ULANGAN 23 - Alkitab Singog In Mongondow Masa In Tanaa

Intau inta diá pinoyoiap umat i Tuhan

¹ “Intau inta ain kinabiri ande inta ain pinongkó in dodiaannea in diábí motaau poyoiapon umat i Tuhan.

² Intau inta pinononggadí kon ḷuai in nika bo bayongan in buínea modapot in bui noginpuḷú, diábí motaau iapon umat i Tuhan.

³ Intau in Amon bo Moab takin bui mita monia modapot in buí noginpuḷú diábí motaau in poyoiapon umat i Tuhan,

⁴ sin mosia in doí nobogoi in kaanon kon i monimu kon tungkuḷ in moiko kon binayáan iḻumuai nongkon Mesir. Nodapotbí in mosia nonondan kon i Bileam, adí i Beor nongkon kotá in Petor kon Mesopotamia, sin mongutuk kon i monimu.

⁵ Táe ki Tuhan Allahmu in doíbí nokidongog kon i Bileam. Táe binaḷuian-Neabí in kutuk tatua nobaḻí barakat, sin motabi in Sia kon i monimu.

⁶ Kon bonu in kobiagan monimu bo modapot in toonuka, dikabí motuḷung kon bangusa mita tatua ande baḻíon monimu mobiag motompia in mosia.

⁷ Dikabí in moiko diá mopandungmai kon intau in Edom sin mosia tua in ki utatmubí. Dikabí doman in moiko diá mopandungmai kon intau in Mesir, sin moiko in nokoimontandon nogutun kon butá monia.

⁸ Pinangkoi kon buí nogintoḷu bo moidudui kon tua mosia tua in motaaubí mobaḻí umat i Tuhan.”

Poḷoḷukad kon kododarit in pinononḷoḷaigan in tontara

⁹ “Kon tungkuḷ in moiko koyogot moparang, moiko in mustibí yumayú kon bayongan yagi-yagi inta mokopopisí kon i monimu monajis.

¹⁰ Aka intau tobatú mobaḻí monajis sin iḷuaian buḻe kon dodai in sia nosiug, sia in mustibí monaḷámai kon pinonḷoḷaigan bo mayá in ḷuai.

¹¹ Naonda in moḷoḷabungdon sia in musti moinggú bo naonda in tumoyopdon mata in singgai sia motaaudon bui mayá in ḷoḷaigan.

¹² Moiko in mustibí mosadia kon tampat kon ḷuai in ḷoḷaigan sin bayáan in tubig.

¹³ Aka mayá intua, podia kon koḻikud in touḷutmu yo podia doman kon kayu topongkó sin pongaḻí kon bubú sin poḷumbúanmu kon kotor bo pomumbun bui.

¹⁴ Ki Tuhan Allahmu kotaki-takin monimu kon bonu in pinonḷoḷaigan monimu sin mogoḻiung kon i monimu bo mobogoi kon i monimu in kauntungan kon bayongan musungmu. Dá ḷukadai sinbá pinononḷoḷaiganmu umuran modarit. Dika modapot in kouḻían kon inta diá mopia in kon sigad monimu, sinbá diá taḷaan i Tuhan in moiko.”

Atorang mita

¹⁵ “Aka ata tobatú moḷagui nongkon i tuangnea bo mamangoi kon inimu bo mopoigum sinbá ḷukadanmu in sia yo dikabí potabámu mobui in sia.

¹⁶ Sia in motaaubí mogutun kon kotámu tobatú podudui in koibognea, bo diábí motaau in totok tonggataan monimu in sia.

¹⁷ Intau Israel tobatú pinomayá ḷoḷaki ande bobay, diábí motaau in mobaḻí sundaḷ kon kuil mita pososumbaan.

¹⁸ Ná doman tua in doit inta nouḻí kon pinosundaḷan tatua in diábí motaau in diaan kon Baḷoi i Tuhan Allahmu sin poguboḻi kon dandimu, sin kinodoíbí i Tuhan Allahmu in bobay sundaḷ kon kuil mita pososumbaan bo boḻi in pinosundaḷan.

^19-20 Aka moiko mopoḷuan in doit kon intau ango-angoi, yo motaaubí in moiko moigum kon kauntungannea. Táe aka moiko mopoḷuan in doit ande kaanon ande barang ibanea kon intau tobangusamu, yo poḷuandon intua bo dika mogamá kon kauntungannea. Duduiaidon in parenta tatua, dá ki Tuhan Allahmu in momarakatbí kon bayongan yagi-yagi inta aidanmu kon butá inta iḻitúan monimu.

²¹ Aka moiko nopodandi in onuka kon i Tuhan Allahmu, dikabí in umuran momaḷu-maḷui kon wakutu in mogintompod kon dandi tatua, sin umuranbí tuntuton i Tuhan Allahmu intua, bo baradosaanbí in moiko aka diá intompodan monimu intua.

²² Moiko in diábí baradosaan aka diá modandi kon i Tuhan.

²³ Táe aka ibogmubí tontaní in modandi kon i Tuhan Allahmu, yo mustibí intompodan monimu intua.

²⁴ Aka moiko bo koyogot mayá bo sinumaḻib kon gobá in anggur in intau ibanea, yo motaaubí in moiko mokaan kon bungai in anggur tongonukabí in koibog monimu, táe diábí motaau mobonu kon karansi.

²⁵ Aka moiko bo minayá nongin gobá in intau ibanea, yo motaaubí in moiko mokaan kon gandum inta kinoyut monimu in ḻima, táe dikabí rata bo monimu in sabit.”