ULANGAN 2 - Alkitab Singog In Mongondow Masa In Tanaa

¹ Pangabisannea kita in nobui kon padang gurun nongin daḷan inta nopobayá ná Teluk in Akaba, ná inta pinarenta i Tuhan. Noonggot in kita nodondaḷoi kon buḷud in Edom.

² Bo ki Tuhan noguman kon inakó

³ kon noonggotdon in kita nodondaḷoi kon butá tanaa. Dá kita in mustidon mayá ná utuan.

⁴ Onda intua ki Tuhan nopotabá kon inakó mobogoi in totundú mita tanaa kon inimu, ‘Diádon moonggot bo moiko in tumuot kon butá in Edom, butá i utatmu mita, buí i Esau. Mosia in motoguondokbí kon inimu,

⁵ táe diábí motaau in moiko in monubu kon i monia, sin butá monia tua in diá topiḻikmai in ogoi-Ku kon inimu, sin butá in Edom inogoi-Kudon kon buí i Esau.

⁶ Moiko in motaaubí in motaḷui kon kaanon bo inumon kon i monia.’

⁷ Toropbí naonda in ki Tuhan Allahmu nomarakatdon kon i monimu kon bayongan in yagi-yagi inta inaidan monimu. Iḷukadan-Nea in moiko kon tungkuḷ in moiko kon padang gurun inta mobendar naa. Inoḻiungan-Nea in moiko opat nopuḷú notaong naa bo nobogoi domandon in bayongan onu inta pakéon monimu.

⁸ Onda intua kita nongingguputdon kon binayáan, nonaḷámai kon daḷan inta moitaḻib kon kotá mita in Elat bo Ezion-Geber nopobayá ná Laut Mati, bo nomurow nopobayá ná timur laut mopobayá in Gurun Moab.

⁹ Ki Tuhan noguman kon inakó, ‘Intau in Moab, buí i Lot, diábí motaau in tuyayowon monimu. Dika doman monubu kon i monia. Butá in Ar inogoi-Kudon kon i monia bo diábí topiḻikmai in butá monia in ogoi-Ku kon inimu.’ ” (

¹⁰ Tungkuḷ intua Ar iḻitúan intau in Emim. Mosia tua in mongoḷoben bo mongoḷantud, notongkai in intau mita in Enak, bo bangusa in tuyá.

¹¹ Ná intau in Enak, mosia sinangoian doman intau in Repaim, táe aka kon intau in Moab mosia tua sinangoi intau in Emim.

¹² Dungkuḷmai intau in Hori nogutun kon Edom, táe pinoguntun bo iyopú in buí i Esau, inta kon singgai noiduduimai iḻimitú kon butá monia; ná doman in bangusa Israel kon singgai noiduduimai noguntun kon musung mita monia nongkon butá inta inogoi i Tuhan kon i monia.)

¹³ “Onda intua kita iḷumoḷan kon Ongkag in Zered pinodudui ná inta parenta i Tuhan kon i naton.

¹⁴ Tua in nobaḻí toḷu nopuḷú bo waḷu notaong naonda in kita nonaḷámai kon Kades Barnea. Bayongan tontara kon dodai intua ain minatoi ná inta pinoguman i Tuhan.

¹⁵ Ki Tuhan umuranbí moḷawang kon i monia nodapot in mosia noyopú komintan.

¹⁶ Naonda in mosia nodait minatoi,

¹⁷ ki Tuhan noguman kon i naton,

¹⁸ ‘Singgai in naa moiko nongin butá in Moab, noitaḻib kon butá in Ar.

¹⁹ Dá moiko in nodapot kon diug in butá intau in Amon, buí i Lot. Dika monuyayow ande monubu kon i monia, sin diábí topiḻikmai in butá inta ain inogoi-Ku kon i monia in ogoi-Ku kon inimu.’ ” (

²⁰ Butá tatua doman in sinotaaubí saḷaku butá in Repaim, tangoi in bangusa inta tungkuḷ intua nogutun kon tua; aka kon intau in Amon yo mosia tua in sinangoian monia intau in Zamzumim.

