ULANGAN 4 - Alkitab Singog In Mongondow Masa In Tanaa

Ki Musa nononggina kon Israel sinbá motoindudui

¹ Bo ki Musa noguman kon bangusa tatua, “Duduiaidon komintan in hukum inta tundúonku kon inimu, sinbá mobiag in moiko bo moiutun kon butá inta bain ogoi i Tuhan, Allah in mogoguyangmu, kon inimu.

² Onu in pinogumanku, dika dugangan ande gaatan topiḻikmai. Duduiandon in parenta mita i Tuhan Allahmu inta pinotaauku kon inimu.

³ Moiko ain nokoontong tontaní kon onu inta ain inaidan i Tuhan Allahmu kon Buḷud in Peor. Bayongan intau inta nosumba kon Baal kon tampat tatua iyopú-Nea,

⁴ tongá moiko inta umuran notoindudui kon i Tuhan Allahmu nobiagpa dapot in tanaa mako.

⁵ Bayongan in hukum tatua sinundúku kon inimu ná inta pinarenta i Tuhan Allahku. Duduiaidon intua komintan kon butá inta bain tuotan bo ḻitúan monimu tua.

⁶ Aidai intua pokosatia. Aka aidan monimu in natua, dá kobobijaksanamu in moniatadon kon bangusa mita ibanea. Aka kodongogandon monia in hukum mita tatua, yo mosia in mogumanbí nanaa, ‘Totuu mobijaksana bo mopandoi in bangusa inta moḷoben tatua!’

⁷ Bangusa moḷobenbí kon onda in ko ilah inta námai tua in kododagin aka paraḷuon ná kododagin i Tuhan Allah naton kon i naton? Sia in motubag toonukabí in kita mokuani mokituḷung kon i-Nia.

⁸ Bo bangusabí moḷoben táonda in oyúon hukum mita inta námai tua in kooadil ná hukum mita inta sinundúku kon i monimu singgai naa?

⁹ Taridi bo toropdon kopiaan, sinbá kinoouput in kinobiaganmu diá koḻiongan monimu onu inta ain inontong monimu tontaní. Oumandon kon adí bo ompumu

¹⁰ soaḷ singgai tatua, kon tungkuḷ in moiko sinimindog kon tayowon i Tuhan Allahmu kon Buḷud in Sinai. Kon dodai intua Sia in noguman kon inakó, ‘Sipundon in bangusa tatua. Ibogon-Ku in mosia mokidongog kon onu in poguman-Ku, sinbá mosia in mobalajar motoindudui kon i-Nakó kinoouput in kinobiagan monia, bo bá mosia motundú kon i adí mita monia sinbá motoindudui kon i-Nakó.’

¹¹ Oumandon kon i adímu mita naonda in oangoi monimu bo sinimindog kon pangkoi in buḷud inta kinokoḷoban in poyok morondí bo goḷom mobunod bo tuḷúnea nodokot nodapot in ḷangit.

¹² Onda intua ki Tuhan nosingog kon inimu nongkon bonu in tuḷú bo dinongog monimu in singog-Nea, táe diábí inontong monimu mongo naonda in batangan-Nea.

¹³ Kon tua in Sia nopotaau kon inimu onu inta musti aidan monimu sin mogintompod kon dandi inta pinomia-Nea takin i monimu. Parenta Mopuḷú inta ain pinais-Nea kon batu tulis doyowa tua musti aidan monimu.

¹⁴ Ki Tuhan nopotabá kon inakó motundú kon inimu in bayongan hukum inta musti duduian kon butá inta bain tuotan bo pogutunan monimu tua.”

Tompoingat sinbá diá mosumba kon ilah ibanea

¹⁵ “Toropdon kopia! Kon dodai in ki Tuhan nosingog kon inimu nongkon bonu in tuḷú kon Buḷud in Sinai, moiko in diábí nokoontong kon onu bo onu.

¹⁶ Dá ḷukadaidon sinbá moiko diá modapot in baradosaan sin mogaid kon patong inta sumbáan monimu tontaní naondaka in batangannea, ḷoḷaki ande bobay,

^17-18 ḷagapan ande toyá, mahaḷuk ḷumandai ande mahaḷuk ibanea.

