ULANGAN 28 - Alkitab Singog In Mongondow Masa In Tanaa

Barakat kon intau inta motoindudui

¹ “Aka moiko motoindudui kon i Tuhan Allahmu bo mosatia in dumudui kon bayongan in parenta inta pinotaauku kon inimu singgai naa, dá baḻíon-Neadon in moiko bangusa inta totok in kotango-tangoian in intau kon dunia.

² Duduiai in ki Tuhan Allahmu, dá bayongan barakat tanaa in ogoibí kon inimu:

³ Barakatan in kotá mita bo gobámu mita.

⁴ Barakatan in moiko, dá mobayong in ki adímu mita, bungai in boyó mobayong totok bo sapi takin bembé dombamu in mobaḻí mobarong totok.

⁵ Barakatan in pinosipunan monimu kon bungai in gandummu takin kaanon inta pinomia monimu nongkon gandum tatua.

⁶ Barakatan in bayongan totayakmu.

⁷ Aka moiko tubuon, ki Tuhan in monaḷow kon musungmu. Motompia in pononubú monia, táe moḷaguibí posibayá.

⁸ Ki Tuhan Allahmu in momarakatbí kon totayakmu bo momonu in gandum kon ontagmu mita. Barakatan-Neabí in moiko kon butá inta inogoi-Nea kon inimu.

⁹ Aka moiko umuran dumudui kon i Tuhan Allahmu bo mogaid kon bayongan in parenta-Nea, moiko in baḻíon-Neadon umat-Nea tontaní, ná inta pinodandi-Nea.

¹⁰ Dá ontongondon in bayongan bangusa kon dunia kon moiko nion in bangusa inta piniḻí i Tuhan, bo mosia in mobangkaḷbí kon i monimu.

¹¹ Moiko in ogoianbí in adí mobayong. Bobiagonmu in mobaḻíbí mobayong bo bungai in boyó kon butámu in mobarongbí totok kon butá inta pinodandi i Tuhan kon mogoguyangmu kon ogoi kon inimu.

¹² Ki Tuhan in mopoangoibí in uyan kon wakutunea nongkon tampat pinotagúan-Nea inta mobayong totok kon ḷangit. Sia in momarakatbí kon bayongan totayakmu, dá moiko in motaaudon mopoḷuan kon mobayong in bangusa, táe moiko tontaní in diá bidon paraḷu moḷuan.

¹³ Ki Tuhan Allahmu in mopobaḻíbí kon i monimu itoi kon sigad in bangusa mita, bo deemanbí tongá dumodudui. Aka moiko mosatia in dumudui kon bayongan parenta i Tuhan inta pinotaauku kon inimu singgai naa, kobobiag monimu in kodugang-kodugangdon motompia bo diábí dodai in onda in umundok.

¹⁴ Tongá dika mokoimontanmai in monaḷámai kon parenta mita tatua naondaka in pogogaid. Dika doman mosumba bo mogundoi kon ilah mita ibanea.”

Bungai mita in aid diá motoindudui

¹⁵ “Táe aka moiko diá motoindudui kon i Tuhan Allahmu, bo diá doman mosatia in mopoaid kon bayongan parenta bo hukum-Nea inta pinotaauku kon inimu singgai naa, dá bayongan in kutuk tanaa in moiuma kon i monimu:

¹⁶ Kinutuk in bayongan kotá mita bo gobámu mita.

¹⁷ Kinutuk in boyó in gandummu bo kaanon inta pinomia nongkon gandum tatua.

¹⁸ Kinutuk in moiko, dá tongádon topiḻik in adímu, bungai in boyómu, takin sapi bo bembé dombamu.

¹⁹ Kinutuk in bayongan totayakmu.

²⁰ Aka moiko mogaid kon inta moraat bo mondoí kon i Tuhan, Sia in mopoangoibí in bodito, tombauk bo yoyiga kon bayongan onu inta inaidan monimu, modapot in tongábí kon bonu in wakutu motoyong moiko yopúondon komintan.

²¹ Bayongan in takit moiuma kon i monimu, modapot in buitnea diádon tobatúmai in intau nongkon i monimu in mogutunpa kon butá inta iḻitúan monimu tatua.

²² Ki Tuhan in mohukum kon i monimu pongin takit mita inta dumodakit, bobagá mita bo patú. Sia in mopoangoi doman in patú inta mokoingkag kon butá bo tompot inta mokopokak dá bungai in boyómu mogoguyaat. Bodito mita tatua in tantú moiuma kon i monimu modapot in moiko moyopú.

²³ Diádon monguyan bo butámu in tumogatdon ná uatoi.

²⁴ Ki Tuhan in diá bidon mopouyan in tubig, táe uyan bidon in ḷobud bo bungaion modapot in moiko modaitdon moyopú.

²⁵ Aka moiko diá motoindudui kon i Tuhan Allahmu, baḻíon-Nea in moiko taḷowon in musungmu mita. Motompiabí in pononubú monimu, táe posibayádon in moḷagui. Bayongan in bangusa kon dunia mokoningkimdon mokoontong kon kososoemu.

