ULANGAN 9 - Alkitab Singog In Mongondow Masa In Tanaa

Kuaḷok in bangusa Israel

¹ “Indongogai Utat mita! Singgai naa moiko ḷumoḷandon kon Ongkag in Yordan sin mayá ḻimitú kon butá in bangusa mita inta moḷobe-ḷoben bo moropo-ropot nongkon i monimu. Kotá mita monia mongoḷoben bo dininding nodapot in ḷangit.

² Intaunea mita mongoḷoben bo mongotorindog in awak monia; mosia tua in tuyá, bo dinongogdon monimu kon diábí tobatúmai in mokotaḷow kon i monia.

³ Táe tanaa, ontongonbí monimu tontaní naonda in ki Tuhan Allahmu mayá kon muna monimu naonda bo tuḷú inta mokopokak. Sia in monaḷowbí kon i monia kon tayowonmu, dá kountunan bo koyopúanbí monimu in mosia motoyong ná inta pinodandi i Tuhan.

^4-5 Naonda in ki Tuhan Allahmu mopoguntun kon i monia kon tayowonmu, dikabí morai kon moiko in dinia-Nea minayá intua sin pobogoian kon butá tatua popisí in moiko mopia bo nogaidon kon onu in kinoibog i Tuhan Allahmu dá patusdon in moiko motarima kon tua. Deemanbí natua! Ki Tuhan nopoguntun kon bangusa mita tatua kon tayowonmu sin moraat in mosia. Pinomayá mako i Tuhan in moiko mogamá kon butá monia, sin Sia moibog mogintompod kon dandi-Nea kon mogoguyangmu ki Abraham, ki Ishak bo ki Yakub.

⁶ Pokoyakin kon ki Tuhan Allahmu in diábí noposarakan in butá mopia tatua kon inimu popisí in moiko patus motarima kon tua. Deemanbí natua! Moiko nion in bangusabí inta motogat in gina.

⁷ Toropbí naonda in pinogogaid monimu nodapot in ki Tuhan Allahmu sinumorú kon padang gurun. Pinangkoi kon moiko nonaḷámai kon Mesir nodapot in moiko nodapot in naa, moiko ain noḷawang kon i Tuhan.

⁸ Ondapa doman inta kon Buḷud in Sinai pinoyaat totok monimu in gina i Tuhan, nodapot in Sia moyopúdon kon i monimu.

⁹ Akuoi notakod kon buḷud tatua sin motarima kon batu dodandian inta pinomia i Tuhan takin i monimu. Opat nopuḷú nosinggai bo opat nopuḷú nogobii in koonggotnea akuoi nogutun kon buḷud tatua takin diá nopongaa-ngaan ande diá noponginu-nginum.

¹⁰ Onda intua ki Tuhan nobogoi kon inakó in batu doyowa inta ain pinaisan i Allah tontaní. Kon batu tatua pinais in singog mita inta siningog-Nea kon i monimu nongkon yua-yuak in tuḷú, kon tungkuḷ in moiko noyosipun kon simpangkoion in buḷud.

¹¹ Oo, naonda in noitaḻib in opat nopuḷú nosinggai bo opat nopuḷú nogobii, ki Tuhan nobogoi kon inakó in batu dodandian doyowa tua.

¹² Bo ki Tuhan noguman kon inakó, ‘Ḷagidon posiḻig, sin bangusamu inta diniamu iḻumuai nongkon Mesir nomiadon kon inta moraat. Mosia sinumabatdon nongkon parenta-Ku mita, bo nomiadon kon patong sin sumbáan.’

¹³ Ki Tuhan noguman doman kon inakó, ‘Kinotaauan-Kubí kon bangusa tatua in totokbí in motontogat in gina.

¹⁴ Dika monungkuḷ moḷamboi kon i-Nakó. Yopúon-Kudon in mosia modapot in mosia diádon kotoropan bui. Táe iko in baḻíon-Kudon amá in tobatú bangusa inta moḷobe-ḷoben bo moropo-ropot nongkon i monia.’