¹⁹ Dikadon baradosaan popisí in mosumba bo mogundoi kon onu inta inontong monimu kon ḷangit: mata in singgai, buḷan bo tundi mita. Pinomayá mako i Tuhan Allahmu in bangusa mita ibanea nosumba kon tua mita.

²⁰ Táe moiko in bangusa inta pinosaḷamat-Nea nongkon Mesir, tampat inta kinororigaan totok monimu. Moiko in dinia-Nea iḻumuai nongkon butá tatua, sinbá mobaḻí bangusa-Nea tontaní ná kaadaanmu tanaa mako.

²¹ Táe ki Tuhan Allahmu sinumorúdon kon inakó popisí in moiko, bo Sia in nongibot kon akuoi in diábí moiḷoḷan kon Ongkag in Yordan sin tumuot kon butá mopia inta bain ogoi-Nea kon inimu.

²² Diádon moonggot bo moiko ḷumoḷan poḷat ḻimitú kon butá inta mopia tua; táe akuoi in diábí moitakin, sin akuoi in matoidon kon naa.

²³ Toropdon kopira! Dika mokoḻiong kon dodandian inta pinomia i Tuhan Allahmu takin i monimu. Duduiaidon in parenta-Nea; dika mokoimontanmai in iko momia kon patong naondaka in batangannea sin sumbáan,

²⁴ sin ki Tuhan Allahmu naonda bo tuḷú inta mokopokak. Sia in doíbí potongkaion in onukadon.

²⁵ Ná doman tua aka moiko moonggotdon in mogutun kon butá tatua bo mononggadí dapot in mononggompu, yo dika baradosaan popisí in momia kon patong naondaka in batangannea sin sumbáan monimu. Oaid natua in oaidbí moraat kon tayowon i Tuhan Allahmu bo mokopopisídon kon i-Nia tumorú.

²⁶ Poigumon mako ḷangit bo butá mobaḻí sakusi kon aka moiko diá motoindudui kon inakó, moiko in ḷagidon moyopú nongkon butá inta pogutunan monimu kon ḷoḷan in Ongkag in Yordan tatua. Moiko in diábí moonggot in mogutun kon tua; moiko in modaitbí yopúon.

²⁷ Poyayitonbí i Tuhan in moiko kon sigad in bangusa mita ibanea bo tongádon topiḻik in mobiag in kon sigad monimu.

²⁸ Kon tua moiko in mogundoi kon ilah mita inta pinomia in intau, ilah mita inta nongkon kayu bo batu inta diá mokoontong bo diá mokodongog, diá motaau mongaan ande diá mokobó.

²⁹ Bo moiko in motayakdon kon i Tuhan Allahmu, bo aka moiko motayak kon i-Nia takin ginamu totu-totuu, yo mouḻímubí in Sia.

³⁰ Aka moiko koantugan in bayongan bodito tatua bo moiko kon bonudon in roriga, dá moiko in mobuidon mangoi kon i Tuhan Allahmu bo motoindudui kon i-Nia.

³¹ Ki Tuhan Allahmu in Allahbí inta totok in kototabi. Sia in diábí monaḷámai ande moyopú kon i monimu, ande moḻiong kon dodandian inta pinomia-Nea tontaní takin mogoguyangmu.

³² Tarididon in singgai koḷabung, kon dodai in moiko diápa pinononggadí, pinangkoi kon singgai kon wakutu in ki Allah nomia kon intau kon dunia naa. Tayakdon kon bayongan dunia. Dodaibí in onda in soaḷ inta motoyang tua nobaḻí? Dodai in onda in oyúon in intau inta nokodongog kon soaḷ onu inta nobaḻí ná tatua?

³³ Kon dodaidon in onda oyúon in bangusa tobatú inta umuran nobiag naonda in nokodongog kon ilah tobatú nosingog kon i monia nongkon tuḷú, ná inta kinoyitakan monimu?