²⁶ Aka moiko matoi, mayat mita monimu in mobaḻídon kokaanon in ḷagapan mita bo mahaḷuk mita inta mokokaan kon tapú, bo diábí in moguntun kon mahaḷuk mita tatua.

²⁷ Ki Tuhan in mohukumbí kon i monimu takin mopouma in bituḷ mita ná inta pinopouma-Nea kon intau mita in Mesir. Awakmu in mopuḻingdon in kekeb bo momuka inta mokokatoḷ, táe diábí in undamnea.

²⁸ Baḻíon i Tuhan in moiko mobundai, mobilog bo motoboḻingo.

²⁹ Singgai moiko in mayá takin mongokap naonda bo intau bilog, táe diábí mokouḻí kon daḷan. Bayongan in totayakmu diábí in mangaḻenea. Moiko in tantú bidon doroton bo pogagowan, bo diábí in motuḷung kon i monimu.

³⁰ Aka moiko diá motoindudui kon i Tuhan Allahmu, tanaa mita in moiuma kon inimu: Moiko in mongantangbí, táe intaubí ibanea in mobuḷoi kon i kantangmu. Moiko in moposindogbí in baḷoi, táe diábí utunanmu intua. Moiko in momuḷabí kon gobá in anggurmu táe diábí moikaan kon bungainea mita.

³¹ Sapimu in ratáanbi kon tayowonmu, táe moiko in diábí moikaan kon tapúnea. Keledaimu mita in tokougutondon mayá bo tongádon indoian mako monimu bo diá bidon pobuion. Dombamu mita in ogoi kon musungmu mita bo diábí in motuḷung.

³² Kon tayowon matamu adímu mita in ogoi mobaḻí ata kon intau ango-angoi. Pomuḷoi in singgai matamu mopomporí in motayak kon i adímu mita, táe diábí in mangaḻenea, sin mosia in diábí mobui mangoi.

³³ Bangusa ango-angoi in mogamádon kon bayongan bungai in boyómu inta nouḻí monimu takin iyumoyiga in nogaid, táe moiko tontaní in diábí mokouḻí kon onu bo onu koḻikudbí in umuran tonggataan bo popoaidan monia in aid moraat.

³⁴ Moiko in mobundaidon popisí in onu inta noiuma kon i monimu.

³⁵ Ki Tuhan in mopomukádon in kekeb mita inta monakit bo inta diádon mopia; nongkon sioḷ modapot in uḷu monimu mopuḻingdon in bituḷ mita.

³⁶ Moiko takin datu monimu in diaan i Tuhan mayá in butá in intau ango-angoi inta diá kinotaauan monimu bo inta diá doman kinotaauan in mogoguyangmu. Kon tua in moiko mogundoidon kon ilah mita inta pinomia nongkon kayu bo batu.

³⁷ Kon butá mita tampat pinoporaritan i Tuhan kon i monimu, intau mita in mokoningkimdon in mokoontong kon i monimu; moiko in pomiaandon monia ibo-ibog bo poḷat kosingan.

³⁸ Mobayong in batoḷ in pomuḷaan monimu táe moyakag in bungai in boyó in mouḻí monimu, sin pinomuḷamu modait kaanon in pangkoḷá.

³⁹ Moiko in momuḷabí kon gobá mita in anggur bo ḷukadan monimu táe diábí mosipú kon bungai in anggur ande monginum kon tubignea, sin pangkoi mita in anggur tatua nodait kinaan in uḷod.

⁴⁰ Kon bayongan in butámu mobiag in pangkoi in zaitun, táe bungainea mita in mototakbí, dá moiko in diábí mokouḻí kon ḷananea.

⁴¹ Moiko in mokouḻíbí kon adí mita ḷoḷaki bo bobay, táe mosia in gamáandon mobaḻí tawanan in parang, dá moiko in kobuḻiandon monia.

⁴² Bayongan pangkoi bo pinomuḷamu in modaitbí kaanon in mahaḷuk.

⁴³ Intau ango-angoi inta nogutun kon butámu in modugangdon in kawasa monia, bo kawasamu tontaní in kogaat-kogaatdon.

⁴⁴ Mosia in kodoitbí inta poḷuan kon i monimu, táe moiko in diábí koonu bo onu sin poḷuan kon i monia. Bo kon buitnea moiko kawasaan monia.

⁴⁵ Bayongan bodito tantú moiuma kon i monimu bo umuran moiḷamboi kon i monimu modapot in moiko moyopú, sin moiko in diá motoindudui kon i Tuhan Allahmu bo diá nopobayá in hukum mita inta inogoi-Nea kon inimu.

⁴⁶ Bodito mita tatua nobaḻí tomponuot in hukuman i Tuhan kon i monimu bo buímu modapot kon adí bo ompu.

⁴⁷ Moiko aindon binarakatan i Tuhan Allahmu kon bayongan yagi-yagi, táe doí mogundoi kon i-Nia takin gina motuḻid bo moḷunganga.

