ULANGAN 18 - Alkitab Singog In Mongondow Masa In Tanaa

Tonsilai in imang mita

¹ “Bayongan suku in Lewi inogoian in oaidan nobaḻí imang, tuamai in diábí motaau in motarima kon butá tonsilai kon Israel. Mosia in musti tongá mobiag nongkon sosumba mita bo kuruban mita ibanea inta inogoi Tuhan.

² Mosia in diábí motaau kobutá ná suku mita ibanea, sin ki Tuhanbí in nobaḻí silai budel monia, ná inta pinodandi i Tuhan kon i monia.

³ Aka intau tobatú moposumba in kuruban sapi ande domba, dá paanea kon muna, ayoi bo sian in bobiagon tatua musti ogoi kon i imang mita sin mobaḻí tonsilai monia.

⁴ Boyó muna in gandum, tubig in anggur, ḷana in zaitun bo bubuḷ in domba, mobaḻí doman tonsilai monia.

⁵ Nongkon bayongan in suku Israel, ki Tuhan Allahmu ain nomiḻí kon suku in Lewi nobaḻí imang modapot kon adí bo ompu.

⁶ Aka intau in Lewi inta nongkon kotá ondaka kon Israel mamangoi kon tampat inta piniḻí i Tuhan bo moibog mogutun kon tua,

⁷ dá sia in motaaubí mogundoi kon i Tuhan Allahnea saḷaku imang ná intau mita in Lewi ibanea inta nopobayá in oaidan kon tampat tatua.

⁸ Sia in mustibí motarima kon kaanon inta motongkai in kobayongnea ná imang mita ibanea; onu in nouḻínea nongkon koluarganea, nobaḻí doman tonsilainea.”

Oaid mita inta kinodoí

⁹ “Aka moiko tumuotdon kon butá inta inogoi i Tuhan Allahmu kon inimu, dikabí dumayan kon kororaat inta inaidan in bangusa mita kon tua.

¹⁰ Kon sigad monimu dikabí in moposumba kon i adínea mita mobaḻí kuruban payongon. Bo dikabí tobatúmai in mobaḻí mononanow, motayak kon tanda mita, momaké in totaau ande

¹¹ totaau ponggaing, ande mogogoiní kon intau mita inta ain minatoi.

¹² Intau inta nomia kon oaidan mita moraat natua kinodoí i Tuhan Allahmu, bo tuamai in bangusa mita tatua pinoguntun-Nea nongkon tayowonmu.

¹³ Dá pogundoidon in moiko kon i Tuhan Allahmu takin ḻimbatú in ginamu.”

Ki Allah nodandi kon mopotabá in nabi tobatú

¹⁴ Onda intua ki Musa noguman, “Bangusa mita kon butá inta bain ḻitúan monimu tua in dinumudui kon tonggina in mononanow mita bo motayak kon tanda mita. Táe ki Tuhan Allahmu in diábí mobogoi kon i monimu mogaid kon natua.

¹⁵ Táe nongkon bangusa naton tontaní potabá-Neabí mangoi kon inimu in ná akuoi naa, bo moiko musti motoindudui kon inia.

¹⁶ Kon singgai moiko noyosipun kon Buḷud in Sinai, moiko mopoigum sinbá moiko dikadon mokodongog kon i Tuhan Allahmu mosingog bo diádon mokoontong kon koangoian-Nea kon bonu in tuḷú inta kodoko-dokot, sin moiko moondok in matoi.

¹⁷ Tuamai in ki Tuhan noguman kon inakó, ‘Onu in inigum monia tua in mobijaksanabí.

¹⁸ Nongkon bangusa monia tontaní Akuoi mopotabá mangoi kon i monia in nabi tobatú ná iko. Akuoi in mopotaaubí kon inia onu in musti singogonnea, bo sia in mopotaaubí kon bangusa tatua in bayongan inta pinarenta-Ku.

¹⁹ Sia in mosingogbí podoyon kon tangoi-Ku, bo Akuoi in mohukum kon i inekabí inta doí mokidongog kon inia.

²⁰ Táe aka nabi tobatú mobarani mopotaau in koyow podoyon kon tangoi-Ku bokaka Akuoi in diábí nopotabá kon inia mogaid kon tua, yo sia tua in mustibí matoi; natua doman in bayongan nabi inta mosingog podoyon kon tangoi in ilah mita ibanea mustibí matoi.’

²¹ Degá moiko in moḻibó kon bonu in gina, ‘Naonda in kototaau monimu kon koyow in nabi tobatú tua in nongkon i Tuhan andeka deeman?’

²² Aka nabi tobatú mosingog podoyon kon tangoi i Tuhan, táe onu in siningognea tua diá noniata, dá tosingogonnea tatua in deemanbí nongkon i Tuhan. Nabi tatua in mosingogbí pinodoyon kon tangoinea tontaní bo dikabí in moiko moondok kon inia.”