ULANGAN 32 - Alkitab Singog In Mongondow Masa In Tanaa

¹ “Indongogaidon, ei ḷangit, akuoi in moibog mopotaau; ei butá, indongogaipa!

² Poigumon mako in topotundúku mamonag naonda bo uyan, bo tosingogonku motait naonda bo oḷú, naonda bo rinsi-rinsik in uyan kon tudu in bonok, bo uyan inta morogot kon pinomuḷa mita.

³ Akuoi in modayow kon tangoi i Tuhan. Potaaudon in kokokawasa i Allah naton!

⁴ Ki Tuhan in mododuḷumu inta moroton, oaidan-Nea in motonggimok, bo bayongan daḷan-Nea in motuḻid. Ki Allahmu in mosatia, diábí in tombogá kon i-Nia, Sia in nogaid kon onu inta mopia bo totuu.

⁵ Táe moiko in bangusa inta diá motoindudui, bo diádon patus mobaḻí umat-Nea, bangusa inta nopuḻing in aid motombogá bo dosa.

⁶ Natua degá in pototuḻí monimu kon kopopia i Tuhan, ei intau mita dondunguḷ bo diá koraian? Diá kinotaauanmu kon Sia in ki Amámu, inta nomaḻí kon inimu inta nomia kon i monimu bangusa tobatú?

⁷ Toropdon in singgai muna, taridiaidon in singgai mita tungkuḷ intua. Ḻibódon kon guyangamu, sinbá mosia in mopotaau kon inimu.

⁸ Kon dodai in ki Inta Totok in Moḷantud nosilai kon butá, batúan bangusa sinantúdon in butánea takin ilah tobatú in nobaḻí pongawasa.

⁹ Táe buí i Yakub in tanaa piniḻí i Tuhan kon i-Nia tontaní.

¹⁰ Nouḻí-Nea in mosia koyogot modondaḷoi kon tampat inta noingongow kon padang belantara. Bo inoḻiungan-Nea poḷat iḷukadan in mosia bo pinoḷoḷukad-Nea kon i monia in naonda bo Sia in kitogi.

¹¹ Naonda bo ḷagapan boniá inta motundú kon i adínea ḷumayug singkaponnea kon koḻikip inta nosongká bo babaannea kon tudu in koḻikipnea mita,

¹² natuata ki Tuhan tontaní in nodia kon umat-Nea, diábí in ilah ibanea in sinumakin kon inia.

¹³ Binaḻí-Nea in mosia nongawasa kon buḷud mita; mosia in nokaan kon bungai in boyó kon gobá mita monia bo nonginum kon biluk in kayuon kon buḷud batu. Mosia nokouḻí kon ḷana nongkon pangkoi in zaitun inta nobiag kon butá inta nopuḻing in batu.

¹⁴ Sapi bo bembé domba monia mobogoi in susu inta mobarong; bobiagon monia totok in mongopia, gandum bo tubig in anggur monia in totok mopia.

¹⁵ Umat i Tuhan nobaḻí nobiag nooyúon, táe moibog momarontak, mosia in nongoḷongó, nobotug in kaanon. Bo mosia in nonaḷámai kon i Allah, inta nomaḻí kon i monia bo nondoí kon Mopoposaḷamatnea inta moroton.

¹⁶ Mosia in nosumba kon berhala, dá nointoi in ki Tuhan, torú-Nea nomuká popisí in aid moraat tatua.

¹⁷ Mosia noposumba in kuruban kon dimukud mita moraat inta deemanbí ki Allah, kon i ilah mita inta diá kinotaauan monia, ilah mita mobagu inta diá kinoondok in mogoguyang monia.

¹⁸ Mosia in nonoḻikudon kon Mopoposaḷamat monia inta motoyang, noḻiongdon kon i Allah monia inta nobogoi in kobiagan.

¹⁹ Nokoontong kon tua, ki Tuhan sinumorú, bo nondoídon kon i adí-Nea mita.

²⁰ Guman-Nea, ‘Akuoi in doí bidon motuḷung kon i monia bui; umpakabí indoian-Kudon mako in kororiga monia. Sin bangusa tatua motontogat in gina bo beresibí diá motoindudui.

²¹ Pinomia monia in Akuoi nointoi kon inta deeman Allah, bo sinumorú kon patong in berhala monia. Dá binaḻí-Ku in umat-Ku nointoi kon inta deeman bangusa-Ku, bo sinumorú kon bangusa inta pompuḷong.

²² Torú-Ku in moborambangdon naonda bo tuḷú inta momokak modapot kon dunia in intau minatoi. Tuḷú tatua in momokak kon bayongan in butá takin tombonunea, bo buḷud mita modapot in kon uakatnea mita.

²³ Tantú-Kubí popoangoi in bodito, Popiot-Ku in bayongan piot-Ku kon i monia.

²⁴ Mosia in matoibí popisí in morintonow bo gogoyon, bo popisí doman in takit inta mokoondok. Pomayá-Kudon mako in mosia domokon in mahaḷuk moraat, bo tobakon in uḷag mobisa.

²⁵ Parang in modia kon kopopatoi kon daḷan mita; mokoondok in moiuma kon intau mita kon baḷoi. Tayow mobiag bo mongodeaga mita batánea in tokoyopúon, bo adí doman mointok bo intau inta nogoguyangdon.

²⁶ Akuoi in moibogdon moyopú kon i monia komintan, sinbá mosia in diádon kotoropan bui.

