TITUS 1 - Alkitab Singog In Mongondow Masa In Tanaa

Tompouna

¹ Titus adíku! Akuoi, ki Paulus in nomais kon surat tanaa saḷaku mogogaid kon oaidan i Allah bo rasul i Yesus Kristus. Akuoi in piniḻí bo pinotabá sinbá motuḷung kon intau mita inta ain piniḻí i Allah sinbá umuran morigon in pirisaya monia kon i Tuhan Yesus. Bo mustibí umuranku tundúon in mosia sinbá totokdon in monotaau kon onu inta moitutui podudui in agama naton.

² Totundú tatua in pinodoyonbí kon harapan kon kita in motarimabí kon kobiagan inta mopia bo mononoi. Kobiagan tatua in pinodandi bidon i Allah kon tungkuḷ in dunia naa diápa pinomia. Ki Allah in diábí monguboḷ.

³ Sin kon wakutu inta ain sinantú-Nea, pinoniata-Neadon in dandi-Nea tatua kon bonu in koyow-Nea. Koyow-Nea tatua inta pinoki aid-Nea kon inakó, bo tuata in pinotaa-taauku mako podudui in parenta i Allah inta mopoposaḷamat naton.

⁴ Titus, iko uḻe in totu-totuu bidon nobaḻí ki adíku, sin kitada in tumpaḷadon nopirisaya kon i Kristus. Manangka intua umuranku poigumon mako sinbá ki Allah, ki Amá naton bo ki Kristus Yesus Datu Mopoposaḷamat naton, umuran mobogoi in barakat bo kobiagan mopia kon inimu.

Oaidan i Titus kon Kreta

⁵ Uḻe Titus, sinuodkubí sinaḷáan in iko kon Kreta sinbá mopoyotutui kon onu inta paraḷupa poyotutuion. Ná doman tua, bá iko in momiḻídon kon intau mita inta motaau baḻíon itoi kon bonu in jamaat inta kon kotá-kotáannea. Umurai tarukira in singogku mita tanaa:

⁶ Intau inta baḻíon itoi kon jamaat in mustibí intau inta mopia; bo tongá kobuḷoi kon tobatú; bo ki adínea mita mustibí inta komintandon nopirisaya kon i Kristus bo diá doman mokaḷakuang, bo moibog doman mokidongog kon guyanga.

⁷ Sin itoi kon jamaat tua in mogaidbí kon oaidan i Allah, manangka intua mustibí intau inta mopia, diá mododia bo diá morogi, deemanbí intau inta umuran moḷoḷangu, deeman doman intau inta moibog-ibog motayak kon mokorogenggeng bo diá doman dinoit.

⁸ Mustibí intau inta moibog motuḷung kon intau ibanea, moibog kon inta mopia, mokotahang kon bibig, mojujur bo motoindudui kon ibog i Tuhan.

⁹ Sia in musti umuran kumadai moropot kon totundú inta mobanar, ná inta ain sinundú kon inia. Takin natua in sia motaau mononggina kon intau podudui kon totundú inta nobanar, bo mopoontong kon onu inta noitaḷá kon intau mita inta moḷawang kon inia.

¹⁰ Sin nobayongdon in intau nobiag diá noitutui, torutama mosia inta nokadai kon hukum i Musa. Mosia mongonguman kon diá totuu sin makusud monguboḷ kon intau.

¹¹ Intau mita natua in mustibí tokohukumon in bibig monia, sin onu in sinundú monia tua, tongábí mopotombauk kon raian in intau mita inta nobiag tobaḷoian. Tua mita in pinomia monia sin motayak kon kauntungan inta diá patus.

¹² Nokoimontandon in nabi monia inta nongkon ḻipú doman monia in nosingog nanaa: “Intau mita in Kreta umuran monguboḷ, naonda bo mahaḷuk inta mokokaan kon tumpaḷa mahaḷuk, moturá táe maḷat.”

¹³ Bo totuubí in singog in nabi tatua. Manangka intua musti tongginaanmu kopiraan in mosia tua, sinbá mosia in umuran kumadai kon onu inta moitutui

¹⁴ diádon tongá umuran mokidongog kon ouman mita in intau Yahudi bo hukum in intau mita inta doí motarima kon inta moitutui.

¹⁵ Bayongan in yagi-yagi in nodaritbí aka kon intau mita inta nodarit in raian. Táe aka kon i monia inta raian mokotor bo inta diá mopirisaya kon i Tuhan, yo diábí in tobatúmai in modarit, sin raian bo gina monia in komintan domandon mokotor!

¹⁶ Mosia in mongaku kon nonotaaudon kon i Allah, táe oaid monia in diábí noidudui kon inta kinoibog i Allah. Oaid monia tua mokorongó bo diá doman motoindudui; mosia tua in intaubí mita inta diádon mokomampu mogaid kon inta mopia.