TIMOTIUS 1 5 - Alkitab Singog In Mongondow Masa In Tanaa

Kowajiban kon tumpaḷa intau inta mopirisaya kon i Kristus

¹ Dika daḻin-daḻíonmu in tumorú kon i monia inta umur monia noiḻiudon kon i naton, táe diugaibí in sia bo mongonguman naonda bo mongonguman takin in guyangamu tontaní. Ná doman tua in mosia inta nongoguodpa, tongginaaibí in mosia ná ki utatmu tontaní.

² Aka guyanga mita bobay dá pomia doman in mosia ná ki inámu tontaní. Natua doman in mongodeaga mita, pomia doman ná ki ai-aimu tontaní bo kotuḻidbí in gina.

³ Horomatbí in intau inta dongkadon boba-bobay bo inta nobiag dongka sia-sia mita.

⁴ Táe aka intau boba-bobay tatua kogadípa ande kogompupa, yo ki adínea andeka ki ompuneapa tatua in muna tongginaan kon bá umuran tarukiraan in guyanga monia tatua, bo motuḻí kon tabi i iná ande i baay monia tua, sin tuabí in kinoibog i Allah.

⁵ Intau boba-bobay inta nobiagdon tontaní sin diádon in haraponnea mako motuḷung monompia kon inia, bo dongkadon ki Allah in poharapannea mako, yo musti in sia doḷom bo singgai in mosambayang bo mopoigum in totabi kon i Allah.

⁶ Táe aka tobatú boba-bobay inta totokpa in moibog in kasanangan in dunia naa yo mosia tua in sabanarnea minatoi bidon, umpaka awak monia tua in nobiagpa.

⁷ Potaaudon kon i monia in soaḷ mita tanaa, sinbá mosia in mobiagdon totu-totuu bo diádon mogaid kon inta diá mopia.

⁸ Táe aka oyúon in intau inta doí monarukiramai kon i utatnea, ginaḷumnea, apadoman intau inta kon bonu in baḷoinea, yo intau tatua in doí mogaid kon onu inta sinuntut in pinirisayanea tatua, dá intau tatua in moraa-raatdon nongkon intau inta diá mopirisaya kon i Kristus.

⁹ Intau inta motaau tangoion dongkadon boba-bobay, tongábí mosia inta nongkon umurdon onom nopuḷú notaong bo namonik, bo mosia inta tongá komintan pinobuḷoi,

¹⁰ bo kinotaauan doman in intau kon umuranbí in sia nogaid kon inta mopia, ná umpamanea, ain nonompia kon i adínea mita, motabi kon tumpaḷa intau, moibog mobogoi in kaanon kon intau mita mopirisaya. Moibog doman motuḷung kon intau mita inta nobiag nobogá, pokoknea mosia in totu-totuudon nogaid kon onu inta mopia.

¹¹ Aka boba-bobay inta diápa nongo umur yo donaaipabí poyoiapon, sin aka koaputan in ibog monia, yo mokipobuḷoibí in mosia bo taḷaanbí monia in ki Kristus.

¹² Dá moitaḷá in mosia sin nomayowdon kon dandi inta ain inogoi i Allah kon i monia.

¹³ Apadoman wakutu monia in tongá modait kon agían akoan kon baḷo-baḷoiannea. Bo moiḻiu doman in raat kon tua aka mosia in moibog doman moporaa-raatmai kon tangoi intau ibanea bo moibog doman umaui kon urusan in intau ibanea, bo mongonguman doman kon soaḷ mita inta diá patus oumanon kon intau ibanea.

¹⁴ Tuamai ibogonku, intau boba-bobay inta nomudapa buidon mokipobuḷoi, sinbá buidon mokouḻí kon adí kon tonibuḷoinea, bo tongádon in sia monompia kon i adínea inta kon bonu in tonibuḷoinea tatua, sinbá intau mita inta mosaturu kon inaton in diádon moporomu-romúmai kon tangoi naton.

¹⁵ Soaḷ tanaa in pogumanku kon i monimu, sin oyúondon in boba-bobay inta ain noitaḷá kon daḷan bo dinumuduidon kon Ibilis.

¹⁶ Táe aka oyúon in intau Keresten inta kon tombonu in baḷoinea nobaḻídon boba-bobay, yo musti tompiaannea in sia, dikabí tongá moharap mako kon totuḷung in jamaat. Sin aka natua, dá jamaat in motaau bidon mayá motayak kon boba-bobay ibanea inta diádon in ginaḷumnea.

¹⁷ Itoi mita in jamaat inta nopobayá in oaidannea notompia, patusbí in sia ogoian in ponghargaan kodua noguntuḷ in kopianea. Torutama mosia inta morajing totok in motundú bo mopoyaput in Habar Mopia.

¹⁸ Sin kon bonu in buk motusi in pinaisdon nanaa, “Sapi inta koyogot in moritak kon gandum sinbá moripúdon in batoḷ in gandum nongkon simpungoinea, donaaibí pomponan in bibignea.” Bo pinais doman nanaa, “Intau inta mogaid in patusbí motarima kon boḻi in pinogaidannea tatua”.

¹⁹ Donaaibí tongá tarimaanmu mako natua in onu in pinonapud kon tobatú itoi in jamaat, táe mustibí oyúon in doyowa ande toḷu in intau inta nokoontong tontaní in mobogoi in kosakusian kon pelekara inta pinonapud kon inia tua.

²⁰ Intau inta nogaid kon inta diá mopia mustibí togur kon tayowon jamaat mita, sinbá dongogondon in intau ibanea bo moondokdon in mosia in mogaid kon inta diá mopia tatua.

²¹ Kon tayowon i Allah, bo i Yesus Kristus bo in malaekat mita inta piniḻí-Nea, pogumankudon kon inimu sinbá dumuduidon in iko totu-totuu kon onu inta sinundúku mita tanaa, ḷumbúbí in raianmu inta diá mopia kon i inekabí bo aidaidon in naa komintan bo dikabí mopoyoposi kon intau.

²² Dikabí gumampanganmai in monantú poḷat momarakat kon intau sin baḻíon mogogaid kon oaidan i Tuhan. Bo aka oyúon in intau nogaid kon inta diá mopia yo donaaibí dumayan in iko. Tantúbí ḷukadai in awakmu bá umuran modarit.

²³ Donaaidon tongá umuran tubig in inumon, táe siga-sigad monginum kon anggur tumongopiḻik sinbá molancar in bobayá kotoran, sin iko in mokakitdon in motakit.

²⁴ Dosa in tongonumai intau, wakutu in diápa sidangon koontongan bidon motarang. Táe dosa in intau ibanea bain koontongan aka mopaḷutdon sidangon.

²⁵ Ná doman tua in oaid mita mopia baḷúbí koontongan, bo inta diá mogampang koontongan in diábí umuran moiadop.