ULANGAN 15 - Alkitab Singog In Mongondow Masa In Tanaa

Taong noginpitu

¹ “Kon buit in pomuḷoi in taong noginpitu moiko musti momia kon pomopatan kon boḻi.

² Nanaa in pogogaid. Intau mita in Israel inta nopoḷuan in doit kon intau tobangusanea, musti momopatdon kon boḻi tatua, sin podudui kon onu inta ain sinantú i Tuhan tontaní boḻi tatua ain bidon pinopatan, dá diá bidon motaau igumon bui.

³ Moiko in motaaubí in moigum kon doit inta pinoḷuanmu kon intau ango-angoi, táe diábí motaau in moigum kon doit inta pinoḷuan monimu kon intau tobangusamu.

⁴ Ki Tuhan Allahmu in momarakatbí kon i monimu kon butá inta inogoi-Nea kon inimu. Dá kon sigad in bangusamu diábí in intau mobiag mobogá,

⁵ asaḷ bo moiko motoindudui kon i Tuhan Allahmu, bo takin motaridi momia kon bayongan inta pinotaauku kon inimu singgai in naa.

⁶ Ki Tuhan Allahmu momarakatbí kon i monimu ná inta pinodandi-Nea. Moiko in mopoḷuanbí in doit kon mobayong in bangusa, táe moiko tontaní in diábí moḷuan, moiko in mongawasabí kon mobayong in bangusa táe mosia in diábí mongawasa kon i monimu.

⁷ Aka moiko bo mogutundon kon butá inta inogoi i Tuhan Allahmu kon inimu, bo kon tobatú in kotámu oyúon in intau tobangusamu inta kinodaitan, dikabí tongá morai kon kobiaganmu tontaní bo doí motuḷung kon inia.

⁸ Táe, moiko in musti mokopopia kon gina bo mopoḷuan kon intau tatua kinobobayong inta paraḷuonnea.

⁹ Dika in iko doí mopoḷuan kon inia poḷat moguman kon taong pomopatan kon boḻi motoyongdon. Dika pomayá mako in raian moraat natua mongawasa kon ginamu. Aka moiko doí mopoḷuan, intau tatua in mokuanibí kon i Tuhan sin mopongadu kon i monimu, dá moiko in poniatadon kon kotaḷá.

¹⁰ Ogoiai in sia takin pia in gina bo deeman tongá pakisa, dá ki Tuhan Allahmu in momarakatbí kon bayongan inta inaidanmu.

¹¹ Kon sigad in intau Israel umuranbí oyúon in tongonumai intau inta mobiag mobogá bo kinodaitan in pakéon. Tuamai in akuoi moguman kon i monimu mokopopia kon gina kon i monia.”

Aid kon ata mita

¹² “Aka intau ḷoḷaki ande bobay nongkon bangusamu moposarakan in awaknea mobaḻí atamu, sia in musti mogaid kon inimu kon bonu in onom notaong. Kon taong noginpitu sia in mustibí poḷuaton.

¹³ Ata inta pinoḷuatdon tatua diábí motaau in pomayá mako mayá takin diá kodia-dia in onu bo onu.

¹⁴ Takin sanang in gina ogoiaidon in sia nongkon onu inta inogoi i Tuhan Allahmu kon inimu, tuata in bembé domba, gandum bo anggur.

¹⁵ Toropdon kon moiko in koḻipod in atabí doman kon Mesir bo pinoḷuatdon i Tuhan Allahmu; tuamai in ogoiku in parenta tanaa kon inimu.

¹⁶ Táe aka ata tatua doí mayá sin sia in motabi kon inimu bo tombonu in baḷoimu bo mosanangbí in ginanea in mogutun moyotakinmu,

¹⁷ diádon in sia kon ngara in baḷoimu bo bubúaidon in bongoḷannea, dá sia in mobaḻídon atamu kon dodai in sia mobiagpa. Natua doman in musti popoaidmu kon i atamu inta bobay.

¹⁸ Aka moiko mopoḷuat in ata tobatú, dika momanasaḷ, sin kon bonu in onom notaong sia ain notuḷung kon oaidanmu takin tongá tongobotak in gaji in bobantung tobatú. Aidaidon in parenta tatua, dá ki Tuhan Allahmu in momarakatbí kon bayongan inta aidanmu.”

Adí in sapi bo bembé domba inta muna pinogadí

¹⁹ “Adí in sapi bo bembé domba koḷakian inta muna pinogadí mustibí posumba kon i Tuhan Allahmu. Sapi tatua in diábí motaau in pakéon pomajeko, bo domba in diábí motaau in gonsingan.

²⁰ Pomuḷoi in taong moiko tobaḷoian musti mokaan kon tapúnea kon tayowon i Tuhan Allahmu, kon tampat inta piniḻí i Tuhan.

²¹ Táe aka bobiagon tatua nobogit, ná inta nopengkoḷ, nobilog ande bogit moḷoben ibanea, yo diábí motaau monimu posumba kon i Tuhan Allahmu.

²² Batúan in intau, pinomayá inta modarit ande inta nonajis, motaaubí mokaan kon tua kon baḷoinea, ná mokaan kon tapú in rusa ande tapú in kijang.

²³ Dugúnea in diábí motaau kaanon, táe musti popobutak kon butá ná tubig.”