³⁴ Dodai in onda in oyúon in ilah tobatú inta nobarani nogamá kon bangusa tobatú nongkon bangusa mita inta oyúon bodongka binaḻí umatnea tontaní, ná inta inaidan i Tuhan Allahmu kon inimu kon Mesir? Inontongdon monimu tontaní naonda in ki Allah takin ropot inta moḷoben nopoangoi in bodito bo parang, nomia kon inta mokoherang mita bo nomia kon soaḷ mita inta motoyang totok.

³⁵ Tua komintan pinoontong i Tuhan kon inimu sin moponiata kon tongábí ki Tuhan tua in Allah, bo diábí in ibanea mako.

³⁶ Nongkon ḷangit in Sia mopodongog in singog-Nea kon inimu sin motundú kon i monimu; kon dunia naa Sia nopoontongdon kon inimu in tuḷú-nea inta motoyang, bo nongkon tuḷú tatua nosingog in Sia kon inimu.

³⁷ Popisí in motabi in Sia kon mogoguyangmu, dá moiko aindon piniḻí-Nea; takin kawasa-Nea inta moḷoben moiko dinia-Neadon iḻumuai nongkon Mesir.

³⁸ Bangusa mita inta moḷobe-ḷoben bo moropo-ropot pinoguntun-Nea nongkon tayowonmu, sin mogatod kon i monimu mayá in butá monia inta inogoi-Nea kon inimu, butá inta masai naa nobaḻídon kapunyaanmu.

³⁹ Tuamai kosadardon in singgai naa bo dika koḻiongan: ki Tuhan in tongábí Sia tua in ki Allah kon ḷangit bo kon dunia; diábí in ibanea mako.

⁴⁰ Duduiaidon in bayongan hukum inta inogoiku kon inimu singgai naa, dá moiko bo buímu in mobiag motompia bo umuran oyúon kon butá inta inogoi i Tuhan Allahmu nobaḻí kapunyaanmu mononoi.”

Kotá mita pogogadopan kon dotá in pomukaan kon Ongkag in Yordan

⁴¹ Bo ki Musa notundú kon kotá toḷu kon dotá in pomukaan kon Ongkag in Yordan

⁴² nobaḻí kotá pogogadopan, tampat in intau moposaḷamat in awak monia aka sia takin diá sinumuod ain nokoḻimod kon intau inta deemanbí musungnea. Sia in motaaubí moḷagui mayá in kotá tobatú inta kon sigad in kotá mita tatua sinbá diá doman ḻimodon.

⁴³ Kon suku in Ruben sinadiadon kotá in Bezer kon tampat inta moḷantud kon padang gurun; kon suku Gad sinadiadon kotá in Ramot kon butá in Gilead, bo kon suku in Manasye kotá in Golan kon butá in Basan.

Bangusa Israel inogoian in hukum i Allah

⁴⁴ Bo ki Musa nobogoi in hukum bo atorang mita i Allah kon bangusa Israel.

^45-46 Tua inaidannea naonda in mosia iḻumuai nongkon Mesir bo naonda in kon ḷopá kon dotá in pomukaan kon Ongkag in Yordan, noyogintayow in kotá in Bet-Peor. Butá tatua pernabí nobaḻí butá in Sihon, datu intau in Amori, inta tungkuḷ intua nomarenta kon kotá in Hesybon. Ki Musa bo bangusa Israel nonaḷow kon inia kon dodai in mosia iḻumuai nongkon Mesir.

⁴⁷ Mosia nokoḻitú kon butá i Datu Sihon tua, bo butá doman i Datu Og nongkon Basan, Datu in Amori ibanea tobatú inta nogutun kon dotá in pomukaan kon Ongkag in Yordan.

⁴⁸ Butá tatua nobendar nongkon kotá in Aroër kon bingkí in Ongkag in Arnon, minayá turus ná utuan nodapot kon Buḷud in Siryon, tuata in Buḷud in Hermon,

⁴⁹ bo bayongan butá kon dotá in pomukaan kon Ongkag in Yordan minayá ná toḷatan nodapot kon Laut Mati kon sipangkoion in Buḷud Pisga.