TITUS 3 - Alkitab Singog In Mongondow Masa In Tanaa

Koyow mita pangabisan

¹ Ponorop kon bayongan in jamaat, bá mosia in umuran kodu-kodudui kon itoi mita bo pomarenta, diá momaḷawang bo tantú mogaid kon inta mopia.

² Tongginaai sinbá mosia in diá umuran moibog moponapud in uboḷ kon intau ibanea andeka moibo-ibog mobobayowan i inekadon, sin maníka umuran mokopopia kon dodia kon tumpaḷa intau bo mokopoaḷus doman kon pososingog takin bayongan in intau.

³ Sin koḻipod in kita tontaní in nobodokbí doman, diá noitutui bo diá motoindudui. Kita sinonggata in norupa-rupamai in ibog in awak naa ande in dunia naa; kita in noyobiag takin niat mita inta moraat, tantú mointoi bo mososaturuan.

⁴ Táe ki Allah, Mopoposaḷamat naton ain nopoontong in tabi bo kopopia in gina-Nea kon i naton.

⁵ Sia in noposaḷamat kon i naton, táe deemanbí popisí in kita ain nogaid kon inta mopia, táe popisíbí in tabi-Nea kon i naton. Sia in noposaḷamat kon i naton takin Roho i Allah inta ain nobogoi kon i naton in kolahiran bo kobiagan mobagu takin cara nondarit kon i naton.

⁶ Ki Allah ain nobogoi in Roho-Nea kon i naton inta pinongin i Yesus Kristus Mopoposaḷamat naton,

⁷ sinbá saḷaku intau mita inta ain nokouḻí kon totabi i Yesus dá mokouḻí doman kon kobiagan mononoi ná inta harapon mako naton.

⁸ Totuubí in singog tanaa. Ibogonku in naa komintan potaaumu kon i monia, sinbá mosia inta ain nopirisaya kon i Allah totu-totuudon moramuji mogaid kon inta mopia, sin natuabí in mopia bo inta baraguna kon bayongan intau.

⁹ Donaai tongá mobobayowan kon soaḷ mita inta diá baraguna, bo mongonguman kon asaḷ usuḷ, ande morogenggeng bo moropatoi kon soaḷ hukum in agama. Sin tua komintan diábí in baragunanea bo diábí doman in kauntungannea.

¹⁰ Intau inta mokopopisí kon ropatoi kon jamaat in musti tongginaai komintan ande kodua; aka doí in sia mokidongog yo dikadon moyobayatnea.

¹¹ Bá kotaauanmudon, kon intau mita natua in totu-totuu bidon moromú bo dosanea mita in noponiatadon kon inia kon kotaḷá in sia.

Tonggina mita pangabisan

¹² Ḷagi naonda in potabákudon mangoi kon inimu in ki Artemas ande ki Tikhikus, yo poramujidon in iko mamangoi kon inakó kon Nikopolis, sin tomayáku in mogutunpa kon tua kon dodai in sempo in tumping naa.

¹³ Poramujidon totu-totuu in motuḷung kon i Zenas, ahli hukum tua, bo kon i Apolos, sinbá mosia in diá kodaitan in rupa-rupa kon binayáan monia.

¹⁴ Tundúdon in intau mita naton mogaid kon soaḷ mita inta mopia sinbá mosia in motaau mopooyúon in bayongan kaparaḷuan inta paraḷu pakéon, sinbá oyúondon in baraguna monia tua.

¹⁵ Ki utat mita naton inta noyotakinku kon naa nokipoyaput in salam kon inimu. Poyaputpa doman in salam nami kon yobayat mita naton inta mopirisaya kon i Kristus. Poigumon mako ki Tuhan naton in umuran mobogoi in barakat kon i monimu komintan. Horomat nami, Ki Paulus