ULANGAN 12 - Alkitab Singog In Mongondow Masa In Tanaa

Tongá tobatú in pooibadaan

¹ “Naa in hukum mita inta musti duduian monimu kon dodai in mobiagpa kon butá inta ogoi kon inimu i Tuhan, Allah in mogoguyangmu.

² Naonda in moiko tumuot kon butá tatua musti rimumudon monimu in tampat mita pososumbaan kon tudu in buḷud mita moḷantud, kon buḷud mita moompá bo kon kayu mita inta mongobambar, tampat pososumbaan in bangusa mita tatua kon ilah mita monia.

³ Umpagdon in mezbah mita monia bo rimumudon in batu mita inta inanggap monia mokaramat. Tubádon in lambang mita i Asyera, bo rimumudon in patong mita berhala monia, dá ilah mita tatua in diá bidon sumbáan kon tampat mita tatua.

⁴ Kon dodai in moiko mosumba kon i Tuhan Allahmu, dikabí dumayan kon pososumba in intau mita tatua kon ilah mita monia.

⁵ Nongkon bayongan butá in suku in mita Israel, ki Tuhan Allahmu in momiḻíbí kon tampat tobatú sinbá bangusa naton motaau mamangoi in tayowon-Nea bo mosumba kon i-Nia.

⁶ Kon tampat tatuata in podiaan monimu kon kuruban payongon takin kuruban mita ibanea, sosumba mopuḷú noporosenmu takin sosumba mita ibanea, kuruban poguboḻi kon dandimu, kuruban ibogmu tontaní bo adí in sapi bo bembé dombamu inta muna pinogadí.

⁷ Kon tua doman, kon tayowon i Tuhan Allahmu, moiko moyotakin in motoḷuadímu musti mongaan takin ḷunganga in gina sin bayongan inta iramujimu oyúon in mangaḻenea sin binarakatan i Tuhan Allahmu.

⁸ Aka wakutu tatua moiangoidon, yo donaaidon ná tanaa in oaid monimu. Umaaipa in tanaa mako moiko moibada kinooibogbí in ginamu,

⁹ sin moiko in diápa sinumuot kon butá inta inogoi i Tuhan Allahmu kon inimu, tampat inta mopia pogutunanmu.

¹⁰ Naonda in moiko ḷumoḷan kon Ongkag in Yordan, ki Tuhan Allahmu in motuḷungbí kon i monimu ḻimitú bo mogutun kon butá inta kon ḷoḷan in ongkag tatua. Sia in mogoḻingoibí kon i monimu nongkon bayongan musung, bo moiko in mobiagbí moaman bo motompia.

¹¹ Onda intua ki Tuhan Allahmu momiḻí kon tampat tobatú inta motaau posumbaan kon i-Nia. Kon tuata in musti monimu bayáan bo modia kon bayongan inta ain pinogumanku, tuata in kuruban payongon bo kuruban mita ibanea, sosumba mopuḷú noporosen bo sosumba inta pinonangoi inta pinodandimu kon i Tuhan.

¹² Kosanangdon in gina kon tayowon i Tuhan Allahmu, takin adímu mita, bobantungmu mita bo intau mita in Lewi inta nogutun kon kotámu mita, sin intau mita in Lewi diá nokouḻí kon tonsilai kon butámu.

¹³ Moiko in diábí motaau moposumba in kurubanmu kon bayongan tampat inta piḻíon monimu tontaní,

¹⁴ táe tongábí kon tampat inta piniḻí i Tuhan kon butá in sukumu tobatú. Tongábí kon tua in musti poposumbaan monimu in kuruban payongon bo mogaid kon oaidan mita ibanea inta pinarentaku kon inimu.

¹⁵ Táe motaaubí in moiko moratá kon bobiagonmu bo mokaan kon tapúnea kon ondakabí in pinogutunanmu. Moiko in motaaubí in mokaan dapot in komampuan monimu kaanon in bayongan inta inogoi i Tuhan Allahmu kon inimu. Pomuḷoi in intau pinomayá inta nodarit ande inta nonajis, motaaubí in mokaan kon ponoyá tatua, ná doman tua moiko motaau mokaan kon tapú in kijang ande tapú in rusa.