²⁷ Táe doíbí in Akuoi aka musung in Israel dumodia; dika-dika bo moitaḷá mosangka bo moguman kon mosia in nonaḷow kon umat-Ku,’ bokaka Akuoibí in nogaid kon tua.

²⁸ Israel in bangusa tobatú inta diá mogiapmai; diá in pongortian kon i monia.

²⁹ Aka kuma bo mosia mobijaksana, momangaḻebí in mosia, bo morai kon kopaḷutan monia.

³⁰ Naonda in intau tobatú mogaḷow kon intau toribu, bo intau doyowa mokopoguntun kon intau mopuḷú noribu modapot in moḷagui? Ki Tuhan, Allah monia, nopotaḷuidon kon i monia; mosia in sinaḷáandon i Allah inta moroton totok.

³¹ Musung in Israel nonotaau kon pogogadopan monia diábí ná ki Allah inta mogogoḻiung in Israel.

³² Sin mosia in moraat naonda bo Sodom bo Gomora, ná pangkoi in anggur inta pait bo bungainea in nobaḻí rasum.

³³ Tubig in anggur monia tua in rasum in uḷag mobisa.

³⁴ Ki Tuhan nokotorop kon dodia in musung in umat-Nea bo mohukum kon i monia kon wakutunea.

³⁵ Ki Tuhan in motuḻíbí bo mohukum kon i monia, diádon moonggot bo mosia moḷabú moyopú; wakutu in kogoguyaatan monia diádon moonggot.

³⁶ Ki Tuhan in moposaḷamat kon umat-Nea bo motabidon kon mogogundoi-Nea mita, aka ontongon-Nea in mosia diádon kodaya bo kinodaitandon in ropot.

³⁷ Dá ki Tuhan in moḻibó kon umat-Nea, ‘Kon onda in ilah mita moropot inta pongatamai monimu?’

³⁸ Mosia in nokaan kon ḷongó inta pinosumba monimu, bo nonginum kon anggur inta pinokuruban monimu. Oinídon in mosia mamangoi motuḷung kon i monimu, biódon mako sinbá mosia in mobaḻí pogogadopan monimu.

³⁹ Indoiaika, tongábí Akuoi in ki Allah, diábí in Allah ibanea koḻikudbí in Akuoi. Akuoi in moḻimod bo momiag, monompaḻí bo mongundam. Aka Akuoi in mogaid, diábí tobatúmai in intau in mokoḷawang.

⁴⁰ Podoyon kon i-Nakó tontaní, ki Allah inta nobiag, tonggóon-Ku in ḻima-Ku bo mongibot:

⁴¹ Akuoi in mogatábí kon kedang-Ku inta mopouḻi-uḻinag, bo mopobayá in hukuman. Tuḻían-Ku in bayongan musung-Ku bo hukumon-Ku in bayongan inta doí kon i-Nakó.

⁴² Piot-Ku mita in mopuḻingbí in dugú monia; bayongan inta monayow kon i-Nakó ḻimodon-Ku in kedang-Ku. Diábí pomayá-Ku mako in ki inekabí in moḷawang kon i-Nakó; intau inta kon ponjara bo inta sinoko tompaḻían in mustibí doman matoi.

⁴³ Ei bangusa mita, dayowdon in umat i Tuhan, sin ki Tuhan in mohukumbí kon bayongan inta noḻimod kon i monia. Sia in motuḻíbí kon musung-Nea táe mongampung kon dosa in umat-Nea.”

⁴⁴ Ki Musa bo ki Yosua adí i Nun nopodondong intua, dá bayongan in bangusa Israel nokodongog kon tua.

Ki Musa nobogoi in topotundú mita pangabisan

⁴⁵ Nopaḷut mako nopotaau in totundú mita i Tuhan kon bangusa Israel,

⁴⁶ ki Musa noguman, “Tarukiradon in bayongan parenta inta pinotaauku kon inimu singgai naa. Tundúdon kon i adímu mita, sinbá mosia umuran mosatia in mopoaid in bayongan hukum i Tuhan.

⁴⁷ Topotundú mita tatua in deemanbí tosingogon mita inta diá in mangaḻenea, táe kobiaganmubí. Duduiaidon in bayongan parenta tatua, sinbá moumur in kobiagan monimu kon butá inta diádon moonggot bo ḻitúan monimu kon ḷoḷan in Ongkag in Yordan.”

⁴⁸ Kon singgaipa doman tatua ki Tuhan noguman kon i Musa,

⁴⁹ “Bayádon kon Buḷud in Abarim kon butá in Moab kon ḷoḷan kotá in Yerikho. Bo potakodon kon Buḷud in Nebo bo indoiaidon Buḷud in Kanaan inta diádon moonggot bo ogoi-Ku kon bangusa Israel.

⁵⁰ Iko in matoidon kon buḷud tatua, ná ki utatmu ki Harun minatoi kon Buḷud in Hor.

⁵¹ Kamunda in diá motoindudui kon i-Nakó bo diá nohoromat kon i-Nakó kon tayowon in bangusa Israel kon dodai in moiko kon bokaká in Meriba, kon diug in kotá Kades, kon padang gurun Zin.

⁵² Tuamai iko in diábí motaau in tumuot kon butá inta inogoi-Ku kon bangusa Israel; iko in tongábí motaau moindoi nongkon moyayú.”