TIMOTIUS 1 2 - Alkitab Singog In Mongondow Masa In Tanaa

Ibada in Jamaat

¹ Naa in totok poigumonku, aka moiko mosambayang mopoigum, bo mopoyaput in sukur kon i Allah, yo dika koḻiongan in bayongan intau, sambayangaibí komintan in mosia;

² bo sambayangai doman in datu mita bo intau mita inta inogoian in kawasa momarenta sinbá moaman bo motompia in kobiagan naton kon tayowon i Allah inta umuran mogaid kon inta mopia.

³ Sin natuabí in mopia bo kinoibog i Allah inta mopoposaḷamat naton.

⁴ Ki Allah inta moibog bá bayongan in intau in posaḷamaton bo monotaau kon onu inta moitutui.

⁵ Sin tongábí totobatú in ki Allah bo tongábí doman tobatú in mononigad kon intau bo kon i Allah, Sia tuata in ki Kristus Yesus.

⁶ Sia in tobatú intau inta ain noposarakan in awak-Nea sin pinotobut kon dosa mita in bayongan intau. Tua in moponiata kon wakutu inta ain sinantú i Allah, ibogon-Nea in bayongan intau in posaḷamaton.

⁷ Dá tuamai akuoi in pinotabá-Nea mayá kon yua-yuak in intau mita inta deeman Yahudi sin mopoyaput in habar mopia inta mobanar nongkon i Allah. Onu inta pinogumanku naa in totuubí, deemanbí uboḷ.

⁸ Ibogonku kon ondakabí, yo bayongan in ḷoḷaki musti mosambayang takin gina motuḻid, diá in yogenggeng ande bobayowan.

⁹ Ná doman tua in bobay donaai poiḻiuon in pomomakeang, paké in ḷambung inta motoinut in ontongon intau, bo inta diá mokooyá. Buok in donaai tuḷa-tuḷapidonmai, donaai mopomaké in buḷawan, mutiara andeka ḷambung inta mongomahaḷ.

¹⁰ Táe ḷambáanbí in oaid mita inta mopia, inta patus kon bobay mita inta moibada kon i Allah.

¹¹ Bobay in musti mobalajar diá mounsingog bo motoindudui.

¹² Diábí ogoiku in bobay motundú andeka momarenta kon ḷoḷaki; musti in mosia kibio-biómai.

¹³ Sin ki Adambí in muna pinomia i Allah bain tua bodongka ki Hawa.

¹⁴ Bo deemanbí ki Adam in kinoakaḷan, táe bobaybí tatua, sahingga in mosia nomaḷawangdon kon parenta i Allah.

¹⁵ Táe umpaka natua, bobay in posaḷamatonbí doman, sin mosia in mobogoi in buí. Asaḷ sia mokopoompá kon dodia bo mokopotantú doman kon pirisaya kon i Kristus bo umuran kototabian kon tumpaḷa intau, bo moposarakan doman in kobiagannea kon i Allah.