TIMOTIUS 1 4 - Alkitab Singog In Mongondow Masa In Tanaa

Mototundú mita kon inta diá totuu

¹ Roho i Allah in muna bidon noguman nanaa: Kon singgai mita inta moiduduimai, oyúon in intau mobaḷuidon in pirisaya monia kon i Kristus. Mosia in dumuduidon kon dimukud mita inta tongá mopororigamai bo poḷat doman dumudui kon totundú mita in dimukud moraat tatua,

² totundú mita tatua inta pinotaau i intau mita inta mongo munapik bo mongouboḷ. Gina in intau mita tatua ain nosindip.

³ Mosia in motundú kon intau bá diá mobuḷoi bo diá doman mokaan kon kaanon inta ain sinantú monia. Bokaka kaanon tatua in pinomia i Allah sin kaanon takin mosukur kon i-Nia in intau mita inta ain nopirisaya kon i Kristus bo inta ain nonotaau kon totundú inta mobanar nongkon i Allah.

⁴ Bayongan inta pinomia i Allah tua in mopiabí, bo diábí tobatúmai in motaau anggapon haram aka tua komintan tarimaan naton takin mopoyaput in sukur kon i Allah.

⁵ Sin kaanon mita tatua ain bidon binarakatan-Nea bo sinambayangan domandon naton.

Mogogaid kon oaidan i Kristus inta nogaid nopira

⁶ Aka tundúonmu intua komintan kon bayongan in ginaḷum naton, yo iko in mobaḻí bidon mogogaid i Kristus inta nogaid nopira. Bo iko in umurandon moginropot kon ginamu takin pirman i Allah inta pinirisaya naton bo takin totundú mita totuu inta ain dinuduianmumai naa in kino oonggotnea.

⁷ Dikadon mopirisaya kon ouman mita inta tongá pomia-miaan in intau bo inta diá in mangaḻenea. Táe tantúdon poḷatih moibada kon i Allah.

⁸ Latihan in awak naa in tongábí topiḻik in baragunanea, táe aka molatih moibada yo moibaragunabí kon bayongan in yagi-yagi, sin oyúon in dandi kon kobiagan tanaa mako bo kobiagan kon singgai moiduduimai.

⁹ Totuubí in singog tanaa bo patusbí tarimaan poḷat pirisayaan.

¹⁰ Manangka intua kita in musti moramuji mogaid, sin kita in tongábí moharap mako kon i Allah inta nobiag; Sia tuata inta mopoposaḷamat kon bayongan in intau, muna-munamai mosia inta mopirisaya.

¹¹ Tundúdon intua komintan, bo tongganutaidon in intau mita sinbá moibogdon dumudui.

¹² Mokopoingat sinbá diá in tobatúmai intau in mopandang enteng kon inimu popisí in iko noguodpa. Táe poramujidon sinbá iko in umuran mobaḻí contoh bo doduduianmai kon soaḷ inta mopia i intau mita inta mopirisaya, pinangkoi kon pososingog, oaid bo kon soaḷ kototabimu kon tumpaḷa intau bo kopopirisayamu kon i Kristus Yesus takin kobobiagmu inta motompia.

¹³ Samantara in akuoi diápa moiangoi, dá mokoporajingdon in mobaca kon buk mita motusi sinbá motaau in iko mononggina bo motundú kon bayongan intau inta mopirisaya.

¹⁴ Dika angoian maḷat iko in mopomaké in totabi inta ain pinonotabi i Tuhan kon inimu wakutu in iko binarakatan in itoi mita in jamaat. Umuran torop in koyow i Allah inta pinoguman in nabi mita soaḷ iko.

¹⁵ Tarukira intua komintan bo totu-totuu aidan intua sinbá koontongandon intau in komajuan oaidanmu.

¹⁶ Ḷukadai in awakmu bo ḷukadai doman in onu inta ain sinundúmu. Musti in iko mokopotoindudui kon tua komintan, sin aka tantúmu aidan intua komintan, yo mangaḻenea kon tua iko in moposaḷamat bidon in awakmu bo moposaḷamat doman kon intau mita inta moibog mokidongog kon inimu.