ULANGAN 14 - Alkitab Singog In Mongondow Masa In Tanaa

Pononogumatoi inta moitaḷá

¹ “Moiko nion in umat i Tuhan Allahmu. Dá aka oyúon in kinopatoian, dikabí in moiko monompaḻí kon awak ande mokibangkuḷug in buok kon dotá in pogotmu ná oaid in bangusa mita ibanea.

² Moiko nion in kapunyaan i Tuhan Allahmu; nongkon bayongan in bangusa kon dunia naa, moikobí nion inta piniḻí i Allah nobaḻí umat-Nea.”

Mahaḷuk inta haram bo inta halal

³ “Dika mokaan kon mahaḷuk inta pinoniata i Tuhan kon haram.

⁴ Naa in motaau kaanon monimu: sapi, domba, bembé,

⁵ rusa, domba in kayuon, bembé in kayuon, kijang

⁶ bo bayongan mahaḷuk inta konukunea nobotak bo umuran mongongguyom.

⁷ Moiko in diábí motaau in mokaan kon mahaḷuk inta konukunea diá nobotak bo diá mongongguyom. Dika mokaan kon unta, kelinci ande marmot. Mahaḷuk tatua in haram sin umpaka mongongguyom, táe konukunea in diábí nobotak.

⁸ Dika mokaan kon boké. Mahaḷuk tatua in harambí, sin umpaka konukunea nobotak, táe diá in sia mongongguyom. Tapúnea in diábí motaau kaanon, aka minatoi diábí motaau ḻiaion.

⁹ Moiko in motaaubí mokaan kon bayongan in toyá inta kokokapoi bo kogunap.

¹⁰ Mahaḷuk inta nobiag kon tubig táe diá kokokapoi bo diá kogunap tua in harambí, dá diábí motaau kaanon.

¹¹ Moiko in motaaubí in mokaan kon noyagi-yagimai in ḷagapan inta diá haram.

^12-18 Táe tongonu norupa in ḷagapan in diábí motaau kaanon monimu, tuata: ḷagapan boniá, monikuḷu, tongonu norupa in boniá nasar, kawag, ḷagapan unta, tangkudayagan, blekok bo noyagi-yagimai in bangow, undan, kasa bo poniki.

¹⁹ Bayongan oḷoḷayug inta kokoḻikipan in harambí, dá diábí motaau kaanon.

²⁰ Mahaḷuk kokoḻikipan inta diá haram in motaaubí kaanon.

²¹ Mahaḷuk inta minatoi mako naníon diábí motaau in kaanon monimu, táe motaaubí in kaanon in intau mita ango-angoi inta nogutun kon yua-yuak monimu, ande potaḷui kon bangusa ibanea. Moiko nion in umat inta ain piniḻí kon i Tuhan Allahmu. Tapú in adí in domba ande adí in bembé diábí motaau in poyodungúon takin tubig in teté i indenea.”

Atorang kon sosumba mopuḷú noporosen

²² “Pomuḷoi in taong moiko musti mopotondí in mopuḷú noporosen nongkon bayongan inta nouḻímu.

²³ Kon tayowon i Tuhan Allahmu, kon tampat inta piniḻí-Nea, inta mobaḻí tampat pooibadaan, moiko musti mokaan kon sosumba mopuḷú noporosen nongkon gandum, tubig in anggur, ḷana in zaitun takin adí in sapi bo adí in bembé dombamu inta muna pinogadí. Aidai intua sinbá umuran in moiko mobalajar mohoromat kon i Tuhan Allahmu.

²⁴ Aka tampat inta piniḻí i Tuhan Allahmu noiḻiudon in yayú nongkon baḷoimu, modapot in mopoḷú noporosen nongkon onu inta nouḻímu kon butá inta inogoi i Tuhan Allahmu kon inimu diádon kodiaanmu kon tua, dá

²⁵ potaḷuidon intua, bo doit boḻinea in diaanmu kon tampat inta ain piniḻí i Tuhan Allahmu.

²⁶ Potaḷuidon in doit tatua kon onu in koibog monimu – sapi ande bembé domba, tubig in anggur ande oinumon inta mokoḷoḷangu – bo kon tampat tatua, kon tayowon i Tuhan Allahmu, moiko motoḷuadí musti mongaan moyotakin bo moposanang in gina.

²⁷ Dika pomayá mako monimu in kobobiag in intau in Lewi inta nogutun kon kotámu mita; toropdon kon mosia tua in diábí kobutá tontaní.

²⁸ Kon buit in taong nogintoḷu, moiko musti modia kon mopuḷú notonsilai nongkon bungai in boyómu kon butámu bo sipunon kon kotámu mita.

²⁹ Kaanon tatua in ogoibí kon intau in Lewi sin mosia in diá kobutá, bo kon intau ango-angoi, adí uno-unon bo inta dongka boba-bobay inta nobiag kon kotámu mita. Mosia in motaaubí in mamangoi mogamá kon bayongan inta paraḷuon monia. Aka aidan monimu in natua, dá ki Tuhan Allahmu in momarakatbí kon bayongan onu inta inaidanmu.”