TIMOTIUS 2 3 - Alkitab Singog In Mongondow Masa In Tanaa

Kaadaan in intau kon singgai tumi

¹ Toropdon in naa: Kon singgai tumi mobayong in roriga in korasaan.

² Intau mita in dongkadon umuran momikir kon kopontingan monia tontaní. Kon gina monia in dongka bidon tantú doit, mosia in moambungangaḷ bo moibog monguboḷ, moibo-ibog moningkuḻe kon intau, momarontak kon guyanga, diá motaau motuḻí kon kopopia in intau kon i monia bo onu inta sinundú in agama kodoíbí monia.

³ Diábí in tabi monia kon tumpaḷa intau, sahingga doíbí mongampung kon intau inta kotaḷá kon i monia, bo moibo-ibog in moporaatmai kon intau ibanea, bo diá doman mokotahang kon ibog, totok doman in morogi bo soaḷ inta mopia in kodoíbí monia.

⁴ Mosia in diá mosatia, mododia bo mopoḷom-poḷok in raian. Mosia in tumon intau mopandoi bo ibogon monia in tongábí i monia in duduian, deemanbí dumudui kon ibog i Allah.

⁵ Koontongan in mosia morajing moibada, táe onu inta pinoguman kon bonu in agama diábí duduian monia. Manangka intua dikabí dimiug kon i monia tua.

⁶ Oyúon in kon sigad monia tua in sinumuotdon kon baḷo-baḷoiannea bo modondouḷug kon bobay mita inta diádon kodaya bo inta nobayongdon totok in taḷá monia sin tongádon umuran dumudui kon ibog in awak.

⁷ Bobay mita tatua in umuran mopoigum sinbá tundúon in soaḷ mita inta mopia, táe diá dodai onda momangaḻe kon onu inta mopira nongkon i Allah.

⁸ Sahingga in mosia tua naonda bo ki Yanes bo ki Yambres tungkuḷ intua inta umuran moḷawang kon i Musa. Natua doman in oaid in intau mita tatua umuran moḷawang kon totundú inta nongkon i Allah. Raian monia tua in nogoguyaatdon bo pirisaya monia tua in diádon tongo onu.

⁹ Táe ain bidon notantú kon mosia tua in diá bidon mokouḻí kon onu bo onu, sin pompuḷong monia tua in kinotaauanbí in bayongan intau, naonda bo ki Yanes bo ki Yambres doman tungkuḷ intua.

Tonggina mita

¹⁰ Iko aindon dinumudui kon onu inta sinundúku, kon onu inta ain pinomiaku, bo kon tujuan kinobiaganku. Bo ain inontongmu tontaní naonda in kopopirisayaku kon i Yesus Kristus bo tabiku kon tumpaḷa intau. Kinotaauanmu bidon in kososabarku bo kototahang in ginaku.

¹¹ Kinoontonganmudon doman naonda in kororiga pogutúon ná inta kinorasaanku kon Antiokhia, kon Ikonium bo kon Listra. Bo kinotaauanmubí in bayongan roriga inta kinorasaanku tua! Táe pinosaḷamatbí i Tuhan in akuoi nongkon bayongan tua.

¹² Memang bayongan in intau inta moibog mosumba kon i Allah bo inta motobatú i Kristus Yesus in mustibí pogutúon.

¹³ Intau mita moraat bo mongouboḷ in kodugang-kodugangdon in koromú monia. Mosia in umuran monguboḷ kon intau ibanea, táe diábí kinotaauan monia kon mosia tua in kino akaḷanbí doman in intau ibanea.

¹⁴ Táe iko uḻe Timotius, tantúbí kadai kon totundú inta mobanar inta ain sinundúku kon inimu bo inta totu-totuumudon pinirisaya. Sin kinotaauanmubí in gurumu mita.

¹⁵ Musti umuran toroponmu mako, kon nongkon mointokanpamai iko ain nonotaau kon Buk Motusi. Bo Buk Motusi tatua in nobogoi in pongortian kon inimu, sinbá mokouḻí kon kasaḷamatan inta pinodoyon kon pirisaya kon i Kristus Yesus.

¹⁶ Komintan inta pinais kon Buk Motusi inta ain pinoporoho i Allah in baragunabí totok pakéon motundú kon inta mobanar, bo mopoyotutui doman kon onu inta noitaḷá, pakéon doman motundú kon intau, sinbá mobiag moiduduidon kon inta kinoibog i Allah.

¹⁷ Takin Buk Motusi tatua bayongan intau inta nogaid kon oaidan i Allah in sinompobaḷunan in totabi kon i monia modapot in mosompurna sinbá motaaudon mogaid kon bayongan inta mopia.