ULANGAN 5 - Alkitab Singog In Mongondow Masa In Tanaa

Parenta i Allah inta Mopuḷú

¹ Ki Musa in nosipun kon bayongan bangusa Israel, bo noguman kon i monia, “Utat mita, indongogai in hukum mita inta pinotaauku kon inimu singgai in naa. Balajardon in hukum mita tatua, bo duduiai koposatia.

² Kon Buḷud in Sinai ki Tuhan Allah naton in nomia kon dodandian tobatú,

³ deemanbí tongá kon mogoguyang naton, táe takinbí in bayongan naton kon naa.

⁴ Nongkon tuḷú kon tudu in buḷud tatua ki Tuhan moibog mongonguman moyogintayowan monimu.

⁵ Táe popisí in moiko moondok kon tuḷú bo diá mokobaḻí in motakod kon buḷud, dá akuoi in dodai in tua in sinimindog kon sigad monimu bo i Tuhan sin mopotaau in tosingogon i Tuhan kon inimu. Ki Tuhan nopotaau,

⁶ ‘Akuoi in ki Tuhan Allahmu inta nodia kon i monimu iḻumuai nongkon Mesir, tampat inta pinononggataan kon i monimu.

⁷ Dika mosumba kon ilah mita ibanea. Tongádon Akuoi in sumbáan.

⁸ Dika in iko momia kon patong inta pinodayan kon onu in kon ḷangit, kon butá ande kon bonu in tubig kon ḻimonag in butá.

⁹ Dika mosumba kon patong ná tatua sin Akuoi in ki Tuhan Allahmu bo Akuoi in doíbí potongkaion in onuka. Intau mita inta moyaat in gina kon i-Nakó hukumon-Ku modapot in buí monia mogintoḷu bo moginggopat.

¹⁰ Táe tabi-Ku in poniata-Ku kon ribuan in buí nongkon intau mita inta motabi kon i-Nakó bo motoindudui kon parenta-Ku.

¹¹ Dika pomuḷoi mako in kinotango-tangoinea kon tangoi-Ku, sin Akuoi, ki Tuhan Allahmu, mohukum kon i ineka inta mopomia ibo-ibog kon tangoi-Ku.

¹² Porameaibí in singgai in Sabat bo horomatbí mobaḻí singgai inta motusi, sin Akuoi ki Tuhan Allahmu inta nobogoi in parenta kon inimu.

¹³ Moiko inogoian-Ku in onom nosinggai in pogaidan,

¹⁴ táe singgai noginpitu tua in singgai pogogaian inta tondíondon kon i-Nakó, ki Tuhan Allahmu. Kon singgai tatua diábí motaau in tobatúmai intau in mogaid, pinomayá moiko, adímu mita, bobantungmu mita, bobiagonmu ande intau ango-angoi inta nogutun kon butámu. Bobantungmu mita in musti mogogai ná doman moiko.

¹⁵ Toropdon kon moiko in koḻipod in sinonggata doman kon Mesir, bo pinoḷuat i Tuhan Allahmu takin ropot inta moḷoben. Tuamai moiko parentaan-Ku sinbá morame kon singgai in Sabat.

¹⁶ Horomat bo ḷukadai in ki amá bo ki inámu; tuata in parenta-Ku, ki Tuhan Allahmu, sinbá moiko mobiag motompia bo moḷanggó in kobiagan kon butá inta bain ogoi-Ku kon inimu.

¹⁷ Dika moḻimod.

¹⁸ Dika monuaḻing.

¹⁹ Dika monakow.

²⁰ Dika moposakusi in uboḷ kon intau ibanea.

²¹ Dika moibog in kapunyaan in intau ibanea: pinomayá baḷoinea, butánea, ki buḷoinea bobay, bobantungnea mita, bobiagonnea, keledainea ande onuka in kon inia.’

²² Tuata in parenta mita inta inogoi i Tuhan kon i monimu kon tungkuḷ in moiko noyosipun kon buḷud. Kon dodai in sia nosingog noropot totok nongkon tuḷú bo goḷom inta mobunod, Sia nobogoi in parenta mita tatua, bo deemanbí ibanea mako. Bo pinais-Nea kon batu tulis doyowa bo inogoi kon inakó.”

Intau Israel inagían in ondok

²³ “Kon tungkuḷ in bayongan buḷud dinumokot bo moiko nokodongog kon singog nongkon sindip, bayongan guhanga in sukumu bo intau mita noitoḻiuna kon i monimu namangoi kon inakó.

²⁴ Mosia noguman, ‘Ki Tuhan, Allah naton, ain nopoontong kon i naton in kamuliaan bo kawasa-Nea, bo singog-Nea aindon dinongog naton nongkon yuak in tuḷú. Singgai naa aindon inontong nami, ki Tuhan ain nongonguman takin intau bo intau tatua in umuranpa nobiag.

²⁵ Táe nongonu sin kami in mustipabí mopotaru bui in nyawa nami? Tuḷú inta motoyang tatua in momagong kon inami! Moyakinbí in kami kon matoibí in kami aka mokodongog kon ki Tuhan Allah mosingog bui.

²⁶ Kon dodaidon in onda in intau umuran nobiag naonda in nokodongog kon i Allah inta nobiag nosingog nongkon tuḷú?

²⁷ Tuamai, bayádon Musa, bo indongogai in bayongan inta pinoguman i Tuhan Allah naton, bo potaaudon kon i nami onu in pinoguman-Nea kon inimu. Indongoganbí bo duduian nami.’

²⁸ Nokodongogmai kon natua, ki Tuhan noguman kon inakó, ‘Dinongog-Kudon onu in siningog in bangusa tatua, bo totuubí in tosingogon monia.

²⁹ Tungkuḷaika aka mosia tua bo umuran natua in porasaan! Tungkuḷai aka mosia umuran mohoromat kon i-Nakó bo motoindudui kon bayongan in parenta-Ku, modapot in mosia bo buí monia umuran mobiag motompia!

³⁰ Bayádon bo potabádon in bangusa tatua bui mayá in ḷoḷaigan monia tontaní.

³¹ Táe iko, Musa, pobuidon mangoi bo pogutundon takin-Ku kon naa; iko in pobogoian-Ku kon bayongan hukum bo parenta-Ku. Tundúdon kon i monia, sinbá duduian monia intua kon butá inta ogoi-Ku kon i monia.’

³² Utat mita, duduiai pokosatia in bayongan inta pinarenta i Tuhan Allahmu kon inimu. Dika ḻimimpat kon tobatúmai nongkon parenta mita tatua.

³³ Aidaidon in bayongan inta pinarenta i Tuhan Allahmu kon inimu sinbá moiko mobiag motompia bo umuran mogutun kon butá inta pogutunan monimu.”