ULANGAN 3 - Alkitab Singog In Mongondow Masa In Tanaa

Israel nonaḷow kon Datu in Og

¹ “Onda intua kita nopobayá ná utuan kon butá in Basan. Ki Og, datu in Basan namangoi sin monubu kon i naton kon diug in kotá in Edrei.

² Táe ki Tuhan noguman kon inakó, ‘Dika moondok kon inia, Musa. Ogoi-Ku bidon in sia, tontaranea bo bayongan butánea kon inimu. Popoaidon kon inia ná inta pinopoaidmu kon i Sihon, datu in Amori inta nomarenta kon Hesybon,’

³ Dá ki Tuhan Allah naton noposarakandon kon i Datu in Og bo rayatnea kon i naton, bo mosia komintan sinaḷow naton.

⁴ Kon tungkuḷ intua kinoagowan naton komintan in kotánea, diá tobatúmai in kinotaḻiban. Onom nopuḷú in kobayong in kotá inta inagow naton kon bayongan butá in Argob, inta pinarenta i Datu Og nongkon Basan.

⁵ Bayongan kotá tatua inirigonan in dinding mita inta moḷantud, ngara mita moḷoben bo bandai mita in ḷoḻingkop sin poḻingkop kon ngara mita tatua. Koḻikud intua nobayongpa doman in kotá ibanea inta diá dininding.

⁶ Bayongan kotá tatua irimumud naton, bo bayongan intau ḷoḷaki, bobay bo adí mita monia iyopú naton, ná inta pinogogaid naton kon kotá mita i Datu Sihon nongkon Hesybon.

⁷ Bobiagon monia ginamá naton bo kotá mita tatua inagow naton.

⁸ Kon dodai intua ginamá naton nongkon datu in Amori doyowa tatua in butá kon dotá in pomukaan kon Ongkag in Yordan bo Ongkag in Arnon nodapot kon Buḷud in Hermon. (

⁹ Buḷud in Hermon sinangoi intau in Sidon ‘Siryon’ bo sinangoi intau in Amori ‘Senir’.)

¹⁰ Ginamá naton in bayongan butá i Datu Og nongkon Basan: kotánea mita kon buḷud, butá in Gilead bo Basan, bo minayá ná pomukaan kinoyoyayú in kotá in Salkha bo Edrei.” (

¹¹ Ki Datu Og naa in intau in Repaim inta pangabisan. Poti mayatnea pinomia nongkon batu, kobanatnea in opat nometer bo kooḷadnea in gogió bo doyowa nometer podudui in ukuran inta ain sinantú. Umaai in tanaa motaaupabí indoian kon Raba, kotá in intau in Amon.)

Suku mita inta nogutun kon butá kon dotá in pomukaan kon Ongkag in Yordan

¹² “Naonda in butá tatua nobaḻí kapunyaan naton, inogoiku intua kon suku Ruben bo Gad in butá kon dotá in utuan kotá in Aroër kon diug in Ongkag in Arnon, bo tongosilai nongkon butá in buḷud Gilead, noitakin doman in kotánea mita.

¹³ Kon tongo botak in suku Manasye inogoianku in kiagat in butá in Gilead, bo pinotakin doman in butá in Basan inta perna sinonggata in Og, tuata in bayongan wilayah Argob.” (Basan in kinotaauanbí saḷaku butá intau in Repaim.

¹⁴ Yair nongkon suku Manasye nogamá kon bayongan wilayah Argob, inta nongkon Basan nodapot in pinosigadan Gesur bo Maakha. Sinangoiannea in ḻipú mita tatua pinodayan kon tangoinea tontaní, bo dapot in tanaa mako umuranpabí kinotaauan saḷaku ḻipú mita i Yair.)

¹⁵ “Butá in Gilead inogoiku kon kaum i Makhir nongkon suku Manasye.

¹⁶ Bo suku mita in Ruben bo Gad inogoianku in butá inta kon sigad in Gilead bo Ongkag in Arnon. Yuak in ongkag tatua nobaḻí sigad monia kon dotá in toḷatan, aka kon dotá in utuan mosia noyosigad in Ongkag in Yabok, inta tongosilainea nobaḻí sigad in butá intau in Amon.

¹⁷ Kon dotá in toyopan, butá monia nobendar nodapot kon Ongkag in Yordan, nongkon Danow Galilea kon utuan nodapot kon Laut Mati kon dotá in toḷatan, minayá nodapot kon sipangkoion in Buḷud Pisga kon dotá in pomukaan.

¹⁸ Kon dodai intua akuoi nobogoi kon i monia in parenta tanaa: Ki Tuhan Allahmu nobogoi kon inimu in butá kon dotá in pomukaan kon Ongkag in Yordan sin pogutunanmu. Táe tontaramu mita in musti kodia-dia in sonjata bo ḷumoḷan kon Ongkag in Yordan umuna kon suku mita Israel ibanea.

¹⁹ Tongá adí bo buḷoimu takin bobiagonmu inta mobayong motaaubí in mogutun kon kotá mita inta ain inogoiku kon inimu.

²⁰ Tuḷungaidon in intau mita tobangusamu modapot in mosia ḻimitú kon butá inta bain ogoi i Tuhan Allahmu kon i monia kon dotá in toyopan kon Ongkag in Yordan, bo modapot in ki Tuhan mobogoi kon i monia mobiag motompia kon tua, ná inta inaidan-Nea kon inimu kon naa. Bain tua bo moiko motaaudon mobui kon butá kapunyaanmu inta ain inogoiku kon i monimu.

²¹ Bo akuoi in noguman kon i Yosua: Iko nokoontongdon kon bayongan inta pinomia i Tuhan Allahmu kon i Sihon bo kon i Og, datu doyowa tatua. Natuabí doman in pogogaid-Nea kon bayongan datu inta agowonmu in butánea.

²² Dika moondok kon i monia, sin ki Tuhan Allahmu in motuḷungbí kon inimu.”

Ki Musa diá inogoi tumuot kon Kanaan

²³ “Kon dodai intua akuoi nopoigum kon i Tuhan:

²⁴ O Tuhan inta Totuu Moḷantud, kinotaauanku kon onu inta pinoontong-Mu kon inakó naa in tongápabí pomangkoian in bayongan oaidan-Mu mita inta moḷoben bo mokoherang. Diábí in toḻindua in Tuhan in kon ḷangit ande kon butá inta ná Iko inta mokoaid kon inta motoyang.

²⁵ Ogoipa in akuoi ḷumoḷan kon Ongkag in Yordan, o Tuhan, sin moindoi kon butá inta mopia kon ḷoḷan, buḷud inta mogaga bo Buḷud in Libanon.

²⁶ Táe moiko nokopomukádon kon torú i Tuhan kon inakó dá diádon sinubagan-Nea onu inta pinoigumku tua. Nodapotdon in ki Tuhan noguman: ‘Mobaḻídon, Musa, dikadon mokotangoi kon tua!

²⁷ Bayádon kon tudu totok in Buḷud Pisga bo indoidon kon dotá in utuan bo toḷatan, kon dotá in pomukaan bo toyopan. Taridiaidon kopia onu in inontongmu tua, sin iko in diá bidon moiḷoḷan kon Ongkag in Yordan.

²⁸ Ogoiaidon in topotundú mita in ki Yosua. Iyotonaidon in ginanea, sin siadon in modia kon bangusa tatua mayá in ḷoḷan sin ḻimitú kon butá inta inontongmu tatua.’

²⁹ Dá nogutundon in kita kon ḷopá kon ḷoḷan kotá in Bet-Peor.”