ULANGAN 26 - Alkitab Singog In Mongondow Masa In Tanaa

Sosumba nongkon bungai in boyó

¹ “Aka moiko tumuotdon kon butá inta inogoi i Tuhan Allahmu kon inimu bo mogutundon kon tua,

² dá bungai in boyó inta muna nongkon bayongan inta sinipun monimu nongkon butámu in musti bonuon monimu kon kompé bo diaan monimu kon tampat inta ain piniḻí i Tuhan Allahmu.

³ Bayádon kon i imang inta nopobayá in oaidan monia kon dodai intua bo pogumandon kon inia, ‘Akuoi moponiatadon kon i Tuhan Allahmu kon akuoi in sinumuotdon kon butá inta pinodandi-Nea kon mogoguyang naton ogoi kon i naton.’

⁴ Ki imang in mogabatdon kon kompé tatua nongkon inimu bo ukatonneadon kon tayowon in mezbah i Tuhan Allahmu.

⁵ Onda intua kon tayowon i Tuhan Allahmu, musti in iko mopoyaput in tosingogon mita tanaa: ‘O Tuhan, mogoguyangku naa intau in Aram inta nodondaḷoi. Sia nodia kon koluarganea minayá in Mesir bo nogutun kon tua nobaḻí mokokiangoi. Kon tungkuḷ in minayá intua mosia tongá topiḻik, táe mosia in nobaḻí bangusa inta moḷoben bo moropot.

⁶ Intau in Mesir nopoaid kon inami in inta moraat totok bo momakisa kon inami mogaid nobaḻí ata.

⁷ Bo kami nokuani nopoigum in totuḷung kon ini-Mu, Tuhan, ki Allah in mogoguyang nami. Inindongogan-Mu in kuani nami bo noindoi kon roriga, susa takin kobobiag nami inta mokotabidon.

⁸ Takin kawasa bo ropot inta moḷoben Iko nopoḷuai kon i nami nongkon Mesir. Iko nogaid kon mujizat mita bo inta mokoherang mita poḷat nopomuká in aid mita inta nokodoḻiok kon musung.

⁹ Onda intua dinia-Mu in kami namangoi in naa bo nobogoi in butá inta nooyúon bo mopia naa kon inami.

¹⁰ Tuamai, o Tuhan, posumbaku kon naa bungai in boyó inta muna nongkon butá inta inogoi-Mu kon inakó.’ Bo ukatdon in kompé tatua kon tayowon i Tuhan Allahmu, bo sumbadon in Sia.

¹¹ Posukurdon sin bayongan rijiki inta ain inogoi i Tuhan Allahmu kon inimu bo tombonu in baḷoimu. Anutaidon in intau in Lewi bo intau ango-angoi inta nogutun kon sigad monimu tumakin kon porayaan tatua.

¹² Pomuḷoi in taong nogintoḷu moiko in musti mobogoi in sosumba mopuḷú noporosen, tuata in mopuḷú noporosen nongkon bungai in boyó kon butámu kon imang Lewi, intau ango-angoi, adí uno-unon bo inta dongkadon boba-bobay, dá kon bonu in bayongan kotámu mosia mokouḻí kon kaanon inta paraḷuon monia. Aka mopaḷutdon,

¹³ pogumandon kon i Tuhan Allahmu, ‘Nongkon mopuḷú noporosen bungai in boyó inta musti posumba kon ini-Mu, Tuhan, diá topiḻikmai in kinotaḷáan kon baḷoiku; komintandon inogoiku kon intau in Lewi, intau ango-angoi, adí uno-unon bo inta dongka boba-bobay, ná inta ain pinarenta i Tuhan Allahku kon inakó. Nongkon parenta i Tuhan soaḷ sosumba mopuḷú noporosen diábí in sinaḻibanku.

¹⁴ Nongkon sosumba tatua diá topiḻikmai in kinaanku kon dodai in akuoi nonogumatoi ande diniaku iḻumuai in baḷoi kon dodai in akuoi nonajispa, ande inogoiku nobaḻí sosumba kon intau minatoi. Akuoi aindon notoindudui, o Tuhan; bayongan inta pinarenta-Mu inaidankudon.

¹⁵ Nongkon tampat-Mu inta motusi kon soroga koibogpa in Iko moḷongow bo momarakat kon umat-Mu Israel; barakataidon doman in butá nooyúon bo mopia inta ain inogoi-Mu kon inami podudui in dandi-Mu kon mogoguyang nami.’ ”

Umat inta piniḻí i Tuhan

¹⁶ “Singgai in naa ki Tuhan Allahmu nomarenta kon i monimu mogaid kon bayongan in parenta tatua; aidaidon komintan intua pokosatia bo takin doman ḻimbatú in gina bo ropotmu.

¹⁷ Singgai in naa moiko in nongakudon kon ki Tuhan tua in ki Allahmu. Moiko in nodandi kon motoindudui kon i-Nia bo mogaid kon bayongan hukum bo parenta-Nea.

¹⁸ Singgai in naa ki Tuhan motarima kon i monimu mobaḻí umat-Nea tontaní, ná inta pinodandi-Nea kon inimu, bo Sia in nomarenta kon inimu mogaid kon bayongan in parenta-Nea.

¹⁹ Ki Tuhan momaḻíbí kon i monimu moḷoben-ḷoben nongkon bayongan in bangusa ibanea inta ain binaḻí-Nea, bo moiko in dayowonbí bo horomaton. Moiko in mobaḻí umat i Tuhan Allahmu ná inta pinodandi-Nea.”