ULANGAN 30 - Alkitab Singog In Mongondow Masa In Tanaa

Barakat i Tuhan kon umat-Nea inta nogogai in nogaid kon inta moraat

¹ “Tanaa in motaaudon momiḻí mongo barakat ande kutuk ná inta ininsilanganku kon inimu. Aka moiko nokorasadon kon bayongan in yoyiga tatua bo nobiag kon sigad in bangusa mita ango angoi kon tampat pinoporaritan i Tuhan Allahmu, yo moiko in mokotorop bidon kon onu in piḻíon inta inogoiku kon inimu.

² Aka moiko bo buímu moibog mobui kon i Tuhan Allahmu, bo takin ḻimbatú in gina dumudui kon parenta-Nea mita inta pinotaauku kon inimu singgai naa,

³ dá ki Tuhan Allahmu in monotabibí kon i monimu. Moiko in diaan-Neabí bui nongkon bangusa mita inta pinoporangkapan kon i monimu, bo bui ogoian in kobiagan motompia.

⁴ Umpakabí moiko noirangkapdon kon dunia naa, sipunonbí i Tuhan Allahmu in moiko bo diaan mobui.

⁵ Dá buidon mouḻí monimu in butá inta koḻipod pinogutunan in mogoguyangmu. Bo moiko in baḻíondon mobiag totok motompia, bo baḻíon-Neadon in moiko mobayong moiḻiu kon kobayong in mogoguyangmu.

⁶ Moiko bo buímu in ogoiandon in gina inta motoindudui, dá moiko in motabidon kon i Tuhan Allahmu takin ḻimbatú in ginamu sinbá umurandon mogutun kon butá tatua.

⁷ Bayongan in kutuk tatua in popoḷabú-Neadon kon musungmu mita inta mondoí bo mondorot kon i monimu.

⁸ Moiko in buidon motoindudui kon i Tuhan bo mopobayádon in bayongan parenta-Nea inta pinotaauku kon inimu singgai naa.

⁹ Ki Tuhan Allahmu in mopobaḻídon in bayongan totayakmu motarima kon bungainea; moiko in mokouḻídon kon adí mobayong bo bobiagon mobayong; gobámu mita in mobogoibí in bungai in boyó inta mobayong totok. Ki Tuhan takin pia in gina-Nea mobogoibí in kobiagan motompia kon i monimu, ná doman pia in gina-Nea mobogoi in kobiagan motompia kon mogoguyangmu.

¹⁰ Táe moiko in mustibí motoindudui kon i Tuhan Allahmu bo dumudui kon bayongan in hukum-Nea inta pinais kon bonu in buk tanaa, buk in Hukum i Tuhan. Moiko in mustibí mobui kon i-Nia takin ḻimbatú in ginamu.

¹¹ Parenta inta pinotaauku kon inimu in diábí totok mororiga kon inimu bo diábí doman moiḻiu in yayú.

¹² Tampatnea in deemanbí kon ḷangit, dá moiko in moḻibó, ‘Ki ine in mamonik mogamá kon tua sin pakéon naton, sinbá kodongogandon naton bo motaaudon duduian?’

¹³ Tampatnea in deemanbí doman kon ḷoḷan in dagat, dá moiko in moḻibó, ‘Ki ine in mayá ḷumoḷan kon dagat sin mogamá kon tua bo pakéon naton, sinbá kodongogan naton bo motaaudon duduian?’

¹⁴ Dika moḻibó natua, sin parenta tatua nodiugdon kon inimu. Kinotaauandon monimu bo kinohapalan bidon monimu, dá dongka bidon mopoaid.

¹⁵ Singgai naa moiko in motaau bidon momiḻí kon inta mopia ande inta moraat, mobiag ande matoi.

¹⁶ Singgai naa akuoi momarenta kon i monimu sinbá motabidon kon i Tuhan Allahmu bo motoindudui kon i-Nia poḷat mogaid kon bayongan in parenta-Nea sinbá moiko in mobiag motompia bo mobaḻí bangusa inta moḷoben. Ki Tuhan Allahmu in momarakatbí kon i monimu kon butá inta diádon moonggot in ḻitúan monimu.

¹⁷ Táe aka moiko bo diá motoindudui bo doí doman mokidongog, bo mopomayá doman mako in awakmu poḷaḻeon sin mosumba kon ilah mita ibanea,

¹⁸ yo notantú bidon kon yopúon in moiko, bo kobiaganmu in diábí moonggot kon butá inta diádon moonggot in ḻitúan monimu. Toropdon! Tua in pinotaaukudon kon i monimu singgai naa.

¹⁹ Tanaa in motaau bidon moiko momiḻí mongo mobiag ande matoi, barakat i Tuhan ande kutuk-Nea. Ḷangit bo butá oiníonku mobaḻí sakusi kon simpod in tosingogonmu. Piḻídon in mobiag.

²⁰ Kotabibí in ki Tuhan Allahmu, duduiaidon in Sia, bo pokosatiadon kon i-Nia. Dá moiko bo buímu in mobiag moumur kon butá inta pinodandi i Tuhan kon mogoguyangmu, ki Abraham, ki Ishak bo ki Yakub.”