ULANGAN 22 - Alkitab Singog In Mongondow Masa In Tanaa

¹ Aka sapi ande domba kapunyaan in intau tobangusamu noiḷangkam bo moiko nokoontong kon bobiagon tatua, yo dikabí in iko ki ubo-uboḷmai diá nonotaau, táe diábí in bobiagon tatua kon itoginea.

² Aka kitoginea noyayú in baḷoi, ande diá kinotaauan monimu mongo ki ine in kitoginea, yo diá in bobiagon tatua kon baḷoimu. Aka kitoginea mamangoi motayak yo ogoidon bui kon inia in biag tatua.

³ Natua doman in aidai aka moiko mokodungkuḷ kon keledai tobatú, kaeng todit, ande onuka in kapunyaan in intau tobangusamu.

⁴ Aka keledai tobatú ande sapi kapunyaan in intau tobangusamu noibanting kon daḷan, yo dikabí ki ubo-uboḷmai diá nonotaau, táe tuḷungaibí in bobiagon tatua poposindog bui.

⁵ Bobay in diábí motaau in mogipakeang ná pakeang in ḷoḷaki bo ḷoḷaki in diábí doman motaau momakeang ná bobay, sin intau inta momia kon natua in kinodoíbí i Tuhan Allahmu.

⁶ Aka moiko mokouḻí kon pugad tobatú kon pangkoi in kayu ande kon butá takin ki iná in ḷagapan nogoob mako kon natunea ande noyotakin i adínea mita, yo dikabí mogamá kon ki iná in ḷagapan tatua.

⁷ Moiko in motaaubí mogamá kon i adínea mita, táe pomayádon mako in ki inánea ḷumayug, sinbá moumur in kobiaganmu bo mobiag motompia.

⁸ Aka moiko moposindog in baḷoi, yo musti tondokon monimu in ḻibunea potombutung kon kokiap in atopnea. Dá deemanbí tanggung jawabmu aka oyúon in intau in moḷabú nongkon atop tatua bo matoi.

⁹ Dikabí momuḷa kon pinomuḷa ibanea kon gobá in anggurmu kon ḻikudbí in anggurmu. Aka moiko momuḷa doman, yo moiko in diábí motaau mogamá kon bungai in boyó kon gobá tatua, pinomayá anggur ande pinomuḷa ibanea mako.

¹⁰ Dika mopoyogapang in sapi bo keledai tobatú sin pomajeko.

¹¹ Dika momaké in pakeang inta pinomia nongkon wol bo linen inta pinoyotampit.

¹² Pomiaaidon kon ḷambe-ḷambénea kon ubung in pakeangmu.”

Hukum kon tonibuḷoi

¹³ “Aka ḷoḷaki tobatú motonibuḷoi takin mongodeaga tobatú, bo kon singgai moiduduimai doídon in sia.

¹⁴ Sia noponapud in uboḷ kon ki buḷoinea in diádon porawan kon dodai in mosia notonibuḷoi.

¹⁵ Kon soaḷ tatua guyanga in bobay tatua musti mogamá kon kaeng tonibuḷoi inta oyúonpa in tamak in dugúnea inta moponiata kon ki adí monia in porawanpa kon dodai in nonika. Kaeng tatua musti poontong monia kon guhanga mita in kotá kon pongadilan.

¹⁶ Ki amá in bobay tatua in musti moguman kon i monia, ‘Akuoi nobogoi kon intau tanaa nobaḻí ki buḷoinea, táe tanaa doídon in sia kon inia.

¹⁷ Bo ḷoḷaki tanaa in noponapud in uboḷ bo noguman kon ki buḷoinea in diádon porawan kon dodai in mosia notonibuḷoi. Táe tanaa in noponiata kon ki adíku dodai intua porawanpabí. Taridiaidon in tamak in dugú kon kaeng tonibuḷoinea tanaa!’

¹⁸ Dá guhanga mita in ḻipú musti mogoiní kon ḷoḷaki tatua bo momongkug kon inia.

¹⁹ Mosia in musti doman mokidenda kon inia in doit mogatut in doit saḷaka bo mobogoi in doit tatua kon i nunutonnea sin sia ain nomoguyaat kon tangoi in bobay Israel tobatú. Bo bobay tatua in mustibí umuran mobaḻí ki buḷoinea, bo diábí motaau gaaton modapot in sia matoi.

²⁰ Táe aka inta pinonapud tatua totuu bo diá in bukti kon ki buḷoinea tua in porawanpa kon dodai in notonibuḷoi,

²¹ dá bobay tatua in musti diaan kon tayowon in baḷoi in guyanganea. Kon tampat tatua ḷoḷaki mita nongkon kotá tatua musti mogandur in batu kon bobay tatua dapot in matoi. Bobay tatua ain nogaid kon inta mokooyá kon bangusa naton sin nosiugdon takin ḷoḷaki kon dodai in diápa pinobuḷoi kon dodai in sia nogutunpa kon baḷoi i amánea. Aid monimu tatua monginggamá kon aid moraat tatua.

²² Aka ḷoḷaki tobatú kinoumaan koyogot in nosiug takin ki buḷoi in intau ibanea yo taya dua tua tumpaḷa hukumon matoi. Aid monimu natua monginggamá kon inta moraat tatua.

²³ Umpamanea kon bonu in kotá ḷoḷaki tobatú kinoumaan kon dodai in sia koyogot nosiug takin mongodeaga tobatú inta ain kinantangan in intau ibanea.

²⁴ Kon pelekara natua mosia in musti diaan poḷuai kon kotá bo ara bo in batu dapot in matoi. Mongodeaga tatua in musti ḻimodon sin sia in diá nomaḷú mokituḷung, bo tua in nobaḻí kon bonu in kotá, inta aka sia momaḷú yo kodongoganbí. Bo ḷoḷaki tatua in musti doman ḻimodon sin sia ain nosiug takin mongodeaga inta ain kinantangan. Takin mohukum kon i nayadua tua, yo moiko in monginggamádon kon inta moraat tatua.

²⁵ Táe noyoposibí in aka kon gobá bo ḷoḷaki tobatú modomok kon mongodeaga tobatú inta ain kinantangan in intau ibanea. Aka natua dá tongábí ḷoḷaki in hukumon matoi.

²⁶ Mongodeaga tatua in diábí motaau bongkugon sin sia in diábí nomia kon inta patus pohukuman kon inia dapot in matoi. Pelekara tatua in naonda bo pelekara in intau tobatú inta nonubu kon intau tobatú bo poḷat noḻimod.

²⁷ Pinodomokan tatua nobaḻí kon gobá, bo umpaka mongodeaga tatua momaḷú mokituḷung, táe diá in intau in namangoi motuḷung kon inia.

²⁸ Umpamanea ḷoḷaki tobatú kinoumaan kon dodai in sia nodomok kon mongodeaga tobatú inta diápa kinantangan.

²⁹ Kon pelekara tatua in ḷoḷaki tatua musti moguboḻi kon i amá in mongodeaga tatua in bogoi kon tonibuḷoi ḻima nopuḷú in doit saḷaka in kobayongnea. Mongodeaga tatua in mustibí umuran mobaḻí ki buḷoinea sin sia in pinakisadon nosiug takinnea bo kon bonu in kobiagannea sia in diábí motaau gaaton.

³⁰ Diábí tobatúmai intau in motaau mopoonagmai kon i amánea pongin dodia mosiug takin ki buḷoi amánea tobatú.”