ULANGAN 31 - Alkitab Singog In Mongondow Masa In Tanaa

Ki Yosua nobaḻí toḻiu i Musa

¹ Ki Musa buipa doman nosingog kon bangusa Israel,

² kai nia, “Tanaa in umurku in mogatutdon bo doyowa nopuḷú notaong bo akuoi in diádon mokosanggup mobaḻí itoimu. Koḻikud intua ki Tuhan ain noguman kon akuoi in diábí motaau ḷumoḷan kon Ongkag in Yordan.

³ Ki Tuhan Allahmu tontaní in mayá kon munamu bo moyopú kon bangusa mita inta nogutun kon tua, dá moiko in mokoḻitúdon kon butá monia. Ki Yosua in mobaḻí itoimu, ná inta pinoguman i Tuhan.

⁴ Ki Tuhan in moyopúbí kon bangusa mita tatua ná doman pinononaḷow-Nea kon i Sihon, bo kon i Og, datu in intau Amori, bo norimumud kon butá monia.

⁵ Ki Tuhan in mobogoibí kon i monimu in kauntungan kon sigad monia, bo mosia in mustibí pomiaan monimu ná inta ain pinogumanku kon inimu.

⁶ Moiko in musti morigon in gina bo mobarani! Dika moondok kon i monia, sin ki Tuhan Allahmu tontaní inta motuḷung kon i monimu. Diábí pokuyangon-Nea in gina ande monaḷámai kon i monimu.”

⁷ Bo ki Musa nogoiní kon i Yosua, bo kon tayowon in bayongan bangusa Israel sia noguman kon inia, “Korigon in gina bo kobarani, Yosua! Ikodon in modia kon bangusa tanaa mayá ḻimitú kon butá inta pinodandi i Tuhan kon mogoguyang monia.

⁸ Ki Tuhan tontaní in mokapit bo motuḷung kon inimu. Diábí pokuyangon-Nea in ginamu bo diábí doman taḷaan-Nea in iko, tuamai dikadon moondok ande mogagawang.”

Muḷoi in taong noginpitu Hukum i Tuhan musti bacaan

⁹ Bo ki Musa nomais kon hukum i Tuhan Allah bo nobogoi kon imang mita in Lewi inta pinoki aidan monompia kon Poti Dodandian, bo kon itoi mita in Israel.

¹⁰ Sia in nomarenta kon i monia, “Kon buit in taong noginpitu, kon taong pomopatan kon boḻi kon Singgai Moḷoben in Pondok Daun,

¹¹ Moiko in mustibí mobaca kon hukum mita tanaa koḷangonon kon tayowon in intau mita in Israel inta mamangoi mosumba kon i Tuhan Allahmu kon tampat inta piniḻí-Nea.

¹² Potabádon in bayongan intau ḷoḷaki, bobay bo mongoadí mita takin intau ango-angoi inta nogutun kon kotámu mita moyosipun sin mokidongog kon pobacaan tatua, sinbá mosia mobalajar mohoromat kon i Tuhan Allahmu poḷat mosatia in dumudui kon parenta-Nea mita.

¹³ Pongin aid natua yo ki adímu mita inta diápa dodai in onda in nokodongog kon hukum i Tuhan Allahmu in mokodongogdon bo mobalajar mohoromat kon i Tuhan kon bonu in mosia mobiag kon butá inta diádon moonggot bo ḻitúan monimu kon ḷoḷan in Ongkag in Yordan.”

Parenta mita pangabisan inta inogoi i Tuhan kon i Musa

¹⁴ Onda intua ki Tuhan noguman kon i Musa, “Kobiaganmu in diádon moonggot. Dá, oinídon in ki Yosua bo diádon in sia kon Ḷoḷaigan-Ku, sinbá Akuoi in motaaudon mobogoi in topotundú mita kon inia.” Dá minayádon in ki Musa bo ki Yosua kon Ḷoḷaigan i Tuhan,

¹⁵ bo ki Tuhan nokipogontong kon i monia kon bonu in oigi goḷom kon diug in ngara in Ḷoḷaigan.

