguman, “Tuhan, Allah inta Totok in Mokawasa, mobanar bo moadilbí in hukuman mita inta pinoḷabú-Mu!”

⁸ Nopaḷut mako kon tua, malaekat inggopatnea in nopobutak doman bonu in palonea kon mata in singgai, dá mata in singgai inogoidon momokak kon intau takin patúnea inta totok in motoyang tua.

⁹ Intau sinurubnea in patú inta nongkon i-Nia, bo mosia in nogodi-godimai kon tangoi i Allah inta nongawasa kon bodito mita tatua. Umpaka natuadon, táe mosia in doíbí doman in mogogai mogaid kon dosa mita monia bo doí doman modayow kon kamuliaan i Allah.

¹⁰ Bo malaekat iḻimanea in nopobutak doman bonu in palonea kon tampat pomomarentaan in mahaḷuk tatua. Dá bayongan dodatuan in mahaḷuk tatua in sinimindip. Bo popisí in moiḻiudon totok in nakitea, dá mosia in moikaḷut kon dilá.

¹¹ Bo mosia in mogodi-godimai kon i Allah inta kon soroga lantaran nakitea bo lantaran bituḷ mita monia. Táe umpaka natua mosia in doíbí doman mogogai in mogaid kon inta mongoraat.

¹² Onda intua malaekat inggonomnea in nopobutak doman bonu in palonea kon Ongkag Eprat inta moḷoben tatua. Dá ongkag tatua in noingkagdon sahingga datu mita nongkon timur mayádon mongintua.

¹³ Bo akuoi nokoontong kon dimukud moraat toḷu, inta naonda bo batangan in tumpaḷak. Tumpaḷak mita tatua iḻumuai nongkon bibig in naga, nongkon bibig in mahaḷuk bo nongkon bibig in intau inta mongaku nabi, táe deemanbí totuu nabi.

¹⁴ Mosia tua in dimukud mita moraat inta nogaid kon soaḷ mita inta mokoherang. Dimukud taya toḷu tatua in minayá kon bayongan datu kon dunia naa bo nosipun kon i monia sin moparang kon singgai inta moḷoben, Singgai i Allah Inta totok in Mokawasa.

¹⁵ “Indongogaidon! Akuoi in mamangoi ná mononakow! Mosanangdon totok in intau inta umuran mobasadia bo inta umuran monarukiramai kon pakeangnea, simbá diá mopilang in sia in maya-mayá mako, bo koontongan intau moantó in dodiaannea!”

¹⁶ Onda intua dimukud mita tatua in nosipun kon datu mita tatua kon tampat inta kon bahasa Ibrani sinangoian Harmagedon (Tampat poyoyangan/pomutúan.)

¹⁷ Nopaḷut mako kon tua malaekat impitunea in nopobutak domandon in palonea kon baḷangon. Dá kinodongogandon in singog moropot nongkon tampat pomomarentaan kon baḷoi i Allah, inta noguman, “Ain nopaḷut!”

¹⁸ Bo nongilatdon moyo-moyodudui bo gonugur in gotup mokoondok totok, bo ḻinug inta totok in motoyang. Diápa dodai onda in noḻinug námai tua in koropotnea, mulaipamai dunia naa pinomia. Tua in ḻinug inta totok in motoyang!

¹⁹ Kotá inta moḷoben tatua nobotak nosilai toḷu nosilai, bo norimumudon doman kotá mita in bayongan negara kon dunia inta diá nonotaau kon i Allah. Bo kinotoropandon i Allah in Babel, kotá inta moḷoben tua. Bo pinoinumdon i Allah in anggur nongkon palo anggur i Allah – tuata anggur torú-Nea inta moḷoben totok.

²⁰ Komintan pulau nobuḻi bo komintan buḷud diádon koontongan.

²¹ Uyan eis moḷoben, inta toḷoḻima nokilo in kosibuḷnea, noḷabú nongkon ḷangit bo noidantug kon intau mita. Dá mosia in nohojat kon i Allah popisí bodito uyan eis inta totok in motoyang tua.