TESALONIKA 2 3 - Alkitab Singog In Mongondow Masa In Tanaa

Mosambayang bo mogaid

¹ Naa doman in poigumonku kon i monimu Utat mita, tantú sambayangai in kami. Sinbá habar nongkon i Tuhan in umuran potaau magí-mako bo tarimaan domandon takin pia in gina ná pinototarima monimu koḻipod.

² Bo umuraibí doman sambayangai sinbá kami in posaḷamaton i Allah nongkon kawasa in intau mita inta mopotombauk bo moraat, sin diábí komintan mopirisaya in intau kon habar nongkon i Tuhan tua.

³ Táe ki Tuhan in umuranbí mosatia. Moginrigon kon gina bo moḷukad kon i monimu nongkon Inta Moraat.

⁴ Bo kami in mopirisayabí totok kon i Tuhan kon moiko nion in tantúbí mogaid kon onu inta pinoki aid nami kon i monimu.

⁵ Poigumon mako tua ki Tuhan in umuran motundú kon daḷan mopia kon i monimu sinbá kotaauandon totok monimu kon motabibí totok in ki Allah kon i monimu bo ogoianbí i Kristus in kasabaran in moiko.

Kowajiban mogaid

⁶ Utatku mita, podoyon kon tangoi i Tuhan Yesus Kristus, kami in moguman kon i monimu sinbá moiko in umuran mokopoyayú kon i monia inta maḷat bo doí dumudui kon onu inta sinundú mita nami kon i monia.

⁷ Kinotaauan bidon monimu, kon musti dumudui in moiko kon aid nami. Kami in diábí tongá mosiug mako wakutu in koyua-yuakpa monimu.

⁸ Kami in deemanbí tongá mokaan kon onu in ogoi intau bo diá mogaid, táe kami in iyumoyigabí totok in mogaid doḷom bo singgai sinbá diá tongá mokoposusamai kon intau ibanea.

⁹ Deemanbí popisí in diá in hak nami mokituḷung kon i monimu, táe ibogon nami bá moiko in dumudui kon aid nami.

¹⁰ Sin kon wakutu in kami kon yua-yuakpa monimu naa in atorang inta pinoguman nami kon i monimu, “Aka intau doí mogaid yo donaai mongaan in sia.”

¹¹ Pinoguman nami in nanaa sin dinongog nami kon oyúon in intau kon sigad monimu in doídon mogaid kon soaḷ inta baraguna tongá bidon mogaid kon inta diá baraguna.

¹² Podoyon kon kawasa i Tuhan Yesus Kristus, kami in mobogoi in tompoingat bo tonggina kon intau mita natua, sinbá mosia in umuran tumompia bo mogaid kon oaidannea, sahingga sia in mokaan in sia kon bungai in ḷopínea tontaní.

¹³ Dikabí angoian in maḷat in mogaid kon inta mopia.

¹⁴ Bo aka oyúon in intau inta doí mokidongog kon onu in pinoguman nami kon bonu in surat tanaa, yo mokopoingat kon intau natua bo donaai moyobayat takin intau tatua sinbá mooyá in sia.

¹⁵ Tongá dikabí anggapon saturu in sia; táe tongginaai saḷaku utat.

Simpod in surat

¹⁶ Ki Tuhanbí tua in pangkoi in kobiagan naton motompia. Poigumon mako umuran in Sia mobogoi kon i monimu in kobiagan motompia bo moonow kon bayongan in yagi-yagi. Bo igumon doman mako sinbá ki Tuhan in umuran moyotakin monimu komintan.

¹⁷ Akuoi, ki Paulus mopoyaput in salam kon i monimu. Akuoibí tontaní in nomais kon surat tanaa. Naa in tanda pinakéku kon bonu in bayongan suratku.

¹⁸ Totabi bo barakat i Yesus Kristus ki Tuhan naton in umuran koyota-yotakin monimu komintan. Horomat nami, Paulus