¹⁵ Bo nomurow in akuoi, bo takin ḻima doyowa nosimpaḷ kokada-kadai in batu doyowa pinomaisan kon dodandian, nosiḻig in akuoi kon buḷud inta kodoko-dokot.

¹⁶ Inontongkudon kon moiko ain noḷawang kon parenta i Tuhan Allahmu. Moiko binaradosadon kon i Tuhan sin nomiadon kon patong sapi nongkon logam sin sumbáan monimu.

¹⁷ Dá kon tayowon i monimu batu doyowa inta pinomaisan kon dodandian tatua pinogonagku nodapot in norimumud.

¹⁸ Bo komintanpa doman in akuoi minayá dinumokó kon tayowon i Tuhan kon tudu in buḷud opat nopuḷú nosinggai bo opat nopuḷú nogobii in koonggotnea takin diá nopongaa-ngaan ande diá noponginu-nginum. Tua in pinomiaku sin moiko aindon nogaid kon dosa kon i Tuhan takin nomia kon onu inta inanggap-Nea moraat, dá sinumorú in Sia.

¹⁹ Akuoi moondok kon torú i Tuhan inta modoko-dokot kon i monimu dá ibogon-Nea in moiko yopúondon, táe kon naa ki Tuhan buipa doman noibog nokidongog kon oigumku.

²⁰ Ki Tuhan sinumorú doman totok kon i Harun nodapot in moibogdon in Sia moḻimod kon inia, dá akuoi nosambayang doman kon inia.

²¹ Patong sapi inta pinomiamu, pinogambatku kon bonu in tuḷú. Bo irimumudku bo dinodok nodapot in noyimok totok naonda bo ḷobud, bo ḷobud tatua pinogambatku kon bonu in tapá inta noiḻig nongkon buḷud tatua.

²² Ná doman tua in kon Tabera, kon Masa bo kon Kibrot-Taawa, moiko nokopomukádon in torú i Tuhan.

²³ Bo kon dodai in moiko pinotabá i Tuhan monaḷámai kon Kades-Barnea sin mayá bo ḻimitú kon butá inta bain ogoi-Nea kon inimu, moiko noḷawang kon parenta i Tuhan Allahmu; moiko doí mopirisaya ande motoindudui kon i-Nia.

²⁴ Pinangkoipamai kon kinotaauanku in moiko, moiko umuran moḷawang kon i Tuhan.

²⁵ Kinotaauankubí kon ibogon i Tuhan yopúon-Neadon in moiko. Dá kon bonu in opat nopuḷú nosinggai bo opat nopuḷú nogobii akuoi dinumokó kon tayowon i Tuhan

²⁶ bo nosambayang nanaa: O Tuhan Inta Totok in Moḷantud, dikadon yopúon in umat kapunyaan-Mu tanaa, bangusa inta pinoḷuat-Mudon bo dinia-Mu iḻumuai nongkon Mesir takin ropot bo kawasa-Mu inta moḷoben.

²⁷ Toropbí in bobantungmu mita ki Abraham, ki Ishak bo ki Yakub, bo dikadon indoianmai in dodia motontogat in gina, raat bo dosa in bangusa tanaa.

²⁸ Aka umat-Mu yopúon-Mu doman, dá intau mita in Mesir in mosingogbí kon Iko in diábí mokosanggup in modia kon bangusa-Mu mayá in butá inta pinodandi-Mu kon i monia, bo Iko nodia kon i monia mayá in padang gurun sin ḻimodon, sin moyaat in gina-Mu kon i monia.

²⁹ Táe toropdon, o Tuhan, kon mosia naa in bangusa inta piniḻí-Mu nobaḻí umat-Mu, bo dinia-Mu nongkon Mesir takin ropot bo kawasa-Mu inta moḷoben.”