⁴⁸ Tuamai moiko musti mogundoi kon musung mita inta pinoangoi i Tuhan sin moḷawang kon i monimu. Moiko in aputondon in gogoy, yogang bo mopilang bo diá koonu bo onu. Ki Tuhan in mondorot totok kon i monimu modapot in moiko moyopú.

⁴⁹ Bangusa tobatú inta diá komangaḻean monimu in tosingogon monia popoangoi i Tuhan nongkon toḷosimai sin moḷawang kon i monimu. Ná ḷagapan boniá in mosia monampí kon i monimu.

⁵⁰ Mosia tua in moraat totok bo diá kototabi kon intau mita inta nogoguyangdon ande inta mongoadípa mita.

⁵¹ Mosia in mokopodaitbímai kon bobiagon bo bungai in boyómu, bo diábí tonggagatan monia in gandum in moiko, tubig in anggur, ḷana in zaitun ande sapi bo bembé dombamu modapot in moiko matoi in gogoy.

⁵² Mosia in monububí kon bayongan kotá kon butá inta inogoi i Tuhan Allahmu kon inimu dá dindingnea mita inta moḷantud bo kinoropot inta binaḻí monimu ḷamboi tua in mouuibi.

⁵³ Kon dodai in musungmu mita mongopung kon kotámu mita, moiko in kodaitandon in ropot in gina sin gogoiondon, dá moiko in mokaandon kon adímu mita tontaní, adí mita inta inogoi i Tuhan Allahmu kon inimu.

^54-55 Modapot in intau moḷoben inta totok in motuḻid in ginanea moinggamá in ropot in ginanea kon bonu in pongopungan tatua, dá sia mokaandon kon i adínea mita tontaní sin diádon in kaanon ibanea. Diádon topiḻikmai in ogoinea kon i utatnea ande kon i buḷoinea inta kinotabinea ande adínea mita inta nobiagpa.

^56-57 Modapot in bobay moḷoben inta totok in motuḻid in ginanea bo totok in nobiag nooyúon nodapot in diá dodai onda minaya-mayá in sioḷ, momia doman ná tatua. Kon dodai in musung mongopung kon kotá, bobay tatua kodaitan in ropot in ginanea popisí in gogoyon, dá sia in umado-adopdon bo mokaan kon i adínea inta bagu pinononggadí takin induanea. Diábí topiḻikmai in ogoinea kon i buḷoinea inta kinotabinea ande kon i adínea mita.

⁵⁸ Aka moiko diá mosatia in dumudui kon bayongan in hukum i Tuhan Allahmu inta pinais kon bonu in buk tanaa bo diá mohoromat kon i Tuhan Allahmu inta mokawasa bo inta mokoherang,

⁵⁹ Ki Tuhan in mopoangoi kon i monimu bo kon buímu in takit mita inta diá koundaman bo bodito mita inta diá motaau potogonon.

⁶⁰ Takit mita inta mokoondok inta inontong monimu kon Mesir moiuma kon i monimu, bo moiko in diábí koundaman.

⁶¹ Ki Tuhan in mopoangoi doman in noyagi-yagimai in takit bo bodito inta diá pinais kon buk tanaa, buk in hukum i Tuhan. Bo moiko in yopúondon.

⁶² Umpaka kobayong monimu in nádon kobayong in tundi kon ḷangit, tongádon topiḻik in kon sigad monimu in mobiagpa, sin moiko in diá motoindudui kon i Tuhan Allahmu.

⁶³ Ná pia in gina i Tuhan nobogoi in kobiagan motompia kon inimu bo modugang kon kobayongmu, yo natua doman in kososanang in gina-Nea moyompat bo moyopú kon i monimu. Moiko in poḷuaiondon nongkon butá inta diádon moonggot in ḻitúan monimu.

⁶⁴ Ki Tuhan in moporangkapbí kon i monimu kon sigad in bangusa mita kon bayongan dunia naa. Kon tua moiko in mosumba kon ilah mita inta pinomia nongkon kayu bo batu, ilah mita inta diá kinotaauan monimu bo diá doman kinotaauan in mogoguyangmu.

⁶⁵ Kon sigad in bangusa mita tatua moiko in diábí mokouḻí kon kobiagan mopia, bo diábí in tampat inta motaau tangoion monimu kapunyaanmu; Baḻíon i Tuhan in moiko totok in moondok bo koinggamáan in rigon in gina takin diá in andoḷan.

⁶⁶ Kobiaganmu umuran moyogintayow in bodito. Singgai doḷom mokoningkim in awak monimu bo moondok in matoi.

⁶⁷ Kon dodai in mokoontongkabí kon onu putúmu modoḷodok sin moondok. Doḷo-doḷom moiko moharap mako kon modoḷomdon bo doḷom moiko moharapdon mako kon bá mobayagdon.

⁶⁸ Ki Tuhan in mogatodon bui kon i monimu mayá in Mesir tumakoi kon kapaḷ, umpaka Sia ain noguman kon moiko in diá bidon mobui mayá intua. Kon tua moiko in moramuji mopotaḷui in awakmu mobaḻí ata kon musungmu, táe diá tobatúmai in moibog motaḷui kon i monimu.”