ULANGAN 11 - Alkitab Singog In Mongondow Masa In Tanaa

Kokokawasa i Tuhan

¹ “Kotabibí in ki Tuhan Allahmu, bo umurandon duduiai in bayongan parenta-Nea.

² Toropdon tanaa onu inta kinotaauan monimu soaḷ ki Tuhan nongkon onu inta ain kinoyitakanmu. Adímu mita in diábí nokotaau kon tua. Moikobí inta nokoontong tontaní kon naonda in koagungan i Tuhan Allahmu, ropot-Nea, kawasa-Nea

³ bo inta mokoherang mita inta pinomia-Nea. Moiko ain nokoontong tontaní onu inta ain pinomia-Nea kon i datu in Mesir bo kon bayongan in butánea.

⁴ Moiko nokoontong kon naonda in ki Tuhan noyompat kon tontara in Mesir takin bayongan in kabaḷo bo kereta in parang monia. Mosia iḷomot komintan kon Dagat in Gelagah naonda in yogot mogaḷow kon i monimu.

⁵ Kinotaauanbí monimu onu in pinomia i Tuhan kon inimu kon padang gurun kon dodai in moiko diápa nodapot kon naa.

⁶ Kinotoropan doman monimu onu in pinomia i Tuhan kon i Datan bo kon i Abiram, adí mita i Eliab nongkon suku Ruben. Kon tayowon monimu komintan, butá nobotak bo noḻiom kon i monia takin tombonu in baḷoi, ḷoḷaigan, bayongan in bobantung bo bobiagon monia.

⁷ Moikodon tontaní inta ain nokoontong kon bayongan inta mokoherang inta pinomia i Tuhan.”

Barakat kon intau inta motoindudui, bo kutuk kon intau inta diá motoindudui

⁸ “Duduiaidon in bayongan hukum inta pinotaauku kon inimu singgai in naa, dá moiko in motaaudon ḷumoḷan kon ongkag bo tumuot kon butá inta diádon moonggot pogutunan monimu.

⁹ Bo moonggot in kobiagan monimu kon butá inta nooyúon bo mopia, inta pinodandi i Tuhan kon mogoguyangmu bo kon buí monia.

¹⁰ Butá inta pogutunan monimu kon singgai moiduduimai diábí ná butá in Mesir, inta pinogutunan monimu koḻipod. Kon tua moiko musti rumajing in mogaid sin momonu in tubig kon gobá mita kon dodai in moiko moponimboi in bibit.

¹¹ Táe butá inta bain tuotan monimu tua in buḷud bo ḷopá mita; butá kon tua in uyanbí in momobat.

¹² Ki Tuhan Allahmu in monompia kon butá tatua bo moḷukad kinoouput in taong.

¹³ Dá duduiaidon in parenta mita inta pinotaauku kon inimu singgai in naa; kotabibí in ki Tuhan Allahmu bo poibadadon kon i-Nia takin ḻimbatú in gina bo ropotmu.

¹⁴ Aka natua in aidan monimu, dá poonag i Tuhan in uyan kon butámu kon wakutunea, mopaḷut mako in moiko mosipun kon bungai in boyó, bo kon dodai in moiko momangkoidon momunak. Dá moiko in diádon kodaitan in gandum, anggur bo ḷana in zaitun,

¹⁵ bo bonok kaanon in bobiagonmu. Bayongan in kaanon inta paraḷuon monimu in koposadiaan-Neabí kon monimu.

¹⁶ Dika in moiko moibog poyayúon nongkon i Tuhan sin mosumba bo mogundoi kon ilah mita ibanea.

¹⁷ Aka moiko ḻimimpat kon parenta mita tatua, ki Tuhan tumorú kon inimu. Diábí poonag-Nea in uyan; bo butámu in moingkagdon totok modapot in pinomuḷamu diá momungai. Dá diá moonggot bo matoi in moiko kon butá inta mopia inta inogoi i Tuhan kon inimu.

¹⁸ Torop bo taridiaidon in parenta mita tatua. Popotogot kon ḻimamu bo popobogot doman kon pogotmu sinbá umuran toro-toropon.

¹⁹ Tundúdon kon i adímu mita. Oumandon kon bonu in baḷoi bo kon ḷuai in baḷoi, kon dodai in mogogai ande kon dodai in mogaid.

²⁰ Paisdon kon oigi in ḷoḻingkop in baḷoimu bo kon ngara moḷobenmu.

²¹ Dá moiko takin ki adímu mita in moumur in kobiagan kon butá inta pinodandi i Tuhan Allahmu kon mogoguyangmu. Aka ḷangit bo kon ḻimonikpa in butá, dá moiko in umuranpabí mogutun kon butá tatua.

²² Pokosatiadon in dumudui kon bayongan hukum inta pinotaauku kon inimu: Kotabibí in ki Tuhan Allahmu, aidaidon in bayongan inta pinarenta-Nea kon inimu, bo tantúdon kosatia in moiko kon i-Nia.

²³ Dá ki Tuhan in mopoguntunbí kon bayongan in bangusa tatua nongkon tayowonmu, bo moiko in mogutundon kon butá kapunyaan in bangusa mita inta moḷobe-ḷoben bo inta moropo-ropot nongkon inimu.

²⁴ Komintan in butá inta yitakan monimu in mobaḻíbí kapunyaanmu. Butámu in mobendarbí nongkon padang gurun kon dotá in toḷatan modapot kon Buḷud in Libanon kon utuan, bo nongkon Ongkag in Eprat kon pomukaan modapot kon Dagat Toyuak kon toyopan.

²⁵ Kon bayongan butá tatua baḻíonbí i Tuhan Allahmu in intau mita kon tua agían in ondok kon inimu ná inta pinodandi-Nea, dá diádon tobatúmai in intau mokoḷamboi kon i monimu.

²⁶ Singgai naa motaaudon in moiko momiḻí barakat ande kutuk.

²⁷ Moiko in barakatanbí aka motoindudui kon parenta mita i Tuhan Allahmu, inta singgai naa pinotaauku kon inimu.

²⁸ Táe moiko in kinutukbí aka diá motoindudui kon bayongan parenta mita i Tuhan Allahmu, modapotbí in monoḻikud bo mayá mosumba kon ilah mita ibanea inta diá dodai onda sinumba monimu.

²⁹ Naonda in ki Tuhan Allahmu nodia kon i monimu sinumuot kon butá inta pogutunan monimu kon singgai moiduduimai, barakat tatua musti singogon monimu nongkon Buḷud in Gerizim bo kutuk tatua in kon Buḷud in Ebal. (

³⁰ Buḷud doyowa tatua noiukat kon dotá in toyopan kon Ongkag in Yordan kon butá intau in Kanaan inta nogutun kon Ḷopá in Yordan, sinumayow kon toyopan diá noyayú nongkon pangkoi mita in kayu tampat pooibadaan kon More kon diug in kotá in Gilgal.)

³¹ Diádon moonggot bo moiko in ḷumoḷandon kon Ongkag in Yordan bo ḻimitúdon kon butá inta ogoi i Tuhan Allahmu kon inimu. Naonda in moiko mogagow kon butá tatua bo mogutun kon tua,

³² moiko musti dumudui kon bayongan in hukum inta pinotaauku kon inimu singgai naa.”