WAHYU 14 - Alkitab Singog In Mongondow Masa In Tanaa

Ki Adí in Domba bo Umat-Nea

¹ Noidudui kon tua inontongku in ki Adí in Domba sinimindog kon tudu in Buḷud Sion. Kotaki-takinnea oyúon in 144.000 intau inta kon pogot monia ain pinaisan in tangoi-Nea bo tangoi i Amá-Nea.

² Bo dinongogku in singog nongkon ḷangit naonda bo singog in dunuk moḷoben bo ná doman singog in gotup inta totok in moropot. Singog inta dinongogku tua ná doman onda bo singog in kecapi mita inta kinuti in intau inta motaau mokuti.

³ Mosia tua in nopodondong in dondong inta mobagu kon tayowon tampat pomomarentaan bo kon tayowon in mahaḷuk opat bo itoi mita. Diábí in tobatúmai intau mokobalajar kon dondong tatua, koḻikudbí in intau inta 144.000 inta ain pinobebas nongkon dunia naa.

⁴ Mosia tua intau inta umuran nodarit naonda bo porawan, sin mosia in diábí mosiug takin bobay. Mosia in umuran dumudui magí-mako kon i Adí in Domba kon ondakabí in bayáan-Nea. Mosia in sinobutdon nongkon sigad in intau mita. Mosia tuata inta ain pinobebas bo inogoi saḷaku sosumba inta muna kon i Allah bo kon i Adí in Domba tatua.

⁵ Mosia in diábí dodai onda in monguboḷ; bo diábí doman in mokotor kon i monia.

Malaekat taya toḷu

⁶ Noiduduimai kon tua akuoi in nokoontong kon tobatú malaekat ibanea inta iḷumayug noḷantud kon ḷangit. Malaekat tatua in nodia kon Habar Mopia inta mononoi sin poyaputon kon intau kon dunia naa bo kon bayongan bangusa, suku bahasa bo negara.

⁷ Malaekat tatua in nomaḷú noropot totok, nanaa: “Koondokdon kon i Allah, bo pomuliadon in Sia! Sin naadon in wakutu i Allah mohakim kon dunia. Sumbadon in Sia inta ain nomia kon ḷangit, butá dagat bo bayongan in bokaká!”

⁸ Malaekat induanea in dinumudui kon malaekat inta muna bo sindaḷan mopobaḷú, “Ain noḷabú! Kotá in Babel inta moḷoben tatua ain noḷabú! Sia inta ain nopoḷoḷangu kon bayongan in bangusa takin tubig in anggur – tuata in anggur nongkon ibognea inta mokotor!”

⁹ Malaekat intoḷunea dinumudui doman kon malaekat taya dua tatua bo sindaḷan doman nopobaḷú noropot, nanaa, “Intau inta mosumba kon mahaḷuk tatua takin patongnea, bo oyúon tanda in mahaḷuk tatua kon pogot ande kon ḻimanea,

¹⁰ yo intau tatua monginum kon anggur i Allah, tuata in torú-Nea inta ain inaḻin-Nea kon bonu in tampat-Nea, bo diábí ginaatan topiḻikpamai! Intau mita tatua in toko sikisaan kon bonu in tuḷu bo balerang kon tayowon in malaekat mita motusi bo kon tayowon Adí in Domba tatua.

¹¹ Poyok in tuḷu inta mopororiga kon i monia tua in umuran bidon moidamonik. Singgai doḷom diá goga-gogaian poposikisaan kon i monia inta nosumba kon mahaḷuk tatua bo patongnea bo inta ain sinon tandaan in tangoi mahaḷuk tatua.”

¹² Dá kon naa, umat i Allah inta motoindudui kon parenta-Nea bo mosatia kon i Yesus, musti Mokopotabá.

¹³ Bo akuoi in bui nokodongog kon singog nongkon soroga noguman, “Paisdon in naa: Mulaidon tanaa mako, koḷungangadon in intau mita minatoi inta minatoi kon dodai in yogotpa nogaid kon oaidan i Tuhan!” “Totuu intua!” tubag in Roho i Allah. “Mosia in mogogai bidon mogaid kon oaidan monia, lantaran boḻi in pinogaidan monia umuran kotaki-takin monia.”

Hasil kon dunia

¹⁴ Noiduduimai kon tua, akuoi nokoontong kon tobatú goḷom mobudó. Kon tudu in goḷom tatua oyúon in tobatú intau iḻimitú naonda bo intau. Sia in nogi bandow in mahkota buḷawan bo kokada-kadai in sabit inta moḷanit.

¹⁵ Onda intua, tobatú malaekat ibanea iḷumuai nongkon Baḷoi i Allah. Bo malaekat tatua in nomaḷú kon i-Nia inta iḻimitú kon tudu in goḷom tatua, kai-nia: “Pongaḷoikadon in sabit-Mu nion bo yangkitdon tanaa mako, sin wakutuneadon mokoyut in naa, noguyangdon in dunia naa, motaaudon ratabon!”

¹⁶ Bo Sia inta iḻimitú kon tudu in goḷom tatua nopongaḷoi domandon in sabit-Nea kon dunia naa, bo sinoinutneadon bungai in dunia naa.

¹⁷ Noiduduimai kon tua akuoi in nokoontong doman bui kon tobatú malaekat ibanea inta iḷumuai nongkon Baḷoi i Allah kon soroga. Sia in nokadai doman kon sabit inta moḷanit.

¹⁸ Nopaḷut mako kon tua, tobatú malaekat ibanea, inta nongawasa kon tuḷu, namangoi nongkon meja pototuduan kon sosumba. Sia nomaḷú noropot kon malaekat inta nokadai kon sabit moḷanit tatua, “Pongaḷoidon in sabit-Mu nion bo sabitdon in bungai mita in anggur inta kon dunia sin nogurangdon mita in bungainea!”

¹⁹ Dá malaekat tatua nopongaḷoi domandon in sabitnea kon dunia naa bo nonyabit kon bungai mita in anggur tatua bodongka pinogambatnea kon bonu in giḻingan moḷoben, tuata in giḻingan torú i Allah.

²⁰ Bungai in anggur mita tatua in giniḻing kon ḷuai in kotá bo iḷumuaidon in dugú nongkon giḻingan tatua, moiḻig naonda bo ongkag. 300 km in koyayú in kinoiḻigannea, bo koḻinownea in gogió bodoyowá nometer.