ULANGAN 21 - Alkitab Singog In Mongondow Masa In Tanaa

Pelekara pinoḻimodan inta diá motaau paḷuton

¹ “Aka kon butá inta inogoi i Tuhan Allahmu kon inimu bo kinokadapatan kon oyúon in intau minatoi iḻimod kon gobá bo diá kinotaauan mongo ki ine in noḻimod kon inia,

² dá guhanga bo hakimmu musti mayá mogukur kon koyayú in tampat inta kinouḻían kon mayat tatua mopobayá in kotá mita inta noyodiugan.

³ Bo guhanga mita nongkon kotá inta totok in nodiug kon tua musti momiḻí kon sapi tobatú inta batánea inta diápa dodai in onda in pinogaid.

⁴ Sapi tatua in musti diaan monia kon tampat tobatú kon diug in ongkag inta diá mogio-giot bo inta butánea diápa dodai in onda in pinajeko ande binunakan. Kon tampat tatua putoḷondon monia in sigogow in bobiagon tatua.

⁵ Imang mita in Lewi musti doman mayá intua, sin mosia in musti monantú kon bayongan in pelekara popisí in aid inta moraat. Mosia tua in piniḻí i Tuhan Allahmu sin mogundoi kon i-Nia bo mosingog kon barakat podoyon kon tangoi-Nea.

⁶ Bo bayongan guhanga nongkon kotá inta totok in nodiug bo musti mondarit kon ḻima monia kon tudu in sapi tatua

⁷ bo moguman, ‘Deemanbí kami in noḻimod kon intau tatua, bo diá doman kinotaauan nami mongo ki ine in noḻimod.

⁸ Tuhan, ampungaidon in Israel umat-Mu inta pinoḷuai-Mu nongkon Mesir. Ampungaidon in kami bo dikadon mopobaba kon inami in taḷá kon intau inta iḻimod diá kotaḷá tatua.’

⁹ Dá pinongin mogaid kon onu inta sinuntut i Tuhan, yo moiko in diádon popobabaan in taḷá kon pinoḻimodan tatua.”

Atorang kon bobay inta sinokodakop kon parang

¹⁰ “Aka moiko moparang bo ki Tuhan Allahmu nopountung kon i monimu, bo moiko mogamá kon tawanan in parang,

¹¹ degá kon sigad monia tua oyúon in bobay moḷunat tobatú inta kinoibogmu bo ibogonmu in baḻíon in sia buḷoi.

¹² Diadon in bobay tatua kon baḷoimu. Kon tua in sia musti mokigonsing in buoknea, mongingkonuku,

¹³ bo momaḷui kon ḷambung. Sia in musti mogutun kon baḷoimu bo mononogumatoi kon kinopatoian in guyanganea tobuḷan in koonggotnea. Mopaḷut mako kon tua iko motaaudon motonibuḷoinea.

¹⁴ Aka kon singgai moiduduimai bo iko doídon kon inia, iko in motaau bidon mopotabá kon inia kon ondaka in koibognea bo moiḷuatdon. Sia in diábí motaau baḻíonmu ná ata ande potaḷuimu, sin sia aindon pinakisamu mosiug takinmu.”

Atorang hak in adí guya-guyang

¹⁵ “Aka ḷoḷaki tobatú in kobuḷoi kon doyowa, bo taya dua tumpaḷa nopononggadí in adí ḷoḷaki, táe adí inta muna noilahir deemanbí adí nongkon i buḷoinea inta totok in kinotabinea.

¹⁶ Aka intau tatua moibog monantú mongo naonda in pososilainea kon kapunyaannea kon i adínea mita, sia in diábí motaau in momiḻí kon adí inta noilahir nongkon i buḷoinea inta totok in kinotabinea poḷat mobogoi kon adí tatua in tonsilai inta nobaḻí hak in adí guya-guyang.

¹⁷ Sia in mustibí mobogoi in doyowa nosilai nongkon kapunyaannea kon adí ḷoḷaki inta guya-guyang, umpakabí adí tatua deeman ki adí i buḷoinea inta totok in kinotabinea. Hak in adí guya-guyang mustibí akúon i amánea, bo adí tatua in mustibí ogoian in haknea podudui in hukum.”

Atorang kon adí moromú

¹⁸ “Aka oyúon in adí ḷoḷaki inta motogat i gina, moibog momarontak bo doí dumudui kon singog in guyanganea umpaka aindon ihukum monia in sia.

¹⁹ Dá guyanganea in musti modia kon inia kon guhanga mita in kotá inta pinogutunan monia bo mopoigum sinbá adí tatua in adilon.

²⁰ Mosia in mustibí moguman kon guhanga mita tatua, ‘Adí nami naa motogat in gina, moibog moḷawang bo doí dumudui kon i nami, sia moibog mopomia ibo-ibog kon doit bo monginum dapot in moḷoḷangu.’

²¹ Bo intau mita ḷoḷaki kon kotá tatua musti mogarab in batu kon adí tatua modapot in matoi. Aid natua moponiata kon moiko in monginggamá kon aid moraat. Bayongan in intau kon Israel in mokodongogdon kon tua bo angoiandon in ondok.”

Atorang mita

²² “Aka intau tobatú ihukumdon minatoi sin nogaidon kon inta moraat, bo mayatnea in binambé kon oigi,

²³ yo mayat tatua in diábí motaau pomayá mako kon tua tonggobii tua, táe mustibí ḷobongon kon singgai doman tua. Mayat inta noibambé mokopoangoi kon kutuk nongkon i Allah kon butá. Dá ḷobongdon in mayat tatua sinbá moiko in diá mokokotor kon butá inta inogoi i Tuhan Allahmu kon inimu.