WAHYU 12 - Alkitab Singog In Mongondow Masa In Tanaa

Bobay bo Naga

¹ Bo kinoontongandon kon ḷangit in tobatú tanda mokoherang inta totok in motoyang. Tobatú bobay inta nopogiḷambung mata in singgai, simindog mako kon tudu in buḷan. Kon uḷunea oyúon in bandow inta pinopobandangan in tundi mopuḷú bodoyowá.

² Bobay tatua in sidia, bo lantaran in wakutuneadon mononggadí dá mogamui in sia sin pomangitondon bo monakit domandon.

³ Bo inontong domandon in tanda mokoherang ibanea kon ḷangit. Oyúon tobatú naga nopura inta totok moḷoben, pitu in uḷunea bo mopuḷú in tungoinea. Pomuḷoi in uḷu pinakéan in mahkota.

⁴ Iputnea pinomorotnea, sahingga sepertiga in tundi nongototak kon butá. Naga tatua in simindog mako kon tayowon in bobay inta koyogot mononggadí tatua; sin monomayá moḻiom kon adí tatua aka pononggadídon i inánea.

⁵ Bo bobay tatua in nopononggadídon in tobatú adí ḷoḷaki inta momarenta kon bayongan intau kon dunia naa takin tungkud uatoi, táe adí tatua baḷú bo inagow nongkon i inánea bo dinia kon i Allah kon tayowon pomomarentaan-Nea.

⁶ Dá bobay tatua in noḷagui nopobayá in padang gurun, tampat inta ain sinadia i Allah kon inia. Sia in iḷukadan kon tampat tatua kon bonu in 1.260 nosinggai in koonggotnea.

⁷ Onda intua kon soroga nobaḻídon in parang. Ki Mikhael takin malaekatnea mita noparang kon naga tatua. Naga tatua in binantungan doman in malaekatnea mita noparang takin i Mikhael.

⁸ Táe sinaḷow in naga tatua, dá sia takin in malaekatnea mita diádon inogoi nogutun kon soroga.

⁹ Naga inta moḷoben tatua in pinogarab kon ḷuai! Sia tua in uḷag guranga, Ibilis in tangoinea ande Dimukud Moraat, inta monguboḷ magí-mako kon dunia naa. Sia in iḷumbú kon dunia naa takin malaekatnea mita.

¹⁰ Bo akuoi in nokodongog kon singog noḷangon nongkon soroga inta noguman, “Tanaadon in wakutunea ki Allah moposaḷamat kon umat-Nea! Tanaadon in wakutunea ki Allah mopoontong in kawasa-Nea saḷaku Datu! Tanaa in Datu Mopoposaḷamat inta pinodandi tatua mopoontong domandon in kawasa-Nea! Sin ki inta moponapudmai doḷom bo singgai kon i utat naton ain pinoḷuai nongkon soroga.

¹¹ Dugú i Adí in Domba bo Habar Mopia nongkon i Allah inta pinotaau monia, tua in pinaké i utat mita naton nonaḷow kon inia. Mosia in diábí moondok in matoi.

¹² Tuamai, koḷungangadon in gina iko soroga bo bayongan inta nogutun kon bonunea! Táe moboditodon in moiko butá bo dagat, sin Ibilis ain noponag kon i monimu takin sinumorú totok sin kinotaauanneadon kon motoyongdon totok in wakutunea.”

¹³ Kon wakutu in naga tatua nosadardon kon sia ain pinogonag kon butá, mulaidon in sia mogaḷow kon bobay inta nopononggadí in adí ḷoḷaki tatua.

¹⁴ Táe bobay tatua inogoiandon in koḻikip doyowa. Koḻikip in boniá moḷoben, sinbá ḷumayug in sia mayá in tampatnea kon padang gurun, tampat inta poḷukadan kon inia kon bonu in toḷu notaong kapin, sin pomiḷagui kon uḷag.

¹⁵ Dá uḷag tatua in noporoput in tubig moḷoben naonda bo ongkag. Pinoroputnea kon bobay tatua sinbá moḷomot kon tubig tatua.

¹⁶ Táe bobay tatua sinuḷungan in butá, binuká in butá tatua in bibignea bo noḻiom kon tubig inta iḷumuai nongkon bibig in naga tatua.

¹⁷ Naga tatua totokdon in sinumorú kon bobay tatua, sahingga minayá nogaḷow kon buí in bobay tatua inta ibanea. Mosia inta umuran dinumudui kon parenta i Allah bo inta nobogoi in kosakusian soaḷ ki Yesus bo kawasa-Nea.

¹⁸ Bo naga tatua in sinimindog kon pintad.