TIMOTIUS 2 2 - Alkitab Singog In Mongondow Masa In Tanaa

Tonggina sinbá umuran motoindudui

¹ Uḻe Timotius adíku! Totabi inta inogoi kon i naton sin notobatúdon i Kristus in kita, baḻí intua dodoyonan inta mokoroton kon inimu.

² Onu inta ain dinongogmu sinundúku kon tayowon intau moantó, yo pokiaid intua kon intau mita inta motaau pirisayaan bo inta mongopandoi motundú kon intau ibanea.

³ Iko in musti moyotakin rumoriga saḷaku tontara i Kristus inta motoindudui.

⁴ Tobatú prajurit inta koyogot in moparang diá bidon morai kon kopontingannea tontaní, sin moibog in sia moposanang in gina i tuangnea.

⁵ Ná doman tua in tobatú olahragawan, diábí in sia mokountung aka diá dumudui kon atorang inta pinaké kon pinotandingan tatua.

⁶ Tobatú monononggobá inta umuran moramuji totok, tantú siabí in muna-munamai mokaan kon bungai in pinomuḷanea tatua.

⁷ Raibí kopira onu in pinogumanku tanaa, sin ogoianbí i Tuhan in raian mopandoi in iko sahingga in komangaḻeanmudon in bayongan yagi-yagi.

⁸ Torop in naa: Habar Mopia inta pinoyaputku tua in habarbí soaḷ ki Yesus Kristus inta ain nobiag kon sigad in intau minatoi, inta pinolahir saḷaku buí i Daud.

⁹ Bo lantaranbí nopotaau in Habar Mopia tanaa dá akuoi in nokouḻí kon roriga, nodapot in sinokig naonda bo intau moraat, táe pirman i Allah in diábí motaau tokigon monia ná akuoi.

¹⁰ Tuamai akuoi in notababí in notanggung kon tua komintan lantaran kopontingan in intau mita inta ain piniḻí i Allah, sinbá mosia in mokouḻí doman kon kasaḷamatan inta inaidan i Kristus Yesus bo takin kamuliaan inta mononoi.

¹¹ Totuubí in singog tanaa, “Aka kita bo matoi takin-Nea, yo kita in mobiagbí doman takin-Nea.

¹² Aka kita bo motaba, yo kita in moyotakin-Neabí doman momarenta. Aka diá akuon naton in Sia, yo diábí doman akúon-Nea in kita.

¹³ Aka kita diá mosatia, Sia in umuranbí mosatia, sin Sia in umuranbí dumudui kon ibog-Nea tontaní.”

Mogogaid inta dinayow

¹⁴ Mustimu ponorop kon intau mita in naa komintan. Kon tayowon i Allah, tongginaai in mosia sinbá diá tongá mobobayowan kon soaḷ istila mita, sin diábí in mangaḻe intua, nodapot tongábí mopotombauk kon raian in intau mita inta mokodongog kon tua.

¹⁵ Totok poramuji sinbá akuondon i Allah in iko saḷaku intau inta motaau pirisayaan-Nea mogaid kon oaidan-Nea. Poramujibí konbá diá mooyá in iko in mogaid kon oaidan tatua, táe tongádon kabaranian motundú bo mopotaau kon onu inta mobanar nongkon i Allah.

¹⁶ Poyayúdon in mongonguman kon soaḷ mita inta diá in mangaḻenea bo inta mohojat kon i Allah. Ouman mita natua in tongábí mokodugang kon moraat in intau.

¹⁷ Singog monia tua in ḷumandai naonda bo panyaki kanker inta mokopatoi. Kon sigad monia tua in oyúondon in ki Himeneus bo ki Piletus.

¹⁸ Mosia tua ain inumukat kon totundú inta mobanar bo mopotombauk kon pirisaya in tongonumai intau. Mosia in noguman, kon kobiagan nongkon kinopatoian ain bidon nobaḻí.

¹⁹ Táe dodoyonan moroton inta ain pinomia i Allah tua in diá bidon in mokodandú. Kon ḻimoniknea in pinaisdon nanaa, “Kinotaauanbí i Tuhan in umat-Nea inta kinotabi-Nea,” bo “Intau inta mongaku umat i Tuhan in mustidon mogogai in mogaid kon inta noitaḷá.”

²⁰ Kon bonu in baḷoi moḷoben norupa-rupamaidon in pakakat, oyúon in nongkon saḷaka, nongkon buḷawan, oyúon doman in nongkon kayu bo nongkon butá. Oyúon in pinogaid kon oaidan inta mopia totok, táe oyúon doman in pinogaid kon oaidan inta diá totok in moponting.

²¹ Intau inta monaḷámaidon kon bayongan inta moraat kon inia, yo sia tua in pakéon pogaid kon oaidan inta mopia totok. Dongkadon ki tuangnea in ki togi kon inia bo mobaraguna domandon in sia kon i tuangnea. Sia in sinadiadon sin pakéon kon bayongan oaidan inta mopia.

²² Tuamai in dika ná ibogpa in tayowmobiag mita, inta moibo-ibog in diá mopia, táe poramuji mobiag podudui kon inta kinoibog i Allah. Mokopotoindudui kon onu in sinundú i Tuhan, bo motabi kon tumpaḷa intau bo gina in umuran mosanang. Kobiagbí natua takin mosia inta umuran mokuani mokituḷung kon i Tuhan takin gina motuḻid.

²³ Dika moibog mobobayowan takin intau mita bodok inta diá nonotaau kon onu bo onu. Ain bidon kinotaauanmu kon tongábí intua mokopomuká kon yogenggeng.

²⁴ Intau inta nogaid kon oaidan i Tuhan in diábí mopia aka moyogenggeng. Mustibí mokopoaḷus kon pososingog bo mokopoompá kon dodia kon tumpaḷa intau, bo kopira doman in motundú kon intau bo mosabar.

²⁵ Sia in musti mokopoḷukó kon bahasa aka motundú kon intau mita inta moibog momaḷawang; bo tantú mopoigum mako bá ogoian i Allah in kasampatan in intau mita tatua sinbá mogogaidon in mogaid kon dosa bo monotaaudon kon totundú inta noitutui.

²⁶ Sahingga in mosadardon in mosia bui, bo moipilatdon nongkon poyogaḷap in Ibilis inta ain notogot kon inia tua bo nomakisa sinbá umuran dumudui kon koibognea.