ULANGAN 10 - Alkitab Singog In Mongondow Masa In Tanaa

Ki Musa bui notarima kon Parenta i Allah inta Mopuḷú

¹ “Onda intua ki Tuhan noguman kon inakó, ‘Musa, pongurigdon kon batu doyowa ná inta muna, bo pomia domandon kon poti kayu tobatú sin potagúan kon tua, bo angoidon kon i-Nakó kon tudu in buḷud.

² Kon batu mita tatua pomaisan-Ku kon singog mita inta notongkai ná kon batu inta ain irumogmu; onda intua batu mita tatua musti bonuonmu kon poti tatua.’

³ Bo akuoi nomia kon poti nongkon kayu akasia bo nongurig kon batu doyowa ná inta muna bodongka dinia notakod kon buḷud.

⁴ Kon batu tatua ki Tuhan nomais kon Parenta Mopuḷú notongkai ná inta muna, tuata in parenta mita inta inogoi-Nea kon i monimu, kon dodai in Sia nosingog nongkon yua-yuak in tuḷú kon singgai in moiko noyosipun kon sipangkoion in buḷud. Nopaḷut mako kon tua ki Tuhan nobogoi in batu tulis tatua kon inakó

⁵ bo akuoi nosiḻigdon bui kon buḷud. Bo podudui in parenta i Tuhan, batu doyowa tatua binonuku kon poti inta pinomiaku–bo pinangkoi kon dodai intua nodapot in tanaa mako batu tulis doyowa tatua umuranpabí kon tua.” (

⁶ Onda intua intau Israel nobuat nongkon parigí mita in intau Yaakan, bo minayá in Mosera. Kon tua in kinopatoian bo pinoḷobongan kon i Harun. Ki Eleazar adínea in nomaḷui kon inia nobaḻí imang.

⁷ Nongkon tua mosia minayá in Gudgod, bo noturus minaya in Yodbata, butá inta nobarong in tubig.

⁸ Kon buḷud tatua Ki Tuhan nopotondí in suku Lewi sin moindoi bo monompia kon Poti Dodandian bo mogundoi kon i Tuhan, bo mosingog kon barakat podoyon kon tangoi-Nea. Tuata in oaidan monia modapot kon tanaa mako.

⁹ Tuamai suku in Lewi diá nokouḻí kon butá tonsilai ná suku mita ibanea, sin ki Tuhanbí tua in tonsilai warisan monia, ná inta pinoguman i Tuhan Allahmu kon i monia.)

¹⁰ “Opat nopuḷú nosinggai bo opat nopuḷú nogobii akuoi nogutun kon tudu in buḷud ná inta inaidanku muna. Komintanpa doman inindongogan i Tuhan in oigumku, bo inóoan-Nea kon diádon moyopú kon i monimu.

¹¹ Bo Sia nopotabá kon inakó mayá modia kon i monimu sinbá moiko mokouḻí kon butá inta ain pinodandi-Nea kon mogoguyangmu.”

Tompoingat i Tuhan sinbá mokopotoindudui

¹² “Tanaa, Utat mita, poḻimbonu kon gina onu in kinoibog i Tuhan Allahmu aidan monimu: Horomatbí in ki Tuhan Allahmu bo aidaidon in bayongan parenta-Nea. Kotabibí in Sia bo pooibada kon i-Nia takin kotompodon in gina bo ropotmu.

¹³ Duduiaidon in bayongan parenta i Tuhan inta singgai naa pinotaauku kon i monimu sin kopiaanmubí tontaní.

¹⁴ Ki Tuhan Allahmu in ki togi ḷangit inta totok in moḷantud; bo butá in tanaa in Siabí doman in kitogi takin bayongan inta kon bonunea.

¹⁵ Táe tabi i Tuhan kon mogoguyang monimu ná domai tua in koḷoben, nodapot in nongkon sigad in bayongan bangusa moikodon nion in piniḻí-Nea, bo nodapotpabí in masai in tanaa moiko in umat-Nea inta kinopiḻían.

¹⁶ Dá pinangkoi kon tanaa mako moiko in musti motoindudui kon i Tuhan bo dikadon bui mokopotontogat kon gina.

¹⁷ Ki Tuhan Allahmu noiḻimonik kon bayongan in ilah bo noiḻiu kon bayongan in kawasa. Sia in Allah inta moḷoben bo mokawasa inta musti duduian. Sia in doíbí tongá momiḻí bo doí doman Sia uboḻian.

¹⁸ Sia in mopotutui kon hak in adí uno-unon bo inta dongka bobay-bobay sinbá moadil in popoaid kon i monia; Sia motabi kon intau ango-angoi inta nobiag kon yua-yuak in bangusa naton bo mobogoi kon i monia in kaanon bo pakeang.

¹⁹ Dá moiko doman in mustibí moponiata in tabimu kon intau mita ango-angoi tatua, sin koḻipod in moiko in nobaḻíbí doman intau ango-angoi kon Mesir.

²⁰ Horomatbí in ki Tuhan Allahmu bo poibadadon tongá kon i-Nia. Moiko in musti umuran mokoposatia kon i-Nia bo mongibot tongá podoyon kon tangoi-Nea.

²¹ Dayowdon in Sia sin Sia in ki Allahmu. Moikodon tontaní in nokoontong kon onu in pinomia-Nea inta motoyang bo mokoondok inta pinomia-Nea sin motuḷung kon i monimu.

²² Kon tungkuḷ in mogoguyangmu minayá in Mesir, kobayong monia tua in tongábí pitu nopuḷú in intau. Táe ki Tuhan Allahmu ain nomaḻí kon i monia nobarong nádon onda bo kobarong in tundi kon ḷangit.”