²¹ Naonda bo intau in Enak, mosia mongoḷoben bo mongoḷantud doman in awak. Mosia totuu mongo ropot, bo mobarong in mosia. Tongá iyopú i Tuhan in mosia, nodapot inagow in intau Amon in butá tatua, bo poḷat pinogutunan monia.

²² Natua doman in pinomia i Tuhan kon intau in Edom, buí i Esau, inta nogutun kon buḷud in Edom. Iyopú i Tuhan intau in Hori, dá intau in Edom nogagow kon butá tatua bo poḷat iḻitúan, bo nogutundon notantú kon tua nodapot in masai naa.

²³ Butá kon kino ouput in pintad in Dagat Toyuak iḻitúan in intau mita nongkon pulau Kreta. Mosia ain noyompat kon intau in Awi, intau inta muna-munamai nogutun kon butá tatua, bo dongka iḻimitú kon butá tatua nodapot in toḷatan kinoyoyayúbí in kotá in Gaza.)

²⁴ “Naonda in kita nonaḻib kon butá in Moab, ki Tuhan noguman kon i naton, ‘Bayádon in tanaa mako ḷumoḷan kon Ongkag in Arnon. Ogoi-Kudon kon i monimu in Sihon, datu in Amori inta nomarenta kon Hesybon, takin butánea. Tubudon in sia, bo ḻitúaidon in butánea.

²⁵ Pinangkoi kon singgai naa baḻíon-Ku in moiko kobangkaḷ in bangusa mita kon ondaka. Bayongan intau in mourotbí sin moondok aka mokodongog kon tangoi monimu.’ ”

Israel nonaḷow kon Datu in Sihon

²⁶ “Onda intua akuoi nopotabá in tongonumai intau nongkon padang gurun Kedemot minayá kon i Datu Sihon nongkon Hesybon sin mopotaau in tosingogon dodamean nanaa:

²⁷ ‘Ogoiaipa in wakutu in kami tumaḻib mongin butá i Tuangku. Kami in tumuḻidanbímai in mayá diábí tumaba-tabat kon daḷan moḷoben.

²⁸ Uboḻianbí nami in kaanon inta kaanon nami bo tubig inta inumon nami. Kami in tongábí mongin daḷan tanaa,

²⁹ modapot in kami ḷumoḷan kon Ongkag in Yordan sin tumuot kon butá inta inogoi i Tuhan Allah nami kon i nami. Buí i Esau inta nogutun kon Edom bo intau mita in Moab inta nogutun kon Ar nobogoi domandon kon i nami nongin butá monia.’

³⁰ Tongá diábí inogoi i datu in Sihon in kita nongin butánea. Pinotontogat i Tuhan Allahmu in ginanea sin makusud-Nea bá taḷowon naton in sia. Dá butánea tatua umuranpa doman iḻitúan naton dapot in tanaa mako.

³¹ Onda intua ki Tuhan noguman kon inakó, ‘Datu in Sihon bo butánea Ogoi-Kudon kon inimu; gamá bo ḻitúaidon in butá tatua.’

³² Dá namangoidon in ki Sihon takin tontaranea mita sin monubu kon i naton kon diug in kotá in Yahas.

³³ Táe pinosarakan i Tuhan Allah in sia kon i naton, bo sinaḷow naton in sia takin ki adínea mita bo bayongan in tontaranea.

³⁴ Kon dodai doman intua inagow naton bo irimumud in bayongan kotá, bo noḻimod kon bayongan intau inta nogutun kon tua, ḷoḷaki bobay bo adí mita. Diádon tobatúmai in sinaḻiban.

³⁵ Bobiagon mita monia ginamá naton bo kotánea mita in inagow naton.

³⁶ Takin totuḷung i Tuhan Allah naton, kita nokoagow kon bayongan kotá tatua, pinangkoi kon Aroër, kon popod in Ḷopá in Arnon, bo kotá kon yuak in ḷopá tatua, nodapot kon butá in Gilead. Diábí in dinding kotá inta motogat naton umpagon.

³⁷ Táe kita in diábí dinimiug kon butá in intau Amon ande kon bingkí Ongkag in Yabok ande kotá mita kon buḷud ande kon tampat ibanea kon ondaka inta diá inogoi i Tuhan Allah naton.”