ULANGAN 13 - Alkitab Singog In Mongondow Masa In Tanaa

¹ Aka nabi tobatú ande intau totumogoindop mopodandi in mujizat ande inta mokoherang

² takin makusud sinbá moiko mosumba bo mogundoi kon ilah mita inta diá dodai onda in kinotaauan monimu, umpakabí onu inta pinodandinea tatua totu-totuu kon nobaḻí,

³ dikadon iko mokidongog kon tosingogonnea. Ki Tuhan Allahmu in nomaké kon intau tatua sin monungkuḷ kon i monimu, sin moindoi mongo totu-totuu in moiko motabi kon i Tuhan ande diá.

^4-5 Intau ná tatua in musti hukumon matoi, sin moibog mopoḷaḻe in daḷan inta pinarenta i Tuhan Allahmu kon inimu. Sia tua in intaubí moraat sin mopotabá kon i monimu moḷawang kon i Tuhan Allahmu inta nopoḷuai kon i monimu nongkon Mesir, tampat pinononggataan kon i monimu. Dá sia tua in mustibí ḻimodon, sinbá onu inta moraat tatua daiton inggamáan. Táe moiko in mustibí umuran dumudui kon i Tuhan Allahmu bo mohoromat kon i-Nia; duduiai in Sia bo aidai in bayongan parenta-Nea. Umuran pokosatia bo pogundoi kon i-Nia.

^6-7 Aka utatmu ande adímu ḷoḷaki ande bobay, ande ki buḷoimu inta kinotabimu ande yobayatmu modagin takin umado-adop modondouḷug kon inimu sin mosumba kon ilah mita ibanea inta diá kinotaauan monimu bo diá doman kinotaauan in mogoguyangmu, ilah mita inta nongkon bangusa mita inta nogutun noyodiugan ande noyogiyayúan,

⁸ yo dika indongoganmu in sia bo dika moibog dondouḷugannea in iko. Dika doman motabi ande mogoḻingoi kon intau tatua.

^9-10 Sia in musti ara bo in batu modapot in matoi. Ikobí in musti momangkoi mogandur in batu kon inia, bo duduian in bayongan intau. Intau inta kotaḷá tatua musti ḻimodon, sin sia in moibog mopoyayú kon i monimu nongkon i Tuhan Allahmu inta nopoḷuat kon inaton nongkon pinononggataan kon Mesir.

¹¹ Dá bayongan in bangusa Israel mokodongogdon kon pinoḻimodan tatua bo mobaḻídon motoguondok, dá diádon tobatúmai in momia kon inta moraat ná tatua bui.

¹² Aka moiko bo mogutundon kon kotá mita inta ogoi i Tuhan Allahmu kon inimu, degá moibaya-bayádon mako in habar

¹³ kon tongonumai intau moraat nongkon bangusamu aindon nopoḷaḻe kon intau inta nogutun kon kotá sin mosumba kon ilah mita inta diá kinotaauan monimu.

¹⁴ Aka kodongogandon in ouman mita natua, yo taridiai kopira. Aka aid moraat tatua totu-totuudon nobaḻí,

¹⁵ dá bayongan intau inta nogutun kon kotá tatua takin bobiagon mita monia musti ḻimodon. Kotá tatua in mustibí kodai-daiton yopúon.

¹⁶ Bayongan kapunyaan in intau mita inta nogutun kon tua musti sipunon bonturungon kon lapangan, bo kotá takin bayongan kapunyaannea in pokakon mobaḻí kuruban kon i Tuhan Allahmu. Mopaḷut mako kon tua pomayádon mako intua mobaḻí utag in pinomokakan bo diádon motaau posindogon bui.

¹⁷ Barang mita inta mokokatuḷa tatua in diábí motaau tagúon monimu sin pakéon tontaní, táe mustibí ḷoḷangon komintan. Dá torú i Tuhan Mopiong domandon bo poontong-Neadon kon i monimu in tabi-Nea. Motabidon in Sia kon inimu bo baḻíon-Neadon in moiko bangusa inta moḷoben ná inta pinodandi-Nea kon mogoguyangmu,

¹⁸ asaḷ bo moiko dumudui kon bayongan in parenta-Nea inta pinotaauku kon i monimu singgai naa, bo mogaid kon bayongan inta kinoibog-Nea.”