¹⁶ Tongá dugúnea in diábí motaau kaanon, táe musti popobutak kon butá ná tubig.

¹⁷ Kon tampat pogogutunanmu diábí motaau in moiko mokaan kon sosumba mopuḷú noporosen nongkon gandummu, anggurmu, ḷana zaitunmu, sapi ande bembé dombamu inta muna pinogadí, kuruban poguboḻi kon dandimu, kuruban ibogmu tontaní ande sosumba ibanea.

¹⁸ Moiko bo adímu mita, moyotakin in bobantungmu mita bo intau mita in Lewi inta nogutun kon kotámu, musti mokaan kon sosumba tatua kon tayowon i Tuhan Allahmu, kon tampat inta piniḻí i Tuhan Allahmu. Bo kon tampat tatua moiko musti moḷunganga in gina sin bayongan onu inta iramujimu.

¹⁹ Ḷukadai sinbá diá modapot in moiko mopomayá mako in kaum Lewi moiḷaḻe kon bonu in moiko mogutun kon butá tatua.

²⁰ Naonda in ki Tuhan Allahmu moginḷoben kon sigad mita in butámu ná inta ain pinodandi-Nea, moiko in motaaubí mokaan kon ponoyá kinooibogmubí.

²¹ Aka tampat inta piniḻí i Tuhan Allahmu tua noiḻiu in yayú nongkon tampatmu, yo moiko in motaaubí moratá kon sapi tobatú, domba ande bembé inta inogoi i Tuhan kon inimu, bo mokaan kon tapúnea kon tampat inta kinoibog monimu, ná inta ain pinogumanku kon inimu.

²² Pomuḷoi intau, pinomayá inta nodarit ande inta nonajis, motaaubí in mokaan kon ponoyá tatua ná doman pokokaan monimu kon tapú in rusa ande tapú in kijang.

²³ Táe ponoyá inta oyúonpa in dugúnea diábí motaau in kaanon, sin nyawanea in kon bonubí in dugú, bo moiko in diábí motaau mokaan kon nyawa takin tapúnea.

²⁴ Dugúnea in beresibí diá motaau kaanon, táe mustibí popobutak kon butá naonda bo tubig.

²⁵ Aka moiko dumudui kon parenta tatua, yo mopiabí in gina i Tuhan, bo moiko takin buímu in mobiagbí motompia.

²⁶ Bayongan kuruban bo sosumba inta ain pinodandi monimu kon i Tuhan, musti diaan monimu kon tampat inta ain piniḻí i Tuhan.

²⁷ Kuruban payongon bo kuruban inta tapúnea kaanon in musti posumba kon tudu in mezbah i Tuhan Allahmu bo dugúnea in popobutak kon tudu in mezbah tatua.

²⁸ Torop kopira in bayongan inta ain pinogumanku kon inimu, dá moiko in nogaidon kon inta mopia bo kinoibog i Tuhan Allahmu, dá moiko bo buímu mosaḷamat bo umuran mobiag motompia.”

Tompoingat kon posumbaan kon patong berhala

²⁹ “Ki Tuhan Allahmu in moyopúbí kon bangusa mita inta nogutun kon butá tatua, dá moiko in motaaudon ḻimitú bo mogutun kon tua.

³⁰ Naonda in bangusa mita tatua yopúon mokopoingat dika modapot in dumayan in moiko mosumba kon ilah mita ibanea, sin oaid natua mokopoangoi kon bodito.

³¹ Pososumba in bangusa mita tatua kon ilah mita monia, dikabí dayanan monimu kon mosumba kon i Tuhan Allahmu, sin mosia in mosumba takin momia kon oaid mita inta mokotor inta kinodoí i Tuhan. Nodapot in adí mita monia tontaní tubáan monia kon tudu in mezbah mobaḻí kuruban kon i ilah mita monia.

³² Aidaidon in bayongan inta pinoki aidku kon inimu; dika dugangan ande gaatan.