¹⁶ Guman i Tuhan kon i Musa, “Kopatoianmu in motoyongdon. Naonda in iko matoi, bangusa Israel in diádon mosatia kon i-Nakó bo monoḻikudon kon dodandian inta pinomia-Ku takin i monia. Mosia in monaḷámaidon kon i-Nakó sin mayá mosumba kon ilah mita inta sinumba kon butá inta diádon moonggot tuotan monia.

¹⁷ Aka tua bo mobaḻí, yo torú-Ku in moḷobendon kon i monia. Mosia in taḷaan-Kudon bo yopúon-Ku. Mobayong in bodito mokoondok in moiuma kon i monia, bo mosadardon in mosia kon tua mita in nobaḻí popisí in Akuoi, ki Allah monia diádon koyota-yotakin monia.

¹⁸ Kon dodai intua Akuoi in doíbí motuḷung kon i monia sin mosia in nosumbadon kon ilah mita ibanea bo nomiadon kon inta moraat.

¹⁹ Tuamai in paisdon in dondong tanaa bo tundúdon kon bangusa Israel nobaḻí tomponiata kon i monia.

²⁰ Mosia in diaan-Ku kon butá inta nooyúon bo mopia, ná inta pinodandi-Ku kon mogoguyang monia. Kon tua in mosia mobiag mosanang bo mokouḻí kon bayongan kaanon inta paraḷuon monia. Táe moiduduimai kon tua mosia in monoḻikudon bo mosumba kon ilah mita ibanea. Mosia in mondoídon kon i-Nakó bo monoḻikudon kon dodandian-Ku,

²¹ Bo mobayong in bodito motoyang in moiuma kon i monia. Táe dondong tanaa umuranbí podondong bo pakéon mobaḻí tomponiata kon i monia. Modapot in tanaa kon dodai in mosia diápa diaan-Ku kon butá inta pinodandi-Ku, kinotaauan-Kubí in raian monia.”

²² Kon singgai doman in tatua ki Musa nomais kon dondong tatua, bo notundú kon bangusa Israel.

²³ Onda intua ki Tuhan noguman kon i Yosua, adí i Nun, kai-Nia, “Korigon in gina bo kobarani in iko, Yosua! Iko in modia kon bangusa Israel tumuot kon butá inta pinodandi-Ku kon i monia, bo akuoi in motuḷung kon i monia.”

²⁴ Bo ki Musa nomais kon hukum i Allah kon buk tobatú. Pinaisnea intua kinotaridi nongkon pinomangkoian nodapot in simpodnea.

²⁵ Naonda in nopaḷut, sia noguman kon imang Lewi inta pinoki aidan monoinut kon Poti Dodandian,

²⁶ “Gamádon in buk hukum i Allah tanaa, bo ukatdon kon diug in Poti Dodandian i Tuhan Allahmu sinbá umuran kon tua nobaḻí tomponiata kon bangusa tatua.

²⁷ Kinotaauankubí kon mosia tua in totok motogat in gina bo moibog momarontak. Kon wakutu in akuoi nobiagpa mosia nomarontak kon i Tuhan; yo bambíkabí aka akuoi matoidon!

²⁸ Tanaa in potabádon in bayongan itoi in bangusa bo porwira mita moyosipun kon tayowonku, sinbá potaaukudon kon i monia in soaḷ mita tanaa. Ḷangit bo butá oiníonku mobaḻí sakusi kon i monia.

²⁹ Kinotaauankubí kon naonda in akuoi matoi, intau mita tatua mobaḻídon moraat bo mondoí kon onu inta ain sinundúku kon i monia. Bo kon singgai moiduduimai mosia in kotugatan in bodito, sin nokopomukádon kon torú i Tuhan sin nogaid kon onu inta kinodoí-Nea.”

Dondong i Musa

³⁰ Onda intua ki Musa nosingog kon dondong tanaa nodapot in nopaḷut bo bayongan bangusa Israel nokidongog kon tua.